Po wobzamknjenju hamta ma gmejna Dešno swój muzej sama financować
Dešno (IN/SN/bn). Delnjoserbskej medijej Nowy Casnik a Bramborske serbske radijo rozprawjatej aktualnje wo napjatym połoženju Dešnjanskeho domizniskeho muzeja. Tamniši wjesnjanosta Fred Kaiser je nětko we wobłuku posedźenja wuběrka za serbske naležnosće wokrjesa Sprjewja-Nysa přitomnym tuchwilny staw wustajenišća rozjimał. Po jeho słowach je muzej wohroženy, dokelž nochce Bórkowski hamt přichodnje wjace połne městno wjednicy financować. „Tak móže wjele skóncować“, Kaiser rjekny. „Hdyž wobdźělimy so na přikład w juniju na zwjazkowym wubědźowanju ‚Naša wjes ma přichod‘, šansy za nas runjewon njestupaja, bych-li tam rozkłasć dyrbjał, zo hamt Bórkowy našu gmejnu w tym nastupanju wjace njepodpěra“, wjesnjanosta zjima.