Katowice (DY/SN). W srjedźišću mjezynarodneje wědomostneje konferency, wotměwaceje so minjeny pjatk a sobotu w Šleskej bibliotece w Katowicach, stejachu tworjenje a skutkowanje serbskich spisowaćelow Jurja Brězana, Antona Naw­ki a Benedikta Dyrlicha kaž tež pólsko-serbsko-němske styki w zašłosći a přitomnosći. K tomu jimachu so w połhodźinskich přednoškach wjacori wědomostnicy a spisowaćeljo słowa. Tak předstaji prof. dr. Tadeusz Lewaszkiewicz z Poznanja staw slědźenja wo Jurju Brězanu, prof. dr. Piotr Pałys z Opola pak rozjima angažement a politiske mjezy najznaćišeho serbskeho spisowaćela při organizowanju brigadowanja Serbskeje młodźiny wot lěta 1946 do 1948 w Juhosłowjanskej. Přednošk prof. dr. Dietricha Šołty wo Jurja Brězanowym zhladowanju a skutkowanju w přewrótnej dobje do zjednoćenja Němskeje přečita dr. Monika Blidy z Katowic něhdźe 30 wobdźělnikam konferency.