Wojerecy (SN/CoR). Po lětach lutowanja chce kulturny konwent Hornja Łužica-Delnja Šleska klětu zaso wjac pjenjez wudać. Tak ma minjeny štwórtk wobzamknjeny etat za lěto 2018 z dohromady nimale­ 18 milionami eurow něhdźe 385 000 eurow wjace hač lětuši. „Ramik je přeco hišće wuski, chcemy pak přichodnje z financneje rezerwy krok po kroku spěchowanje zwyšić“, rozłoži kulturny sekretar Joachim Mühle. Wosebje łužiske hudźbne šule chcedźa bóle podpěrać. Wone dóstanu klětu 200 000 eurow wjace. Tež Wojerowski Kompjuterowy muzej Zuse­ (ZCOM) profituje z noweje financneje politiki kulturneho konwenta. Instituciju spěchuja wot klětušeho z 65 000 eurami. Čłonojo konwenta běchu sej we wobłuku tam so wotměwaceho posedźenja wustajenišćo ZCOM wobhladali, „a woni běchu zahorjeni, što su tule wot załoženja w lěće 1995 natwarili“, měni Joachim Mühle.­ Z dalšimi přidatnymi srědkami chce konwent projekty spěchować.

Štó budźe nowy intendant abo intendantka Serbskeho ludoweho ansambla? Tomule prašenju wěnowachu so wčera čłonojo załožboweje rady na wurjadnym posedźenju w Choćebuskim Serbskim domje.

Choćebuz (SN/CoR). „Załožbowa rada je so na swojim dźensnišim wurjadnym posedźenju w Choćebuzu za kandidata k wobsadźenju městna intendancy Serbskeho ludoweho ansambla rozsudźiła“, tak rěka prěnja sada wčera wječor došłeje medijoweje zdźělenki Załožby za serbski lud. Štó pak wosoba je, to z informacije njewuchadźa, dokelž je so gremiji rozsudźił, zjawnosć hakle informować, hdyž je proces wobsadźenja woprawdźe zakónčeny a přez zrěčenje wopodstatnjeny. „Rozsud je hakle prěni krok jednanja“, rožłoži direktor serbskeje załožby Jan Budar. Wón dósta wčera nadawk, po móžnosći hač do nazymskeho posedźenja załožboweje rady 30. nowembra w Budyšinje jednanja k wotzamknjenju wotpowědneho zrěčenja zakónčić. Hakle po tym ma so mjeno noweho abo noweje nawody respektiwnje nawodnicy wozjewić.