Łužiske lodohokejowe liški zesylnjeja swój nadběh z Ville Järveläinenom. Finski nadběhowar hraješe naposledk za Bayreuth Tigers. Ville Järveläinen započa swoju profijowu karjeru 2012 pola finskeho kluba Heinolan Peliitat. Tu přeběža tež wšitke dorostowe mustwa wot U16 hač k U20. 2016 přizamkny so wón Heilbronnskim Sokołam, hdźež docpě hnydom w prěnjej DEL2-sezonje na 40 ličakow (10 wrotow/30 přihrawkow) w 46 hrach. Po jenož jednej sezonje přeńdźe do druheje danskeje ligi do Gentoftea, hdźež wosta tež jednu sezonu. Po tym dźěše za njeho zaso do Němskeje k Bayreuthskim tigram. Pjeć lět hraješe wón za Hornich Frankow. W tutym hrajnym času zběraše 343 dypkow a bě kóžde lěto ­jedyn z najstrašnišich hrajerjow a z tym najlěpši třělc ligi. Za čas zašłeje sezony nawjedowaše wón Bayreuthske mustwo jako kapitan. Jens Baxmann, sportowy nawoda: „Z Ville dóstanjemy smjerćstrašneho nadběhowarja, kiž wě, hdźe wrota steja. To je we wšelakich ligach dopokazał. Wón budźe tež naš powerplay wobohaćeć a móže ze swojim nazhonjenjom a swojimi kwalitami našim młodym hrajerjam pomhać.“ W Běłej Wodźe dóstanje Järveläinen čisło 20.