Łužiske nakładnistwa a serbska literatura na Lipšćanskich knižnych wikach

Lipsk/Budyšin (AB/SN/bn). „Najwažniše nalětnje zetkanje knihoweje a medijoweje branše“, kaž wuhotowarjo Lipšćanskich knižnych wikow swoje zarjadowanje wupisuja, wotměje so lětsa pod nadpismom „Who’s still reading?“ (Štó da hišće čita?) wot přichodneho štwórtka do slědowaceje njedźele. Hóstny kraj resp. region stej Nižozemska a Flandriska, nowostka we wobłuku ramikoweho programa je zhromadna iniciatiwa wikow a Bursoweho towarstwa němskeho knihikupstwa „Demokratie wählen. Jetzt.“, z kotrejž ma so hladajo na „přiběrace nadpady na demokratiske zakładne hódnoty, kaž čłowjesku dostojnosć, swobodu a tolerancu“ a w zwisku z přichodnymi wólbami w Europje kaž tež „třoch srjedźoněmskich zwjazkowych krajow sylny signal wusyłać“. Wospjet wuhotuja paralelnje rysowanej literaturje wěnowanu Manga-Comic-Con a rjad „Leipzig liest“.