Hornjołužiska towaršnosć wědomosćow so w Zhorjelcu schadźowała

Zhorjelc (FP/SN). Hornjołužiska towaršnosć wědomosćow je so sobotu tradicionelnje schadźowała. Čłonojo zhromadźichu so w pyšnje ponowjenym baroknym domje na Nysowej w Zhorjelcu. Lětsa bě tež Załožba srjedźoněmskeje kulturneje rady w kooperaciji ze Zhorjelskej zběrku a Mjezynarodnym institutom Jacoba Böhmy na přihotach zjězda wobdźělena. Wjace hač 70 hosći sćěhowaše přeprošenje, kotrež lubješe dosć wotměnjawy program.

Hižo wosmy króć móžachu Myto Hermanna Knothy za wusahowace dorostowe slědźenje spožčić. Lawreat Christoph Hanzig z Drježdźan bě so w swojim zapodatym dźěle ze stawiznami psychiatriskeje institucije Großschweidnitz pola Lubija rozestajał. Tam běchu nacional­socialisća w lětach 1939 do 1945 sta dźěći a młodostnych morić dali.

Lětuše Myto Jacoba Böhmy dósta stawiznar Martin Renghart z delnjobayerskeho Julbacha. Wón bě poměr Böhmy k Martinej Lutherej nadrobnje přeslědźił a dokumentował.