Budyšin (SN/bn). Po premjerje loni z dohromady něhdźe 1 200 wopytowarjemi chce Serbski ludowy ansambl tež lětsa pod hesłom „Kulturna zahroda“ sep zarjadowanjow pod hołym njebjom wu­hotować. Na „najrjeńšim balkonje Budyšina“, kaž intendant SLA Tomas Kreibich-Nawka zahrodu pod Röhrscheditowej baštu­ we wobłuku składnostneje nowinarskeje rozmołwy mjenowaše, poskića wot 1. do 25. junija stajnje wot štwórtka do njedźele dohromady 16 programow. Zazběh twori koncert „Ladies Night“ z Weroniku Kalinučcynej, Hanku Wowčerjowej a Helenu Hejduškec, kotrež připowědźi SLA jako „měšeńcu znatych serbskich, jendźelskich a němskich spěwow kaž tež swójskich kompozicijow“. Dźeń po tym chce Drježdźanski trijo „Placebo Flamingo“ swój loni dešća dla wotprajeny wustup nachwatać a publikum „z wysokoenergetiskej syntezu funka, hiphopa, ludoweje hudźbny, rocka a jazza zahorić“.