Kamjenc (SN/bn). Pod hesłom „Ochranow a naš wobraz wo swěće“ je germanist a linguist prof. Alexander Lasch z Techniskeje uniwersity Drježdźany wčera we wobłuku lětsa pjateho zarjadowanja rjadu „Słowa a běłe wino“ z přednoškom w Kamjenskej měšćanskej bibliotece „G. E. Lessing“ aktualny staw přeslědźenja archiwow Ochranowskeje bratrowskeje jednoty zjimał. Předsyda hosćićelskeho Spěchowanskeho towarstwa knihownje dr. Wolfgang Melzer powita něhdźe 60 zajimcow a předstaji jim wědomostnika wuzběhnywši, zo je so „po dwě lěće trajacych přihotach zešlachćiło, tónle referat skónčnje tu poskićić móc“.

Spočatk měsaca je znajer Pólskeje a wupokazany historikar wuchodneje Europy prof. dr. Eduard Mühle zastojnstwo prezidenta Europskeje uniwersity ­Viadriny w Frankfurće nad Wódru nastupił. Na zazběhu lětnjeho semestra je so wón krótko do jutrow nowinarjam na městnje skutkowanja předstajił.

Frankfurt nad Wódru (RD/SN). Prof. Eduard Mühle waži sej Viadrinu jako „wosebitu uniwersitu na tymle wosebitym městnje“. Wón chce sobu za to skutkować, zo wona „jako městnosć atraktiwneje wučby, inowatiwneho slědźenja, mjezynarodneje kooperacije a za towaršnosć relewantnych transferow hišće widźomnišo a skutkownišo akademisko-wědomostnje k tomu přinošuje, aktualne krizy a předstejace nadawki přichoda zmištrować“. Wobšěrniše přemyslowanja k tomu, kaž wón rjekny, „runje tak napjatemu a wužadowacemu nadawkej“ chce wón 27. apryla w zjawnej nastupnej narěči na swjedźenskim akće składnostnje přewzaća zastojnstwa wozjewić.

Budyšin (SN/bn). „Dźensniši wječor je Kitej Lorencej wěnowany, kiž bě towarstwu Přećeljo Smolerjec kniharnje wjele lět předsydarił.“ Z tymle słowami zahaji wčera Měrana Cušcyna w mjenje hosćićelskeho zjednoćenstwa prezentaciju zběrki „Es war nicht die Zeit“ w połnje wobsadźenym serbskim předawanišću knihow w Budyšinje. Antologija bu njedawno we wobłuku renoměrowaneho rjadu „Edition Petrarca“ wot nakładnistwa Wallstein wudata a wopřijima mjez druhim dotal njewozjewjenu lyriku kaž tež němske přebasnjenja serbskich, w zběrce „Zymny kut“ publikowanych basnjow Lorenca.