Na Dnju Saksow w Lubiju prawdźepodobnje jenož dwaj serbskej dypkaj

Lubij/Budyšin (SN/BŠe/JaW). Najwjetši ludowy swjedźeń swobodneho stata Dźeń Saksow – lětsa w Lubiju –, na kotryž wočakuja organizatorojo wjac hač 450 towarstwow a zwjazkow ze Sakskeje, Čěskeje a Pólskeje, njezměje lětsa prawdźepodobnje nimale žadyn serbski podźěl. Organizatorojo swjatka běchu tónle tydźeń jeničkimaj serbskimaj lajskimaj ćělesomaj,­ kotrejž běštej so přizjewiłoj, pisomnje wotprajili.

Nimo muskeho chóra Delany je Serbski folklorny ansambl Slepo tajki list dóstał. Mjez druhim w nim rěka: „Po swědomitym pruwowanju smy bohužel k wuslědkej dóšli, zo dyrbimy waš poskitk wustupa wotpokazać. Na zakładźe wulkeje ličby naprašowanjow a wobmjezowanych kapacitow njemóžeja bohužel wšitke towarstwa na swjedźenju wustupić.“