Sokoł Ralbicy/Hórki – LSV Hory 2:1 (1:0)
Zestawa domjacych: Schöne – Hilbich (74. K. Matka), Šewc, B. Bjeńš, Rawš, Korjeńk, Šołta, G. Kurjat (90. Materna), M. Matka, M. Kurjat (65. Bejmak), Domaška
Štóž je sej njedźelu do Ralbičanskeho Stadiona přećelstwa dojěł, njeje swój wopyt wobžarował. Wot prěnjeje do poslednjeje mjeńšiny bě tam spěšna koparska hra połna dwubojow a wětřika dla zdźěla kuriozna. Sokoljo běchu přećiwo sylnemu kontrahentej wulkotnje startowali. Po 120 sekundach přesadźi so Michał Matka na prawym křidle a jeho flanka docpě Měrćina Kurjata w centrumje. Tón njeda so dwójce prosyć, ale zhłójčkowa bul k 1:0 do saka. Domjacy tłóčachu dale na druhe wrota, tola přeco bě noha přećiwnika hišće při bulu. Po 20 mjeńšinach namakachu so tež hosćo do hry a ju poněčim postajachu. Škit Sokoła pak jara derje steješe, tak zo wuspytachu so z třělwami z distancy, a te dźěchu wšitke wyše wrotow. Hač do połčasa so ničo wjac njesta, tak zo dźěše ze zasłuženym nawjedowanjom hosćićela do kabinow.