Budapest (dpa/SN). Madźarska chce kaž Nižozemska prawidła azyloweho prawa zběhnyć. Tole je madźarski minister za europske naležnosće János Bóka připowědźił. „Přećiwo ilegalnej migraciji je razne postupowanje trěbne“, piše wón internetnje. Tohodla chce Budapest wo to prosyć, tute prawidła wopušćić směć, jeli zrěčenja EU tole dowoleja.

Do toho bě Nižozemska pola komisije próstwu zapodała, prawidła azyla zběhnyć směć. Prawicarski populist Geert Wilders, kiž sedźi ze swojej radikalno-prawicarskej Stronu za swobodu (PVV) prěni króć w knježerstwowej koaliciji, rěčeše wo wažnym signalu, „zo wěje nowy wětřik w Nižozemskej“. Zběhnjenju prawidłow bychu wšitke kraje EU přihłosować dyrbjeli, štož njeje wotwidźomne.

Budyšin (SN/mb). „Wokomiknje žadyn dobry wupuć njewidźu“, praješe Marja Michałkowa, hač do 2017 štyri króć direktnje wolena zapósłanča CDU w zwjazkowym sejmje, wčera Serbskim Nowinam hladajo na wutworjenje wjetšiny po wólbach do krajneho sejma w Sakskej. AfD njeje dla prawicarskoekstremistiskich zastupjerjow kaž Höcke tak a tak móžny partner za CDU. Tež koalicija z BSW za nju předstajomna njeje, wšako je strona z wotšćěpom wjackróć přemjenowaneje SED. Mjeńšinowe knježerstwo CDU a SPD tohorunja za praktikabelne nima, dokelž bychu wothłosowanja w parlamenće potom „njewobličomne“ byli. Tohodla nazhonita serbska politikarka najprjedy raz strózbe a sćerpne postupowanje poruča. W kruhach kritikarjow ewentualneje sakskeje koalicije CDU/BSW/SPD słyšiš husto pokiw, na wólby w Braniborskej zhladować: Po wólbnej njedźeli w susodnym kraju je w zwjazkowej politice wšo móžno – tež kónc amploweje koalicije. To by ramik za jednanja w Sakskej wobwliwowało.

Wólby krajneho sejma w Braniborskej móhli SPD w Berlinje přetřasć

Berlin (dpa/SN). Zwjazkowy kancler Olaf Scholz je daloko preč, hdyž přichodnu njedźelu we 18 hodź. w telewiziji prěnje prognozy wo wólbach krajneho sejma w Braniborskej wozjewja. To je pola njeho runje w 12 hodź: Politikar SPD wobdźěli so mjenujcy na wjeršku UNO wo prašenjach přichoda w New Yorku.

Snano pak je kanclerej samo jara lube, zo móže sej wólbne wuslědki najprjedy raz z wěsteje zdalenosće wobhladać. Dobyć wšak Scholz při tutych wólbach tak a tak ničo njemóže. Jeli ministerski prezident Dietmar Woidke swój zaměr docpěje a SPD tola hišće k wólbnemu dobyću před tuchwilu nawjedowacej AfD wjedźe, budu prajić: „Wón je dobył, dokelž njeje sej kanclera na wólbne zarjadowanja ­přeprosył.“ Jeli Woidke jenož druhe městno wobsadźi a tamnej wosobje wu­tworjenje noweho knježerstwa přewo­staji, potom drje budźe so šěrić, zo je Scholz ze swojim zwadźenym knježerstwom na tym wina.

By wšak woprawdźe zadźiwało, by-li Marja Michałkowa wědźała, z kim móhli w Sakskej po wólbach krajneho sejma nowe knježerstwo zestajeć. Snano ma předsyda CDU Friedrich Merz w Berlinje někajki namjet. Sakski ministerski prezident Michael Kretschmer by dźakowny był. Tute swoje połoženje wšak je CDU sama zawinowała, dokelž je so z lutymi wohnjoškitnymi ­murjemi na prawym kaž tež lěwym boku politiskeho swěta zamurjowała. Zo budźe situacija po wólbach w Braniborskej přewidniša, njewěrju. Tež nowowólby, z kotrymiž je sakski ministerski prezident w padźe zwrěšćenja prócowanjow wo nowe knježerstwo hižo hrozył, njebychu politiske połoženje zasadnje změnili. Tuž měli drje wo tym rozmyslować, hač palne murje woprawdźe dale pomhaja.

Štóž do slepeje hasy wotboči, njetrjeba so dźiwać, zo dale njeńdźe. Štóž so zamurjuje, dyrbi z tym ličić, zo sedźi w ćmě. To njepomha sćerpnosć ale jenož zmužitosć, so wuswobodźić. Marko Wjeńka