Budyšin (CS/SN). Wopyt serbskeho dźiwadźelnika Michała Lorenca wčera w Budyskim klubje wuchowarjow rěče bě hižo třeći swojeho razu. Kaž wón sam rjekny, bě to jeho prěni zjawny wustup po dlěšej přestawce chorosće dla. Lorenc předstaji w Ludowym nakładnistwje Domowina wušłu słuchoknihu swojeho bratra Kita Lorenca, kotruž bě sam w studiju na­hrawał. Projekt słuchoknihi móžachu mjez druhim tohodla zwoprawdźić, dokelž njebě Michał Lorenc honorar brał, kaž wón rjekny. LND dźě njemóže za přewažnje němskorěčne projekty srědki Załožby za serbski lud wužiwać. Na słuchoknize bě Lorenc po swójskich informacijach cyłe lěto dźěłał. Album wopřijima dwě cejdejce w němskej a jednu w serbskej rěči. Najwjetši dźěl basnjow na njej je w hornjo-, někotre pak su tež w delnjoserbšćinje zwěčnjene. Cyłkownje wobsahuje słuchokniha 54 serbskich a 120 němskich literarnych tekstow.