Paternoster 7 w klubowni internata předstajili

Budyšin (SN/CoR). Přeprošenje Ludoweho nakładnistwa Domowina na knižnu premjeru Paternostra 7 w klubowni internata Budyskeho Serbskeho gymnazija (SGB) je wčera předewšěm młodźina sćěhowała, a to cyle pod hesłom literarneho rjadu „teksty młodych awtorow za młodych ludźi“. „Přeco so jara wjeselimy w nakładnistwje, hdyž nowy Paternoster wuńdźe. Wšako je to naš dorost a smy wćipni, što maja nam młodźi awtorojo rjec“, praji lektorka Weronika Žurowa witajo něhdźe 25 přitomnych. „Nowe literarne talenty wuskušować bě za mnje znowa putacy krimi“, rozłoži Měrana Cušcyna­, kotraž bě druhi raz zběrku zestajała. Wona dopomni na powědančko Lubiny Hajduk-Veljkovićoweje, kotrež bě prěnjemu wudaću Paternostra w lěće 2003 titulne mjeno spožčiło. Awtorka słuša dźensa k najproduktiwnišim serbskim spisowaćelam: „Nadźijam so, zo něchtó z was snano tež tónle puć póńdźe“, pohoni Cušcyna literarny dorost.