Pozemska wojerska ofensiwa přećiwo zepěranišćam Hisbollah zahajena

Tel Aviv/Beirut (dpa/SN). Z w nocy zahajenej pozemskej ofensiwu Israela přećiwo milicy Hisbollah w Libanonje je połoženje na Bliskim wuchodźe nowy schodźenk eskalacije docpěło. Israelske wójsko rěči wo „wobmjezowanych“ nadběhach na zepěranišća njedaloko mjezy, kotrež su „bjezposrědne wohroženje“ sydlišćow na sewjeru Israela. Wojerske lětadła Israela su wčera wječor nimo toho znowa objekty njedaloko libanonskeje stolicy Beiruta bombardowali. Połoženje w Libanonje je dramatiske: Po libanonskich informacijach je w běhu 24 hodźin nimale sto ludźi žiwjenje přisadźiło. Samsny čas lećachu zaso rakety z Libanona do směra na Israel.