Liberec (CRM/SN). Z wčerawšim wote­wrjenjom wustajeńcy wo katolskej serbskej drasće w Liberecskej krajnej wědomostnej bibliotece bu w srjedźišću namjezneho regiona znowa zajim za susodny drje mały, ale tola čiły a na kulturu bohaty serbski lud zbudźeny.

Jako zastupnica nawody města poda magisterka Libuše Vítová čěskim zajimcam kaž tež serbskim přitomnym, kotřiž zastupowachu zarjad Domowiny a jeje zwjazkowe předsydstwo, swój wid na čěsko-łužiskoserbske poćahi. Mgr. Vítová skedźbni wuraznje na to, zo słuša k tudyšim namjeznym rěčam nimo čěšćiny, pólšćiny a němčiny tež serbšćina. Nawodnica za město a region wuznamneje a reprezentatiwneje Liberecskeje biblioteki Blanka Konvalinková zazběh nowych stykow jara podpěruje. Jako jedyn z hłownych iniciatorow wustajeńcy přednjese jednaćel Domowiny Bjarnat Cyž předstawy Serbow, kotrež nańdźechu runje tak pozitiwny wothłós.