Hižo wjacore měsacy wotměwa so w Drježdźanach „Čěska sezona“, kulturny festiwal, kotryž organizuja Statne wuměłstwowe zběrki a Němsko-čěski fonds přichoda. Hišće hač do 23. apryla je w Japanskim palaisu instalacija „Imaginarium“ za dźěći a dorosćenych widźeć. Wopyt je darmotny.

Njehotowy Japanski palais, kiž po wobškodźenju w Druhej swětowej wójnje přeco hišće cyle restawrowany njeje, skića runje prawy ramik za wulkotnu wustajeńcu, kotraž kaž hoberska kreatiwna improwizacija skutkuje. Wopytowarjo móža sej kuzłapołny swět kuka­dłowych jewišćow, karusele, klankodźiwadło, cirkusowu arenu, marionety a mechaniske hrajki wobhladać a je wupruwować. Smědźa za štryčkami ćahać, koleska wjerćeć, klocki stajeć, na knefle tłóčić, hry hrać. Smědźa zwěrjata, bajkowe a fablowe postawy z drjewa, papjery, papmašeja, płata, wołmy a wjele dalšich materialijow wobdźiwać a so do kosmosa fantazije zanurić.