Medijowy dorost wćipny
Prózdninske seminary skića wobšěrne zeznajomjenje z rozhłosom
Budyšin (SN/bn). Lětuša „II. šulerska akademija medije“ Sakskeho wukubłanskeho a wupruwowanskeho kanala (SAEK) a Serbskeho rozhłosa w Budyšinje je so minjenu póndźelu zahajiła a traje hišće hač do jutřišeho pjatka. Mjez přerěznje 15 wobdźělnikami – k jednotliwym seminaram so raz wjace, raz mjenje zajimcow přizjewja – je nimale cyła redakcija młodźinskeho Radija Satkula, za kotruž je zarjadowanje zdobom tajke něšto kaž dalekubłanje.
Póndźelu rozłoži nawoda Budyskeho studija SAEK Michał Cyž zajimcam zakłady medijoweho prawa. Po tym přednošowaše Maik Scheffler na temu „Prawo a prawicarstwo“.
Wotkrywa sej „swój“ swět
Katka Krygarjec je w aktualnej hrajnej dobje dalša elewka w činohrajnym studiju Budyskeho Němsko-Serbskeho ludoweho dźiwadła. Kaž lětsa tohorunja w dorostowej kowarni skutkowaca Katka Pöpelec bě tež wona w zašłych lětach čłonka młodźinskeho dźiwadła NSLDź a w inscenacijomaj „Wokomik prošu!“ a „Crux abo Zbóžnik pod łožom“ widźeć.
Zakład syće wědomosćow wo mjeńšinach
Budyšin (SN/bn). Pod hesłom „Mjeńšiny a rum“ přeprosy Budyski Serbski institut minjeny pjatk na zahajensku dźěłarničku za wutworjenje syće „Historiske mjeńšinowe slědźenja“. Cyłkownje wobdźěli so 15 historikarjow, politologow, sociologow kaž tež zajimcow, mjez druhim z Podstupima, Lipska a Wiena, na zakładnej wuměnje słužacym zarjadowanju. Dr. Pětš Šurman witaše přitomnych a wuzběhny bórzomnu 25. róčnicu nowozałoženja Serbskeho instituta. „Zhladujemy na wědomostnje produktiwnu dobu,“ wón rjekny, „jubilej je nam składnosć, wulki zajim na polu stawizniskeho slědźenja z minoritnym ćežišćom přez wutworjenje syće konstruktiwnje koordinować.“ Na to nawjazujo rozłoži Friedrich Pollack, jedyn z iniciatorow projekta, nastawacy „nowy komunikaciski forum, z kotrymž chcemy naš wobłuk sylnišo profilować“. Do diskusije, kak hodźeli so tele naroki najlěpje přesadźić, pokazachu štyrjo referenća na zakładźe přednoškow na móžne wědomostne temy foruma, runje tak pak na trěbnosć, interdisciplinarnje nałožujomne definicije wuwiwać.
„Z Francompo swěće“
Witajće do swěta Serbow!
Nowu antologiju „Mlóče“ předstajili
Budyšin (SN/bn). Něhdźe 30 wopytowarjow je wčera knižnu premjeru noweje, w Ludowym nakładnistwje Budyšin wušłeje antologije „Mlóče“ w Budyskej Smolerjec kniharni dožiwiło. Wjednica kniharnje Anett Šołćic a lektor zběrki Pětr Thiemann stej zajimcow a wšitkich za zwoprawdźenje knihi zamołwitych witałoj a wěnowaštaj prezentaciju minjenu njedźelu zemrětemu Kitej Lorencej.
Jednaćelka LND Marka Maćijowa dźakowaše so na to awtorkam a awtoram, lektorej a wuhotowarce Iris Brankačkowej a přepoda wudawaćelce Ingrid Juršikowej prěni eksemplar knihi.
Prěnje tydźenje na wulkim jewišću
Katka Pöpelec je w aktualnej hrajnej dobje Němsko-Serbskeho ludoweho dźiwadła jedna z dweju elewkow činohrajneho studija Budyskeho NSLDź.
„Sym hižo w Chróšćanskej šulerskej skupinje dźiwadźeliła. Tohodla njebě za mnje pozdźišo na Budyskim Serbskim gymnaziju scyła prašenje, hač so na castingu młodźinskeho dźiwadła wobdźělu“, rozjimuje Katka Pöpelec swój puć na jewišćo. Dožiwjenja prěnjeho wotrězka jako hrajerka z wjerškomaj předstajenjow improwizacije „Wokomik prošu!“ a krucha „Crux abo Zbóžnik pod łožom“ Hanki Jenčec běštej jej runje tak pohon, so činohrajnemu studiju a tak powołanskemu jewišću přizamknyć, kaž poručenja přećelow a bywšich elewow.
Mjeztym je wona hižo 13 króć titulnu – a jeničku – rólu w hrě „Čmjeła Hana chce pomhać“ hrała. „Tele předstajenja su mi wulke wjeselo. Hra sama žada sej fleksibelnosć, wšako su nazhonjenja dźěći ze serbšćinu, kotrež sej ju wobhladuja, rozdźělne. Zwjetša pak na mjezwočach spóznawam, hač mje rozumja abo nic. Potom dyrbju reagować. Ćežko je, knježi-li w publikumje njeměr, to pak dotal přehusto njemějachmy“, Katka rozłožuje.
Na knižnu premjeru w Budyšinje
Nowa antologija serbskeje prozy „Mlóče“ je wotnětka w krutej wjazbje na předań. Mjez dwaceći awtorami je młode pjero runje tak sylnje zastupjene kaž starše. Knižna premjera ze zjawnym čitanjom budźe jutře, štwórtk, w Budyskej Smolerjec kniharni.
Budyšin (SN/bn). Nowa zběrka powědančkow „Mlóče“, wušła w Ludowym nakładnistwje Domowina, budźe jutře wječor w Budyskej Smolarjec kniharni předstajena. Cyłkownje dwaceći pisacych je w njej zastupjenych, mjez nimi Beno Budar, Jěwa-Marja Čornakec, Benedikt Dyrlich, Jurij Koch, Měrana Cušcyna, Křesćan Krawc. Monika Dyrlichowa, Alfons Wićaz, Dušan Hajduk-Veljković, Měrka Mětowa, Dorothea Šołćina a Róža Domašcyna. Njewočakowano je zběrka zdobom tež rozžohnowanje z jednym z najproduktiwnišich a najwliwapołnišich serbskich tworićelow Kitom Lorencom, kiž je njedźelu na prawdu Božu wotešoł.
Chórowa hudźba w nimale intimnym ramiku
Budyšin (SN/bn). Na žurli Budyskeho Serbskeho muzeja zaklinčachu minjeny pjatk wječor „Mišterske twórby chóroweje hudźby“. Pod nawodom Andreasa Pabsta zanjese chór Serbskeho ludoweho ansambla kompozicije ze štyrjoch lětstotkow.
„Ubi caritas“ Mauricea Durufléja, zaspěwane za chribjetom připosłucharjow, tworješe zazběh prěnjeho dźěla koncerta, w kotrymž přeswědči chór z duchownymi twórbami baroka, romantiki a ekspresionizma. „Credo“ z „Božeje mšě za dwójny chór“ Franka Martina bě wjeršk. Byrnjež kruch za znajmjeńša 80 sobuskutkowacych koncipowany był, su spěwarki a spěwarjo přewšo naročnu partituru kedźbyhódnje zmištrowali, byrnjež w přednošku snano trochu přespěšnje.
