To a tamne (16.09.24)
Krótki wulět z kwasnym awtom je so za młodeju mandźelskeju w policajskim awće skónčił. Zastojnicy dowjezechu porik wróćo na kwasnu žurlu. Nawoženja dyrbješe w hornjej Bayerskej tamneho awta dla nuznje zaborzdźić. Při tym suny so awto na mokrej dróze do přirowa. Nichtó so njezrani. Policija spěšnje pomhaše. Po puću k hosćinje zastojnicy při tankowni pozastachu a wudachu runje woženjenymaj blešku sekta.
Mylnje wotškrabali su rjedźerki a rjedźerjo w Kölnje sławnu twórbu znateho sprayera Haralda Naeglija. Poprawom dyrbješe firma za wotstronjenje wotpadkow ilegalny grafiti wotstronić. Při tej składnosći wurjedźichu tež susodnu popryskanu płoninu, njewědźo, zo jedna so wo sławnu twórbu. „Skelet“ Naeglija bě 1980 tohorunja ilegalnje nastał. Pozdźišo su grafiti jako wuměłstwo připóznali.
Serbska rada z ministrom rěčała
Rada za serbske naležnosće Sakskeje je so wčera posledni raz w starej zestawje w krajnym sejmje schadźowała. Na posedźenju je so tež kultusowy minister Christian Piwarz wobdźělił.
Drježdźany (SN). Kaž ze zdźělenki Juliana Nyče wuchadźa, bě kubłanje wospjet tema na wuradźowanju. Předsyda rady Marko Suchy rysowaše aktualnu situaciju serbskeho šulstwa a njedawny konflikt wo serbskej rjadowni na Radworskej zakładnej šuli. Kritisce načał je tohorunja problem, zo město koordinatora za serbske naležnosće w Budyskej wotnožce krajneho zarjada za šulu a kubłanje (LaSuB) po wotchadźe Bosćija Handrika na wuměnk přeco hišće wobsadźene njeje. Serbska rada bě hižo na słyšenju před zapósłancami krajneho sejma w nalěću 2023 na aktualne brachi serbskeho kubłanja skedźbniła.
Wolfgang Gerhardt zemrěł
Berlin (dpa/SN). Bywši předsyda FDP Wolfgang Gerhardt je njeboh. 80lětny je dźensa rano we Wiesbadenje zemrěł, předsyda FDP Christian Lindner w nadawku swójby zdźěli. Gerhardt bě swoju politisku karjeru w Hessenskej zahajił, hdźež bě mjez druhim minister za wědomosć. Předsyda FDP bě wón wot 1995 hač do 2001. Hač do 2006 bě wón frakciski předsyda strony w zwjazkowym sejmje. Po tym nawjedowaše wón załožbu Friedricha Naumanna.
Faeser reaguje skeptisce
Berlin (dpa/SN). Zwjazkowa nutřkowna ministerka Nancy Faeser (SPD) je zdźeržliwje na žadanje předsydy CDU Friedricha Merza reagowała, tři měsacy dołho při mjezach Němskeje wšitkich ćěkancow wotpokazać. Tole njeje po europskim prawje móžno, rjekny Faeser nowinarjam. Němska dyrbjała tež na to dźiwać, kak susodne kraje reaguja. Awstriska je připowědźiła, zo chcyła so postupowanju Němskeje spjećować.
Zawod za uran wopytał
Bamž Franciskus je swoju dwanaće dnjow trajacu wukrajnu jězbu ...
Wjetšina wo Scholza njerodźi
Berlin (dpa/SN). Dobrej dwě třećinje ludźi po najnowšim woprašowanju Olafa Scholza jako kanclerskeho kandidata SPD k wólbam zwjazkoweho sejma 2025 wotpokazujetej. We woprašowanju slědźenskeho instituta YouGov w nadawku nowin wupraji so 68 procentow přećiwo kandidaturje knježerstwoweho šefa Němskeje. 20 procentow by witało, hdyž by Scholz klětu jako kanclerski kandidat zaso nastupił.
Scholz bě minjeny kónc tydźenja najebać špatne wuslědki woprašowanjow potwjerdźił, zo chcył kandidować. Wón kruće z tym liči, zo dóstanje wón zhromadnje z SPD lěta 2025 „sylny mandat, z kotrymž móžemy tež nowe zwjazkowe knježerstwo nawjedować“.
Debata wo etaće 2025 zakónčena
Putin: To by charakter wójny změniło
Pětrohród (dpa/SN). Ruski prezident Wladimir Putin by zasadźenje daloko sahacych brónjow zapadnych krajow ze stron Ukrainy přećiwo objektam hłuboko w ruskim teritoriju jako wójnske wobdźělneje Nato wobhladował. „To by rěkało, zo wojuja kraje Nato, USA a europske kraje, z Ruskej“, rjekny Putin na prašenje žurnalista w statnej telewiziji w Pětrohrodźe. Putin rozłoži, zo by tole charakter wójny změniło. „Potom wotpowědnje rozsudźimy, wuchadźejo z wohroženjow, kotrymž smy z tym wustajeni.“
Ukraina sej hižo dlěje žada, daloko sahace rakety přećiwo Ruskej zasadźić směć, zo by ruske wojerske zepěranišća a wažne logistiske centry nadběhować móhła. Tole je jej dotal zakazane. Wonkowny minister USA Antony Blinken je na swojim wčerawšim wopyće we Waršawje rjekł, zo su USA zwólniwe, wojersku pomoc na dobro Ukrainy „po potrjebje přiměrić“. Jeho pólski kolega Radosław Sikorsky sej w tym zwisku cyle jasnje žadaše, wobmjezowanja zasadźenja daloko sahacych brónjow přećiwo Ruskej zběhnyć.
Nowe měritka stajił
Porjedźenka
Grjekska šwika němske kontrole
Athen (dpa/SN). Grjekski ministerski prezident Kyriakos Mitsotakis kritizuje rozsud zwjazkoweho knježerstwa, wot přichodneho tydźenja zaso kontrole při mjezach Němskeje přewjesć. Wotmołwa na njeregularnu migraciju njemóže być, Schengenske zrěčenje jednostronsce wotstronić, rjekny konserwatiwny politikar grjekskim rozhłosownikam. Taktiku bul na hrajnišćo druhich krajow ćisnyć, „njemóžemy tolerěrować“. Schengenski rum zmóžnja něhdźe 420 milionam ludźi w 29 krajach, swobodnje a bjez pomjeznych kontrolow mjez krajemi pućować.
Zwjazkowa nutřkowna ministerka Nancy Faeser (SPD) bě wukazała, wot přichodneje póndźele na wšitkich mjezach ludźi kontrolować. Potrjechene su Francoska, Danska, Belgiska, Nižozemska a Luxemburg. Při mjezach Awstriskeje, Pólskeje, Čěskeje a Šwicarskeje tajke kontrole hižo přewjeduja. W Schengenskim rumje njeje tole poprawom scyła předwidźane.
