Prjedy hač móžachu lětsa na Budyskim hrodźe scyła ze spektaklom lětnjeho dźiwa­dła NSLDź wo Olsenowej cwólbje započeć, bě wjele předdźěłow trěbnych. Lětsa su tam prěni króć dwě trawersy natwarili a to napřećo sebi, štož so wjetšinje ludźi lubi. W programowym zešiwku so dźiwadło firmam, institucijam, zarjadam a jednotliwcam za přećelnu podpěru 21. Budyskeho lětnjeho dźiwadła dźakuje. Zajimawe su tohorunja w zešiwku jako ABC napisane wudma Egona Olsena, kaž „grawoćiwi amaterojo“ a „žałostni započatkarjo“.

Dotal žane předstajenje Budyskeho lětnjeho dźiwadła wjedra dla njewupadnyło

Budyšin (SN/mwe). Wothłós lětušeho lětnjeho dźiwadła NSLDź, kotrež pokazuje hač do 17. julija na Budyskim hrodźe „Olsenowu cwólbu“, je zwjetša přemó­žacy. Kóžde ze 37 předstajenjow – zapřijatej stej hižo přidatnej dwě – je wupředate, a lubowarjo spektakla přijědu samo z Drježdźan do Budyšina. Za wšěch akterow, hač před abo za kulisami, je kóžde jednotliwe wulke wužadane. Hladajo na pensum tež fyziskich narokow du akterojo hač na hranicy swojich mocow. Wšako chce publikum najlěpše hrajerske wukony widźeć, a wšitko dyrbi kaž na štryčku běžeć. Pod hołym njebjom je dźě to cyle hinak hač nutřka w dźiwadle.

Chcedźa serbski wědomostny dorost spěchować

Drježdźany/Budyšin (SN/CoR). Spočatk julija je na Drježdźanskej techniskej uniwersiće (TU) wosebity projekt pod hesłom „SorbenWissen“ z něhdźe dźesać sobuskutkowacymi zaběžał. Projekt nawjeduje prof. dr. Christian Prunitsch z Instituta­ za slawistiku na TU. Dalšej part­neraj staj profesor za nałožowanu lingu­istiku dr. Joachim Scharloth a Serbski institut pod nawodom přechodneho direktora dr. Hauke Bartelsa. Wothladajo wot wobsaha ma so z předewzaćom w prěnim rjedźe wědomostny – a tule wosebje serbski – dorost spěchować. Wšako je wone spěchowane přez sakske ministerstwo za wědomosć a wuměłstwo wot Europskeho socialneho fondsa (ESF), kotryž je na kwalifikowanje wědomostneho dorosta wusměrjeny.