Hižo w prěnim dźělu swojeje rozprawy je Jakub Langa wam hižo prěnje zaćišće z wukrajneho ­semestra podał. W druhej połojcy semestra je so za njeho kóždy tydźeń rjeńši wuwiwał – tule jeho dalše zaćišće ze Słowakskeje.

Pruwowanski čas bě porno němskemu chětro zahe. Tak mějach prěnje pruwowanja hižo srjedź měrca. Lěpšina bě, zo maš tam w kóždym semestrje tři móžne pruwowanske terminy.

Nalětni a lětni čas w Bratislavje wobsahowaštej ­wězo wjace hač jenož studij a pruwowanje. Z komilitonom Juanom dojědźechmoj sej do dalšeje stolicy, Ljublja­ny. Wopyt kombinowachmoj hnydom ze sportowym zarjadowanjom. Wobhladachmoj sej wolejbulowe finale champions League žonow a mužow. Ale tež kultura njesmědźeše falować. Tak rěkaše skoku do stareho města, hdźež tež druhich přećelow z Bratislavy zetkachmoj a wječor zhromadnje swjećachmy.