Kuba w fokusu 26. Choćebuskeho festiwala wuchodoeuropskeho filma

Choćebuzu (HA/SN). Hišće tři tydźenje, potom steji město Choćebuz zaso połnje w znamjenju filmow z cyłeho swěta. Wot 8. do 13. nowembra wotměje so hižo 26. raz pospochi Choćebuski festiwal wuchodoeuropskeho filma. Na tutych šěsć dnjach pokazuja we wosom kinach a na druhich městnach dohromady wokoło 200 filmow rozdźělnych žanrow z 45 krajow, a to w třinaće wšelakorych wubědźowanjach a sekcijach. Mjez nimi su 76 filmow, kotrež předstaja docyła prěni raz w Němskej, a dźewjeć filmow, kotrež dožiwja w Choćebuzu samo swoju swětowu premjeru.

Na wčerawšej nowinarskej konferency su programowy direktor Bernd Buder, jednaćel „FilmFestival Cottbus GmbH“ Jörg Ackermann a dalši zamołwići festiwala informowali wo zarjadowanju a su prěnje wobšěrne programowe zešiwki rozdźělili. Bernd Buder wuzběhny, zo so na swěće přeco hišće podhódnoći kwalita filmow z wuchodoeuropskich statow. W Choćebuzu so hižo wjele lět pokazuje, zo tomu tak njeje a zo je so filmowstwo w mnohich krajach derje wuwiło, tež w kooperaciji z druhimi krajemi.