Wosada swj. Michała jubilej załoženja z knižnej premjeru woswjećiła
Budyšin (SN/bn). Składnostnje lětušeho jubileja 1619 załoženeje ewangelskeje wosady swj. Michała je superintendent Jan Malink knihu „Swj. Michał. Cyrkej – wosada – wsy“ wudał. Publikacija wobswětla w pjeć kapitlach stawizny nabožinskeho zhromadźenstwa kaž tež Božeho domu, kotryž twori dźensa „zhromadnje ze Starej wodarnju najznaćiši architektoniski ansambl Budyšina. Před 200 lětami bě tehdyši farar Mička w drohotnym zešiwku historiju wosady zjimał. Podobnje postupowaštaj fararjej Tyšer a Rjeda lětstotk pozdźišo. Z toho je mysl wurostła, nětčiši staw z knihu wotbłyšćować“, Malink nastaće publikacije na wčerawšej premjerje w Budyskej Michałskej cyrkwi rozłoži.
