Aus der aktuellen Ausgabe vom Donnerstag, 18 Januar 2018

Pjenjezy za labyrint

Mały Wjelkow. W Małowjelkowskim prazwěrjencu ma nowy domčk před błudźišćom nastać. Dotalny bě so 8. januara wotpalił. Mjeztym je 60 darićelow mě­jićelce 2 000 eurow přewostajiło. Škoda pak wučinja 40 000 eurow. Ludźo, kotřiž chcedźa pomhać, móža to na Facebooku. Tam je składnosć, hač do kónca měrca pjenjezy přepokazać.

Wudźělatej kalendry

Smjerdźaca. Kubłanska referentka Domowiny Rejzka Krügerowa a socialna dźěłaćerka Rěčneho centruma WITAJ Marija Koklina rozdźělatej tuchwilu nasćěnowu protyku za młodostnych. Mjeztym pobyštej wonej we wosom młodźinskich klubach. Kónc januara chcetej je dalšim sydom klubam dać. Kalender, wopřijacy wosebje terminy za młodostnych, ma nakład 200 eksemplarow.

Problem moderacije dla

Wuznaće k serbskosći je Wojerecam jara wažne

Wojerecy (SN/JaW). Město Wojerecy chce podźěl serbskosće na swojich internetnych stronach sylnje powjetšić. To připowědźi zamołwita za serbske naležnosće města Gabriela Linakowa na naprašowanje. „Wu­znaće k serbskim korjenjam města, widźomna serbskosć we nim a zo ma serbska­ rěč w prezentacijach swoje městno, je wyšemu měšćanosće Stefanej Skorje,­ měšćanskej radźe kaž tež za­rjadnistwu města Wojerec jara wažne. Zhromadnje­ za tym stejimy a polěpšimy serbski­ podźěl na nowych stronach“, podšmórny Linakowa w rozmołwje z SN.

Wojerecy/Budyšin (SN/MiR). Lětuše cyłoněmske wubědźowanje „Młodźina hudźi“ wotměje so w meji w Lübecku. Mjeztym maja najlěpši z jednotliwych hudźbnych šulow mandat za regionalne wurisanja. Tajke wotměje so mjez druhim 27. a 28. januara we Wojerecach. Swoje wukony předstaja hudźbnicy a spěwarjo w tamnišej hudźbnej šuli kaž tež na Lessingowym gymnaziju. Nimale sto młodych wirtuozow je přizjewjenych. Mjez nimi su štyrcećo z Budyskeje wokrjesneje hudźbneje šule, sedmjo z regionalneho stejnišća Kamjenc a 33 z Budyskeho. „Zwotkel wobdźělnicy dokładnje pochadźeja a hač su serbskeho pochada, njemóžemy datoškitnych naprawow dla zdźělić“, praji zamołwita za zjawnostne dźěło Budyskeje wokrjesneje hudźbneje šule Margitta Luttner. Tak tež znate njeje, z kotrych šulow dźěći a młodostni su.

Wojerecy (SN/JaW). Aktualny naćisk koncepta za konferencu wo strukturnym wuwiću Łužicy, kotruž chce Domowina w septembrje přewjesć, běše jedne ćežišćo wčerawšeho wuradźowanja prezidija Zwjazkoweho předsydstwa Domowiny we Wojerecach. „Chcemy zhromadnje z wokrjesami a łužiskej iniciatiwu dwu­dnjowsku konferencu přewjesć. Ćežišćo ma być serbsku specifiku při strukturnym wuwiću Łužicy wopisać a do hospodarskeho wuwića zapřijeć, kaž na přikład hódnotu serbšćiny“ rjekny předsyda Domowiny Dawid Statnik na naprašowanje našeho wječornika.

Młodźinski aktiw Domowinskeje župy Delnja Łužica koordinuje aktiwity młodych Domowinjanow, na kotrychž wobdźěleja so runje tak dalši młodostni z městow a wsow. Lětuše ćežišća su tradicionalnej nałožkaj zapust a łapanje/zabiwanje kokota, koparski a volleyballowy turněr a kónclětne zarjadowanje z kehelowanjom w Rogowje.

Choćebuz (HA/SN). Podźěl Domowinjanow w młodźinskej starobje w župje Delnja­ Łužica je nahladny. Mjez něhdźe 40 skupinami a 25 towarstwami je tuchwilu dźewjeć młodźinskich z nimale 400 sobustawami. Wosebje w towarstwach a zjednoćenstwach su młodźi ludźo sylnje zastupjeni. Župa so tež pró­cuje, młodych čłonow a runje tak dalšich młodostnych na němsko-serbskich wsach do dźěła zapřijeć. Wo to stara so přede­wšěm župny młodźinski aktiw.

Drježdźany (SN/JaW). Swobodny stat Sakska je hospodarske lěto 2017 z do­bytkom zakónčił. To wujewja nachwilne wotličenje financneho ministerstwa, kotrež je minister dr. Matthias Haß (CDU) wčera etatowemu a financnemu wuběrkej Sakskeho krajneho sejma předpołožił a rozjasnił.

31. decembra 2017 stejachu wudawkam 18,046 miliardow eurow dochody 18,665 miliardow eurow napřećo. „Hłownje k tomule wuslědkej přinošo­wała je dobra konjunktura z wotpowědnje pozitiwnymi wuskutkami na dochody z dawkow. Solidna etatowa politika wostanje tuž najwažniši zakład za jednanjakmanu a wuspěšnu dźěławosć knježerstwa“, dr. Haß podšmórny.

Kaž financne ministerstwo w medijowe zdźělence tež informuje, je Sakska loni­ wjac dochodow – 467 milionow eurow­ – z dawkow měła a tak něšto wjac, hač běchu fachowcy trochowali. Nimo zarunanja žadanjow ze stron komunow wužiwaja přidatne dochody za to, zawěsćić inwesticiske móžnosće Sakskeje, za wysokošulsku medicinu w Drježdźanach a Lipsku kaž tež za dróhotwar. Z nimale 80 milionami eurow chcedźa dołh swobodneho stata dale wotpłaćić.

Berlin (dpa/SN. Nowy zwjazkowy kancler Awstriskeje Sebastian Kurz nadźija so bórzomneho wutworjenja noweho sylneho a stabilneho zwjazkoweho knje­žerstwa w Němskej, z čehož byštej Awstriska a wša Europa lěpšiny měłoj. To rjekny Kurz wčera wječor we wusyłanju „Maisch­berger“. Přiwšěm so wón njestarosći a wočakuje, zo budźe knježerstwo najpozdźišo k jutram wutworjene. Kurz nima zaćišć, zo je zwjazkowa kanclerka Angela­ Merkel wliw zhubiła. Do toho bě so z njej w Berlinje zetkał.

Trumpowe „myto“ medijam

Washington (dpa/SN). Kaž wospjet připowědźene je prezident USA Donald Trump minjenu nóc myto „Fake News Awards“ za ze swojeho wida wosebje njefairne a wopačne rozprawnistwo medijow spožčił. Na lisćinje steji hnydom štyri razy sćelak CNN. Prěnje městno zaběra lawreat Nobeloweho myta a kolumnist New York Times Paul Krugman. Tón bě twjerdźił, zo so hospodarstwo USA nihdy njezhraba. Te pak „ekstremnje rozkćěwa“ Trump twjerdźi. Žurnalisća USA wone myto jako wulke wuznamjenjenje wu­směšuja.

Bamž potłóčowanje šwikał