Košice (SN/mb). Słowjenjo a jich zwjazki, kotrež su w FUEN organizowane, měli wuše styki hajić. Tole bě tenor po lětušim seminarje dźěłoweho zjednoćenstwa słowjanskich mjeńšin (AGSM) Federalistiskeje unije europskich narodnosćow w Košicach. Kaž referent Domowiny za kulturu a wukraj Clemens Škoda informowaše, mjez druhim wo tym přemysluja, kulturny dźeń na Europeadźe wutwarić.
Seminar je so wot štwórtka do njedźele wotměł. Wobdźěliła je so na nim pisana měšeńca Słowjanow: Češa w Słowakskej a jich młodźinska organizacija, Montenegrowčenjo z Albanskeje, Rusojo z Estniskeje, Makedonjenjo z grjekskeho dźěla sewjerneje Makedonskeje, Słowakojo z Madźarskeje, naši Serbja, južni Serbja z Chorwatskeje, Chorwaća ze Serbiskeje, Słowjency z Korutanskeje w Awstriskej, Słowjency z Italskeje, Chorwaća z Hrodowskeje w Awstriskej, Češa z Chorwatskeje a Rusinojo z Ukrainy. Jich načolny zastupjer powědaše, što wšo su wójny dla hižo přisadźili a zo ludnosć sej jara přeje, zo přińdźe kraj do EU. W diskusiji dźěše tež wo polěpšenje zjawnostneho dźěła AGSM.
