Dźiwadłowy festiwal „Witajće druhdźe III“ w Budyšinje zahajeny

Budyšin (SN/CoR). Něhdźe 30 sobuskutkowacych zhromadneho projekta Budyskeju NSLDź a Kamjentneho domu je dźens dopołdnja swój přinošk „Romeo und Julia auf Platte“ k dźiwadłowemu festiwalej „Witajće druhdźe III – hrajo so zetkawać“ na hłownym jewišću přepjelnjeneje žurle NSLDź předstajiło. Mjez wopytowarjemi běchu mnozy šulerjo tež z wokoliny, mjez nimi z Budyskeho Serbskeho gymnazija. Woni dožiwichu předstajenje, kotrež so hrajo, rejujo a hudźbnje z rozestajenjemi mjez ćěkancami a prawicarsce orientowanymi domoródnymi 2016 w Budyšinje zaběra. Ze sylnym přikleskom dźakowaše so zahorjeny publikum serbskim a němskim młodostnym kaž tež młodym ćěkancam.