Wot lěta 2012 ma Němsko-Serbske ludowe dźiwadło Budyšin krute městno za serbsku dźiwadłowu pedagogowku, kotrež Załožba za serbski lud kóžde lěto dźělnje spěchuje. Wot meje tohole lěta skutkuje Judit Čornakowa z Chrósćic na tymle městnje. Studowana socialna pedagogowka bě do poroda swojeju dźěsći w Njebjelčanskej pěstowarni dźěłała, wot minjeneho lěta jako fachowa poradźowarka za pěstowarnje w Křesćansko-socialnym kubłanskim skutku. Cyle spokojom wšak tam njebě – ćim bóle to nětko je: „Mi so tu w NSLDź jara lubi. Je to dźěło połne pozitiwnych nazhonjenjow, zabawne a dosć čiłe. Móžu samostatnje dźěłać, mam pak tež team, z kotrymž móžu hromadźe kreatiwnje něšto wuwiwać a w kotrymž hodźa so nadawki rozdźělić. W swojim běrowje sym jara zrědka, je dźě nětko telko jewišćow za mnje“, so 30lětna směje.

Zo změje serbske dźiwadło přeco wjele wopytowarjow, přeje sej nowa serbska dźiwadłowa pedagogowka NSLDź Judit Čornakowa. Njecyłych 5 000 ludźi, inkluziwnje dźěći, je sej w minjenej hrajnej dobje wobhladało, što serbscy profesionelni dźiwadźelnicy na jewišću předstajeja. Hladajo na dohromady 150 000 přihladowarjow su to 0,03 procenty – podźěl serbskich na powšitkownych zarjadowanjach NSLDź pak je z 0,08 procentami nimale trójce tak wulki. Přerěznje tysac přihladowarjow měješe minjene lěta přeco hłowna serbska inscenacija – jenož hra „Chodźić po rukomaj“ wo Alojsu Andrickim w sezonje 2013/2014 je 50 procentow wjace přiwabiła. Jenož na nabožnej tematice to zaležeć njemóže, wšako su žurle tež połne, hdyž lajske dźiwadła hraja. Přeju sej, zo smědźa w přichodnej sezonje tež profesionalni hrajerjo jónu połnu žurlu dožiwić, hdyž serbske kruchi předstajeja. Cordula Ratajczakowa

We wobłuku spěchowanskeje iniciatiwy sakskeho ministerstwa za wědomosć a wuměłstwo koordinuje Sakska akademija wědomosćow Lipsk projekt „Wirtualne archiwy za duchownowědne slědźenja“, na kotrymž so nimo Instituta Hannyh Arendt za slědźenje wo totalitarizmje, Instituta za sakske stawizny a ludowěda, Simona Dubnoweho instituta za židowske stawizny a kulturu tež Serbski institut wobdźěla.

Lipsk/Budyšin (SN/CoR). Stawiznopis Serbow za čas mjez wójnomaj ma tež dźensa hišće mnohe běłe blaki. Nowy slědźenski projekt na Serbskim instituće ma tomu słužić, za wažnymi žórłami a dokumentami z časa Weimarskeje republiki a nacionalsocializma w archiwach rešeršować a je digitalizować. „Smy so w měrcu relatiwnje spontanje rozsudźili, so na wupisanju projekta wobdźělić. Wjeselimy so, zo je so poradźiło w Serbskim instituće dwě přidatnej projektowej městnje za to wutworić“, praji sobudźěłaćer slědźenišća dr. des. Friedrich Pollack, kiž je próstwu sobu zdźěłał.

Choćebuz (SN/CoR). „K małemu jubilejej je Choćebuski filmowy festiwal swoju 15. přehladku tróšku wobnowił – to pak z wupruwowanym zaměrom, regionalnym talentam a kreatiwnym hłójčkam zmóžnić swoje filmy na wulkej płachće předstajić“, rozłožuje jednaćel Choćebuskeho filmoweho festiwala Andreas Stein. Tak zdobychu łužiskeho filmowca Erika Schieska jako noweho kuratora a koordinatora. Teritorij wubědźowanja su nětko na Delnju a Hornju Łužicu wobmjezowali. Budu tež změny we wotběhu zarjadowanja a lěpše wabjenje. Schiesko stara so tuchwilu wo to, z małej dźesaćtydźenskej seriju filmowu přehladku znaćišu sčinić. Pod hesłom „Natočiš hižo swójski film?“ su mjeztym prěnje tři filmowe přinoški na festiwalnych Facebook- a Youtube-kanalach zjawnosći přistupne, třeći pod titulom „Drama ćěkancow“ wozjewichu tam hakle před štyrjomi dnjemi. Z ironiju a humorom hladaja w přinoškach na dźěło a problemy filmoweho mustwa – wosebje „režisera“ Schieska –, kotrež spyta w Choćebuzu normalnych pasantow jako akterow zdobyć.