Waršawa (JBR/SN). Powšitkownje so praji, zo Polacy Rusow njelubuja! To wšak cyle njetrjechi, dokelž jednoho, w interneće wustupowaceho, woni woprawdźe rady maja.
„Dźeń dobry, moji lubi. Rěkam Wiaczesław Zarucki, sym z Ruskeje a budu wam wěrnosć wo tymle kraju rozprawjeć“, takle započina so jeho wšědne widejo. Wiaczesław, wopušći swój ródny kraj loni krótko do nadpada Ruskeje na Ukrainu a čaka nětko w Pólskej na přiwzaće. Na swojim internetnym blogu přeradźa 28lětny ludźom w kraju nad Wisłu – a to w porjadnej pólšćinje – ruske „potajnosće“. Tak na přikład, kak bydla Rusojo w „zawrjenych městach“, kaž w Čeljabinsku. To je jenož jedne z dohromady 40 sydlišćow, kotrež njesmědźa wobydlerjo bjez wosebiteho přepustka wopušćić. Pokazał je Wiaczesław tež hižo Putinowy „płuwacy palais“ za 100 milionow dolarow a jeho luksusowe rumnosće.
Waršawa. Najnowši pólski film „Zelena mjeza“ w kraju nad Wisłu wulki njeměr wubudźa – a to wot dnja swětoweje premjery na 80. mjezynarodnym filmowym festiwalu w italskim Venedigu. Nahrawała bě dramu připóznata pólska režiserka Agnieszka Holland, kotraž móže mjeztym na wjace hač dwaceći wulce wuspěšnych filmowych produkcijow zhladować. Předstajenje mjenowaneho paska 5. septembra wuwabi 15 mjeńšin trajacy přiklesk jurorow a wopytowarstwa. Agnieszka Holland je so z wysokim počesćenjom, Wosebitym mytom mjezynarodneje jury, nawróćiła.
Je rano, sedźu w awće, čakam… a moje žiwjenje popušćuje něhdźe w blachowej mjerwjeńcy. Dołhe awtokolony bjez kónca. Spočatk požnjenca je so w Čěskej nowe šulske lěto započało, štož rěka, zo je w Praze hnydom po puću tři abo štyri króć wjac wozydłow hač hišće zašły prózdninski tydźeń – dokelž starši swoje dźěći do šule wjezu. Potajkim sedźu, čakam, poskam serbsku hudźbu a sej přemysluju, što by nowa tema za fejeton w Serbskich Nowinach być móhła. A nadobo to wěm: tuta situacija!
Praha. 215 krónow (8,90 eurow) měsačnje, to rěka 35 krónow (1,50 eurow) wjace, chce čěske knježerstwo wot lěta 2025 za posłužby Čěskeho rozhłosa měć. To pak njeje jenička změna. Po předstawach ministra kultury Martina Baxy maja tež wužiwarjo šmóratka a tabletowych kompjuterow swoju móšnju třasć. Je mjenujcy móžno, z tutymi nastrojemi wusyłanja zjawnoprawniskich medijow sćěhować. Schwali-li parlament nowelu zakonja w přichodnych dnjach, změje Čěska telewizija měsačnje 1,5 miliardow krónow (62 milionow eurow) wjace, a tež Čěski rozhłós móže z plusom 600 milionow krónow (24,8 milionow eurow) ličić. René Zavoral, šef Čěskeho rozhłosa, je z planami knježerstwa jara spokojom. „Smy pokazani na wyše popłatki, dokelž chcemy wysoki niwow našeho dźěła zdźeržeć. Nimo toho njejsmy za čas zašłych 15 lět rozhłosowe popłatki zwyšili“, praji nowinarjam zašły kónc tydźenja w Praze. Opozicija njeje z nowelu zakonja přezjedna. Aleš Juchelka, zapósłanc strony ANO, namjetuje, zjawnoprawniske medije ze statneho budgeta financować.
Waršawa. Pólska hotuje so zajutřišim, njedźelu, na nabožny a narodny wjeršk, w stawiznach kraja a cyrkwje dotal njesłyšany: na zbóžnoprajenje cyłeje swójby, staršeju a sydom dźěći. Stawizny swójby Ulma w juhopólskej wsy Markowa pod Karpatami mjeztym kóždy Polak znaje. Hłuboko wěriwa swójba bě za čas němskeje okupacije 15 měsacow dołho dwě židowskej swójbje chowała, štož bě kruće zakazane a bu z wěstej smjerću chłostane. Swójbu pak přeradźichu. Na to su 24. měrca 1944 němscy wojacy zhromadnje z pólskimi pomocnymi policistami přijěli a wšitkich morili: najprjedy wšěch wosom Židow, po tym Józefa Ulmu a wysoko zańdźenu mandźelsku Weroniku, kotraž bě hižo w hronach. Na kóncu zatřělichu šěsć žałosćacych dźěći w starobje jednoho do wosom lět. Wone dyrbjachu do toho přihladować, kak jich staršeju morja.
Waršawa. Wojowarjo ruskeje priwatneje armeje Wagner na teritoriju Běłoruskeje zamołwitych w Pólskej dale znjeměrnjeja. Njedawna smjerć jich nawody Jewgenija Prigožina strach hišće zesylnja. Hłowne prašenje je, što zóldnarjo bjez swojeho charismatiskeho rozkazowarja nětko činja. We wojowanjach na Ukrainje wukmanjeni a nazhonići bojownicy móhli so snano přećiwo Pólskej měrić. Pječa dóstawaja w Běłoruskej samo wupokazy z nowym mjenom, zo móža do wukraja hić, bjez toho zo bychu jich tam jako „wagnerowcow“ identifikowali.
Dalša přičina ćežow su migranća, kotrychž běłoruski mócnar Aleksander Lukašenko – w nadawku ruskeho prezidenta Wladimira Putina – cyle zaměrnje do Pólskeje a dale do zapadnych krajow sćele, zo by wšu Europsku uniju wosłabił.
Po dlěje hač lěto trajacej přestawce su falowace čisła po dwěmaj měsacomaj wuchadźaceho časopisa Česko-lužický věstník 2021 nětko wušli. Jedna so wo štyri čisła za měsacy meja do decembra we wobjimje 40 stronow, štož je něhdźe trójce wjac stronow hač zwučeny wobjim časopisa. Kaž přeco poskićuje věstník zajimawe teksty, kotrež njejsu – byrnjež zapozdźene – čitarjej na škodu.
Jurij Łušćanski spomina na wuznamneho čěskeho sorabista Jiříja Mudru (1921–2009), kotryž by 2021 swoje 100. narodniny woswjećił. Katja Brankačkec je napisała nekrolog za serbskeho slawista Hinca Schuster-Šewca (1927– 2021), Kinga Kijo dopomina na pólsku sorabistiku Ewu Siatkowsku (1930–2020). W chronice spominaja na serbskeho duchowneho Clemesa Hrjehorja (1953– 2021), superintendenta Siegfrieda Alberta (1937–2021) a na w Čěskej bydlaceju sotru a bratra Luisu a Bohumíra Härtelec. Wobšěrniši nekrolog za jeničkeho jendźelskeho sorabista Geralda Stona (1932–2021) je Milan Hrabal napisał.