Spožča Myto Domowiny
Budyšin. Dr. Karlej Kowalewskemu, Margot Hašcynej, Manfredej Hermašej a Dieterej Wendischej spožča lětsa Myto Domowiny. To zdźěli wčera mytowanski wuběrk. Swjedźenske zarjadowanje budźe 13. oktobra w Budyskim Serbskim domje.
Młodostni za projekt počesćeni
Lubij/Berlin. Angažowanych młodostnych z Lubija počesćichu w Berlinje z mytom „CHILDREN Jugend hilft!“. Woni běchu so z projektom „3eck Soccer“ přećiwo mnohim dalšim požadarjam přesadźili. Mandźelska zwjazkoweho prezidenta Franka-Waltera Steinmeiera Elke Büdenbender je jich njedźelu na hrodźe Bellevue přijała. Tamne dny swojeho přebytka wobdźělichu so młodostni na wšelkich dźěłarničkach.
Serbske plakaty zničene
Budyšin. Kandidatka strony SPD za zwjazkowy sejm dr. Uta Strewe wobžaruje zaměrne ničenje serbskich wólbnych plakatow. Wona pak tež wobkedźbuje, zo so nimo serbskich wosebje plakaty socialdemokratow potorhaja, tak zo dyrbjachu je we Wjazońcy, Póckowach, Zemicach-Tumicach, Kulowje, Budyšinje a Wojerecach wuměnić.
Lětsa na Młynkec łuce
Radwor (SN/MiR). 114 šulerjow 4. lětnika je so wčera dopołdnja w Radworju ze serbskej rěču zaběrało. Mjez nimi běchu 53 šulerjow z tamnišeje zakładneje šule „Dr. Marja Grólmusec“. Dalši běchu z Barta, Bošec, Bukec, Wojerec, Slepoho a Wulkeje Dubrawy, hdźež wuknu serbšćinu jako cuzu rěč. Na Swjedźeń serbskeje rěče přeprosył bě znowa Rěčny centrum WITAJ. Budyska župa „Jan Arnošt Smoler“ projekt, kotryž so mjeztym wospjet w Radworju wotmě, podpěruje. „Nam je wažne, zo nazhonja runje šulerjo, kotřiž maćernorěčneho pochada njejsu, nowe serbskorěčne rumy“, wuswětli zamołwita za management rěčnych projektow pola RCW Weronika Butendeichowa.
Budyšin (SN/MiR). Lětuša druha fachowa konferenca 2plus zahaji so 20. oktobra ze staršiskim wječorkom. Tónle wječork je konkluzija z lońšeho prěnjeho fachoweho dnja Sakskeho statneho ministerstwa za kultus, kotrehož partner je Rěčny centrum WITAJ Budyšin. „Z tymle zarjadowanjom zwoprawdźimy nětko dopóznaća z lońšeho prěnjeho fachoweho dnja“, rozłožuje Bosćij Handrik, koordinator za serbske naležnosće, z Budyskeho regionalneho zarjada Sakskeje kubłanskeje agentury. Wón bě loni we wobłuku dźěłarničkow nawjedował kruh za staršich. Woni běchu mnohe starosće zwuraznili, mjez druhim tu, kak móža swoje dźěći při wuknjenju serbšćiny lěpje podpěrać. „Při wuhódnoćenju zwěsćichmy, kak wažne je, staršim dać swójski rum k dalekubłanju a diskusiji. Tak smy lětsa wosebity programowy dypk za nich do koncepta fachoweho dnja 2plus zapřijeli“, Bosćij Handrik wuzběhnje. Na předwječoru fachoweje konferency wěnuje so prof. Oliver Meyer z Mainza temje „Wuznam staršich při dwu- a wjacerěčnym kubłanju“.
Budyšin (SN/at). Z wužiwanjom serbskeje rěče w dźěławosći wokrjesneho zarjadnistwa je so dźěłowy kruh za serbske naležnosće Budyskeho wokrjesa zawčerawšim znowa zaběrał. Kaž wokrjesna społnomócnjena Regina Krawcowa zdźěli, mějachu čłonojo gremija na zakładźe lońšeho zetkanja jasne prašenja. Nawodnica běrowa krajneho rady Uta Döring rysowaše, kak na přikład na serbskosć w nadpismach na lětakach a hamtskim łopjenu dźiwaja, a zo su ryzy serbskorěčny flajer za wukubłanje kubłarkow/kubłarjow wudali. Za medijowy wobłuk – nowiny, internet – chcedźa ramikowe wobstejnosće w nowinarskim běrowje polěpšić. Wjetšina dwurěčnych popisanjow na zjawnych twarjenjach ma kónc lěta zwoprawdźena być, rozłoži nawoda wobchodniskeho wobłuka 1 krajnoradneho zarjada Udo Wićaz. Wón chce tež dalšich posłužbarjow w zjawnosći k dwurěčnemu popisanju pohnuć.
Regina Krawcowa serbskich wobydlerjow znowa namołwi, „wužiwać prawo serbskorěčneje komunikacije, hač ertneje abo pisomneje, na zjawnych zarjadach serbskeho sydlenskeho ruma“.
Wo přichod Němskeje so wón starosći, rjeknje Andreas Lutz Richter. Jako wěcywustojny za wozydła a pruwowanski inženjer znaje wón strachi małych ludźi. Někotremužkuli, kiž pruwowanje za jězbnu dowolnosć njewobsteji abo kotrehož awto hłowne přepytowanje njepřetraje, pobrachuja pjenjezy za druhi pospyt. Tež wo tych dyrbimy so starać, wón praji. 56lětny požada so we wólbnym wokrjesu 156 Budyšin I jako njewotwisny wobydlerski kandidat za mandat w zwjazkowym sejmje. Při tym podpěruja Smělnjana ludźo z domizniskeje wsy, hdźež hižo 23 lět bydli, kaž tež z powołanskeho wobłuka. Za kandidaturu trjebaše 200 podpismow, 203 je dóstał.
Mnichow (dpa/SN). Tak mjenowana financna kontrola ilegalneho dźěła cła je lětsa w prěnim połlěće 2 433 přeńdźenjow přećiwo minimalnej mzdy registrowała. Tole rozprawja dźensa nowina Süddeutsche Zeitung. Zastupjerjo Zwjazka 90/Zelenych su so pola financneho ministerstwa wobhonili. Loni běchu cłownicy w prěnich šěsć měsacach 1 711 padow registrowali, při čimž bu 19 564 dźěłodawarjow přepruwowanych. Lětsa su cłownicy cyłkownje 27 323 dźěłodawarjow w běhu poł lěta kontrolowali.
Rozsudźa wo Air Berlinje
Berlin (dpa/SN). Hižo dźensa móhł rozsud wo předaću insolwentneho lětanskeho předewzaća Air Berlin na inwestorow padnyć. Tři wěrićelske wuběrki třěšneho koncerna, němskeje towaršnosće zwr a technikoweje sparty chcedźa so po informacijach z kruhow branšy k wuradźowanjam zetkać. Zašły pjatk je so poskićerska faza zakónčiła. Doskónčny rozsud pak budźe přichodnu póndźelu wozjewjeny.
Wot dźensnišeho nałožuja Ceta