Praha (ČŽ/K/SN). Čěske piwarnje nawarichu loni rekordne mnóstwo piwa. Cyłkownje naprodukowachu wone 21,3 miliony hektolitrow, štož je cyłych 4,7 procentow přirosta porno lětu do toho. Zwyšenu produkciju žadaše sej předewšěm eksport, kotryž bě přirunujo z lětom 2017 wo nic mjenje hač 11,8 procentow zrostł. To wozjewi na nowinarskej kon­ferency nawodny zastupnik Zwjazka čěskich piwarnjow a słodarnjow.

W kraju samym su ludźo 16,5 milionow hektolitrow piwa wupili. To je 2,9 procentow wjac hač 2017 a 141 litrow na kóždeho wobydlerja Čěskeje. Najwjace piwa dźěše do Słowakskeje a Němskeje, wjace hač milion hektolitrow do kóždeje z njeju. Južnemu „bratrowskemu“ krajej dodawachu 14 procentow, zwjazkowej republice dźewjeć procentow wjac. Do Madźarskeje su nimale 60 procentow wjac piwa eksportowali. Nastupajo kraje zwonka Europskeje unije je wuwoz piwa wosebje do Ruskeje wo 54 procentow nahladnje přibył, štož wučinješe 575 000 hektolitrow. Najebać rekordnu swójsku produkciju je Čěska loni tež 395 000 hektolitrow piwa importowała.

Waršawa (dpa/SN). Pólscy wučerjo su wčera po wšěm kraju namołwu dźěłarnistwow sćěhowali a stawkowali. Po informacijach medijow wobdźělichu so pedagogojo na stach šulow na protestnych demonstracijach, mjez druhim we Waršawje, Krakowje a Poznanju. Zo bychu so za lěpše dźěłowe wuměnjenja a wyše mzdy zasadźeli, zapowědźichu swoje dźěło. Na mnohich kubłanišćach dohladowachu jeničce dźěći. Zwjazk pólskich wučerjow, kotryž je stawk pedagogow sobu organizował, žada sej wot Waršawskeho knježerstwa zwyšenje mzdow wo cyłkownje 30 procentow. Tak chcedźa mzdy wučerjow narodnym přerěznym dochodam přiměrić, kaž rěkaše.

Mzdy pólskich wučerjow-započatkarjow wučinjeja častodosć jeno 410 eurow netto. Dale zwjazk skorži a kritizuje, zo su dochody wučerjow tež z přidatnymi kwalifikacijemi a po wjelelětnym skutkowanju poměrnje niske. Narodna přerězna mzda kraja wučinja po informacijach statistiskeho zarjada 870 eurow netto.

Praha (ČŽ/K/SN). W Čěskej wobsteji wočiwidnje wobstajnosć w tym, zo nastupajo institucije zjawneho žiwjenja ludźo najbóle wójsku a policiji dowěrjeja, za to najmjenje cyrkwjam a politiskim stronam. Wójsko je lětsa w měrcu dowěru 70 procentow woprašanych měło, loni w samsnym měsacu 69 procentow. Policija zwjeseleše so w nalětniku 2019 dowěry 69 proc. respondentow, před lětom 66 proc. Cyrkwjam dowěrješe porno tomu w zašłym měsacu 27 proc. ludnosće, 2018 bě tomu 25 proc. było. Politiskim stronam je w měrcu tohorunja jeničce 25 proc. wobydlerjow dowěrjało.

Mjenowany staw wuchadźa z měrcowskeho naprašowanja přez Centrum za přepytowanje zjawneho měnjenja Akademije wědomosćow Čěskeje republiki, zwěsćeny mjez 1 096 respondentami, staršich hač 15 lět. Poměrnje wulku dowěru maja čěscy ludźo hišće do sudnistwow (57 proc.), bankow (55 proc.), rozhłosa (52 proc.) a do dźěłarnistwow (46 proc.). Nowiny nastupajo dowěru jeničce z 41 procentami wobsteja (porno lońšemu wšak je to plus dweju procentow), mjeztym zo internetej 42 procentow woprašanych dowěrja (porno lětu 2017 pak je to minus pjeć procentow).

Praha (SN). W Domje narodnych mjeńšin čěskeje stolicy su minjeny pjatk pućowansku wustajeńcu wo Romach wote­wrěli, kotraž je w mjezy přesahowacym dźěle nastała. Sakska ministerka za wuměłstwo a wědomosć dr. Eva-Maria Stange (SPD) hódnoćeše projekt jako wažny přinošk k sylnjenju europskeho fundamenta hódnotow we wobchadźe z mjeńšinami. Hladajo na stawizny pokaza dr. Stange na zamołwitosć Němskeje, polěkować dorozumjenju ludźi wšelakich etniskich skupin a narodow.

Přehladku wotewrěchu do Mjezynarodneho dnja Romow, kotryž swjeća wot lěta 1990 stajnje 8. apryla, zo bychu na połoženje Romow skedźbnili. To wšak je w dźělach Němskeje kaž tež w Čěskej přeco hišće wobžarujomny dóńt Sintow a Romow, ministerka Stange wuzběhny. Na 27 taflach wěnuje so wustajeńca pochadej Romow, ludomordarstwu za čas nacionalsocializma, ale tež widej do přichoda. Dwurěčna přehladka je hač do kónca apryla w Domje mjeńšin na Vocelovej 3 w Praze přistupna.