Drježdźany (dpa/SN). Po dołhej ćahańcy je Němski zwjazkowy sejm nětko skónčnje tak mjenowany digitalny pakt za šule wobzamknył. Sakska liči z něhdźe 250 milionami eurow. Nałožić chcedźa pjenjezy předewšěm za wutwar internetneje infrastruktury a syćow šulskich twa­rjenjow, zdźěli wčera sakski minister za kultus Christian Piwarz (CDU). Nimo toho wuhotuja rjadowniske rumnosće z WLANom a z interaktiwnymi taflemi. Mobilne nastroje kaž tablety we wjetšim mnóstwje najprjedy raz předwidźane njejsu. W prěnim rjedźe prócuja so zamołwići wo to, šule zakładneje wuhotować, kaž z ministerstwa rěka.