Budyšin/Drježdźany (SN/MG). Jako „grawoćiwe“ pomjenuje sakski nutřkowny minister Armin Schuster (CDU) protesty prawicarjow poboku CSD w Budyšinje zašłu sobotu. W rozmołwje ze sćelakom Sachsen Fernsehen wón přida, zo bě nadawk policije zarjadowanja zawěsćić, wšako njebě demonstracija zakazana. Zdobom bě Schusterej wažne wuzběhować: „To njebě sakske zarjadowanje.“ Tole wón mjez druhim z argumentom wobtwjerdźowaše, zo přijědźechu mnozy prawicarscy demonstranća z druhich zwjazkowych krajow. W medijach pak so tute prawicarske protesty nětko zaso jako „typisce sakske“ pomjenuja.

Zo přichadźachu mnozy prawicarjo zwonka Sakskeje, na tym dwěluje sobuzarjadowar CSD Jonas Löschau. Platformje Focus online wón zdźěli, zo znaja woni prawicarjow z Budyšina a wokoliny a „wjacore stotki z nich běchu sobotu w Budyšinje.“ Wuprajenja Schustera wón jako „dospołnje zwjerćenje faktow“ šwika. Strach queerneje sceny w Budyšinje je dołho hižo napjata, wón doda.

Zelenskyj: Operacija w Kursku je naprawa wěstoty

Kijew (dpa/SN). Ukrainski prezident Wolodymyr Zelenskyj je ofensiwu swojeho wójska přez hranicu do zapado-ruskeho regiona Kursk jako wěstotnu naprawu pomjenował. Dotal zdobyte kónčiny su tam regiony, z kotrychž bě ruske wójsko wospjet wuchodo-ukrainski region Sumy nadpadnyło. Jeničce wot spočatka junija běchu tam něhdźe 2 100 nadpadow registrowali. „Tohodla su naše operacije ryzy wěstotne prašenje za Ukrainu, zo bychmy mjezu wot ruskeho wójska wuswobodźili“, praji Zelenskyj we swojej wječornej widejowej narěči.

Kursk ma symbol spočatka kónca ruskeho prezidenta Wladimira Putina być, praji Zelenskyj hladajo na katastrofu při podnurjenju najmodernišeho ruskeho atomoweho nurjaka „Kursk“. Tutón bě so w awgusće 2000 ze 118 mužemi wobsadki podnurił. „Před 24 lětami mějachmy Kursk-katastrofu, kotraž bě symboliski spočatk swojeho knjejstwa; nětko widźimy kónc tutoho knjejstwa – a znowa je Kursk symbol.“

„Awtu přiměrjene město“ běše wizija 60tych lět zašłeho lětstotka. Zwrěšćiła je na tym, zo w centrumje městow za awto kóždeho wobydlerja a wopytowarja městno njeje, hdyž nimale kóždy awto ma. Darmotne parkowanišća, kaž sej FDP nětk žada, nikomu njepomhaja, dokelž budźe jich tak a tak přemało. Nimo toho přisporja so z tym to, štož nětko hižo města najbóle wobćežuje: wobchad tych, kotřiž za parkowanišćom pytaja. Haj wšak, we wuchodźe Němskeje mamy specielny problem: Po přewróće su wšudźe před wrotami městow hoberskim nakupowanišćam přizwolili, hdźež steji dosć darmotnych parkowanišćow k dispoziciji. Z tym města konkurować njemóža, njech wone hinaše sylne stronki wuwiwaja: naměsta za bjesadu, kulturu a kofejpiće z přećelemi. To tyje tež přijomnemu nakupowanju z cyłej swójbu a wobchodam. Wězo je přeco wuwzaćow za zbrašenych a kiprych ludźi trěbnych, ale žana pawšalna „swoboda“, kotraž žana njeje. Marcel Brauman

Dźakujemy so čitarjej Tadejej Šimanej za tónle pokiw k wčerawšej rubrice „Nabožina dźensa“: „Rjad Dominikanow eksistuje hakle wot spočatk 13. lětstotka. Domi­nikanojo wuznamneho instituta EBAF w Jerusalemje drje w Gazy archeologisce skutkuja, ale klóšter tam w 4. lětstotku ­załožili njejsu.“ SN