Dźakowano dobyća 1:0 přećiwo Jamaice, steji Kolumbiska w štwórćfinalu swětoweho mišterstwa kopańcy žonow. Po bjezwrotowej prěnjej połojcy docpě Catalina Usme dobyćerske wrota. Start WM wosmifinala bě, najebać wusahowacu naladu na tribunach w Melbournje, wot mnohich foulow charakterizowany. Kopicy přetorhnjenjow dla je lědma hrajny prud nastał, tak šansy w prěnjej třećinje partije za Kolumbisku abo Jamaiku wuwostachu. Jeničce krótko wuwjedźeny róžk bu w 30. min. strašny. Catalina Usme flankowaše do šěsnatki, hdźež pak ­Rebecca Spencer bul wušiknje preč pjasćowaše, prjedy hač móžeše w prawym róžku do wrotow zdyrić.