Florian Kießlich pochadźa z Worcyna a je zahorjeny wot hiphopoweje hudźby. W skupinje „Nowa Doba“, kotrejž přisłušataj tohorunja Pětr Dźisławk a Syman Hejduška, je wón hłownje zamołwity za produkciju „beatow“ – takrjec instrumentalnych přewodow –, na kotrychž zakładźe młodźi Serbja potom swoje rymy napisaja. Što běchu přičiny za to, zo je so 24lětny student medicinskeje techniki runje do produkcije hiphopowych spěwow zanurił a kotre móžnosće widźi wón na polu serbskeje hiphopoweje hudźby – wo tym je so z nim Jan Bogusz rozmołwjał.

Što běchu twoje prěnje kroki do swěta hudźby?

F. Kießlich: Prěni kontakt bě zažne hudźbne kubłanje, tak zo je mje hudźba hižo ze zažnych dźěćacych lět stajnje přewodźała. W 1. lětniku započach potom klawěr hrać a wot 6. lětnika kontrabas. Tute nazhonjenja mi wězo tež nětko při hudźbnej produkciji tójšto pomhaja.

Što će runje na hiphopowej hudźbje tak fascinuje?