Wittenberg (SN/at). Kulturnemu skutkowanju reformacije wěnowana bě tydźenska konferenca we Wittenbergu. Zarjadowana wot tamnišeje załožby LEUCOREA so wona dźensa kónči. Mjez wědomostnikami ze wšeho swěta, kiž su w jědnaće sekcijach přednošowali, bě tež Serbowka.

Na temu „Reformacija a Serbja. Spisana rěč – alfabetizowanje – pluralizowanje“ referowaše dr. Lubina Malinkowa minjenu wutoru w sekciji „Protestantiske mjeńšiny w polu napjatosćow politiskich, socialnych a hospodarskich změnow“. Kaž wona tam wuwjedźe, nasta z wukubłanjom serbskich duchownych serbska kubłanska elita. Spočatnje bě so katolsko-protestantiska­ konkurenca płód­nje na wuwiće serbskeje spisowneje kultury wuskutkowała, tule funkciju pak přewza we 18. lětostotku pietizm. Tón bytotstnje k alfabetizowanju a nutřkownemu pluralizowanju ewangelskich Serbow přinošowaše.

Lubina Malinkowa waži sej globalny narok zarjadowanja, skedźbnjo na wobdźělnikow z Indiskeje a Brazilskeje.

Wojerecy (SN/MiR). Nawoda Wojerowskeho ewangelskeho gymnazija Johanneum Günter Kiefer witaše dźensa rano serbskich, němskich, čěskich a syriskich basnikow a hudźbnikow kaž tež šulerjow a wučerjow na „Dźeń poezije a swobodneho słowa“. „Słowa su mosty, tuž so wjeselu, zo chce wulka ličba spisowaćelow z našimi šulerjemi do rozmołwy přińć. Wšako ludźom dźensa husto tele mosty słowa pobrachuja“, tak Günter Kiefer.

Zwrěšćenje lětušeho 39. swjedźenja serbskeje poezije wunjese žiwe a zajimawe zarjadowanje za młodostnych Johanneuma. Wojerowske wuměłstwowe towarstwo, kotrež zhladuje na lětdźesatki trajace styki k serbskim wuměłcam, je zhromadnje z němskim PEN-klubom zetkanje awtorow a šulerjow zmóžniło. „Smy jara zbožowni, zo mamy we Łužicy narodaj, kotrajž dwurěčne a bikulturne žiwjenje w tymle regionje wobohaćujetaj. To chcemy dźěćom a młodostnym na wšelke wašnje posrědkować“, rjekny předsyda Wojerowskeho wuměłstwo­­weho towarstwa a přećel Serbow Martin Schmidt.

Dypkownje k spočatkej šulskeho lěta w Sakskej bu powěsć wo nowowudaću Dudena wozjewjena. 237 lět je zašło, po tym zo bě Konrad Duden swój „Vollständiges Orthographisches Wörterbuch der deutschen Sprache“ wudał. Traješe 21 lět, doniž so 1901 w Němskej a Rakusko-Madźarskej na zawjedźenje Dudenoweho prawopisa njedojednachu, z ćimž bu jeho słownik standardne dźěło na polu němskeje rěče. Wot předwčerawšeho móžeće sej kupić jeho 27. nakład, kotryž je rozrostł na 145 000 hesłow; při tym bu słowoskład w zašłych nakładach stajnje wo přerěznje 5 000 hesłow powjetšeny. Porno tomu je ličba šmórnjenych hesłow – zwjetša prawopisnych wariantow a nowych słowow, kotrež so w praksy přesadźili njejsu – poměrnje snadna.

„Kaltland. Unter Syrern und Deutschen“ rěka kniha Berlinskeje žurnalistki Jasny Zajček, kotraž bě spočatk lěta 2016 štyri měsacy w Budyskim Sprjewinym hotelu požadarjam azyla němčinu podawała. Socialna reportaža je lětsa w nakładnistwje Droemer wušła. Połchorwatka je islamske wědomosće studowała a bu hižo za undercover-reportažu wo přihotach ameriskich wo­jakow za Afghanistan wuznamjenjena. Cordula Ratajczakowa je so z Jasnu Zajček rozmołwjała.

Dožiwjenja w Sakskej drje njejsu Was tak wottrašeli. Wšako runje wo tym rozmyslujeće do Zhorjelca přećahnyć?