Stotu wustajeńcu w Choćebuskim Serbskim domje wotewrěli

Choćebuz (SN/HA). „Serbska kulturna informacija Lodka w Choćebuskim Serbskim domje je za cyłe kulturne dźěło w měsće jara dobra adresa, a to nic jenož Serbam.“ To rjekny Bernd Warchold, w měšćanskim zarjadnistwje zamołwity za kulturu, wčera wječor na wotewrjenju 100. wustajeńcy Lodki w Serbskim domje. Tuchwilna jubilejna přehladka je hižo sama za sebje mała bohata křinja, dokelž su w njej we wulkej ličbje schowane drohotne wudźěłki serbskeho a łužiskeho zwjetša ludoweho tworjaceho wuměłstwa w mnohich žanrach a fasetach. Wona pokazuje wuměłstwo w swojich tradicionalnych a modernych formach. Tak je hódny a rjany dar 25lětnemu wobstaću kulturneje informacije Lodki, kotraž bu 6. měrca 1992 załožena.