„Styki mjez serbskimi wuměłcami a kulturnikami z cyłeje Łužicy wutworić a zhromadne projekty wuwiwać“ je zaměr iniciatiwy SEŚ, w kotrejž angažuja so předewšěm młodźi njewotwisni zarjadowarjo a swobodnje skutkowacy wuměłcy. Minjeny kónc tydźenja wotmě swoje lětuše zetkanje w Budyšinje.

Budyšin (SN/bn). Zahajenje zetkanja, na kotrymž běchu nimo tójšto hudźbnikow, literatow a awdiowizuelnych wuměłcow mjez druhim čłonojo towarstwow Meta Solis, barakka a Dźěłań dźeń kaž tež Kolektiwa Wakuum a Łužiskeho instituta zastupowani, bě pjatkowniši zhromadny wopyt wernisaže wustajeńcy „Von der Berge Macht und der Felsen Kraft“, z kotrejž so wuměłče Anne Kern a Sabine Veit tuchwilu w Budyskim Kamjentnym domje prezentujetej. Po slědowacym ­čitanju Dirka z Lubija pod hesłom „Lebens.Mittel.Industrie“ w rumnosćach towarstwa Dźěłań dźeń diskutowachu wo naslědnym ekologiskim zežiwjenju.