10. mjezynarodna wuměłska dźěłarnička w Miłoćicach zakónčena

Miłoćicy (SN/MiR). Rěčeć njejsu wuměłcy – serbscy, němscy kaž tež ći z wukraja – na zakónčacym zarjadowanju lětušeje 10. mjezynarodneje dźěłarnički wčera w Miłočanskej skale chcyli. „Njech naše twórby rěča“, měnješe Jiang Bian-Harbort z Lipska. Te su sej najebać chabłace wjedro mnozy zajimcy wotkryli. Někotražkuli twórba namaka na městnje kupca. „Wuměna mjez wuměłcami běše lětsa wosebje dobra“, rjekny Žuričan Alojs Šołta, „a wosebita přirodna atmosfera w tejle skale do kreatiwnosće pohonja.“ Mjez wopytowarjemi bě tež Monika Lehmannowa z Hlinowca. „Njejsmy jenož tu, hdyž so dźěłarnička wotměwa. Tež hewak sej rady sem do skały wulećimy. Lětsa lubja so mi wosebje twórby, kotrež je Alojs Šołta z korjenjow tworił.“

Kaž Ludwig Pickert, předsyda towarstwa Kamjenjak, kotrež dźěłarničku wuhotuje, wuzběhny, „stej lětsa wosebje wulka zhromadnosć a mjezsobna podpěra tomu polěkowałoj, zo bě dźěłarnička wuspěšna“. Wón dźakowaše so čłonam Kamjenjaka, Njebjelčanskemu wjesnjanosće Tomašej Čornakej (CDU) a gmejnje za njesebičnu pomoc.