To a tamne (21.10.22)

Freitag, 21. Oktober 2022 geschrieben von:

Přemało piwa w karanje mějachu lětsa napadnje husto wopytowarjo Oktoberskeho swjedźenja w Mnichowje. Kaž je přisłušny zarjad zwěsćił, bě w 31 procentach wšitkich kontrolowanych probow přemało piwa w škleńcach. Tajki pad předleži, hdyž je karan napjelnjeny mjenje hač 15 milimetrow pod smužku, kotraž pokaza značku jednoho litra. Na Oktoberskim swjedźenju 2019 bě to hišće 18 procentow wšěch probow.

Na prowizoriske tepjenje z drjewom je šwabske město Stadtbergen pola Augsburga swoju šulu přestajiło. Přičina su wysoke płaćizny za płun. Před šulu steji wot njedawna kontejner ze zatwarjenym tepjenjom za drjewjane třěski. Tepjenski material město z drjewowych wotpadkow same produkuje. Přichodne tři měsacy chcedźa mobilne tepjenje wuspytać a so nadźijeja, zo z nim pjenjezy lutuja.

To a tamne (20.10.22)

Donnerstag, 20. Oktober 2022 geschrieben von:

Jako prěnja žona je 23lětna Wulkobritaničanka Jasmine Harrison zapadny po­brjóh Wulkeje Britaniskeje hač do sewjerowuchoda Šotiskeje přepłuwała. Wutoru dopłuwa młoda žona nimale 1500 kilometrow dołhu čaru. Spočatk julija bě Harrison startowała a z tři a poł měsaca trajacym dyrdomdejom tež nowy časowy rekord docpěła.

Štóž w indiskej stolicy Neu Delhi hinduistiski swjedźeń swěcow Diwali z wohnjostrojom swjeći, tomu hrozy jastwo. Hižo nakup, ale tež wužiwanje praska­dłow móže so z pokutu hač do 200 rupijow (něhdźe 2,50 eurow) a šěsć měsacami jastwa pochłostać. Přičina toho je, zo je poćeženje z drobnym prochom kóžde lěto wokoło swjedźenja Diwali wosebje wysoke a zo je praskańca hłowna přičina toho. Diwali je hinduwam přirunajomnje wažny swjedźeń, kaž mnohim hody.

To a tamne (19.10.22)

Mittwoch, 19. Oktober 2022 geschrieben von:

Při raciji na wjacorych městnach su zasadźenske mocy cwólbu wotkryli, kotraž je we wulkim stilu falšowane pruwowanske wopisma wobsedźerjam šrótowych awtow předała. Banda je mjez druhim kołk pruwowanskeje organizacije Dekra falšowała. Wjace hač 200 zasadźenych policistow je wutoru rano 17 objektow přepytało a wobšěrne dopokazy sćazało, zdźěli policija w Münsterlandskim Borkenje. Hłownaj podhladnaj buštaj zajataj.

Podhladneho paketa dla buchu dźěle Londonskeje knježerstwoweje štwórće wokoło Downing Street wutoru nachwilnje zawrjene. Po pruwowanju přez specializowanych zastojnikow pak bu paket jako njestrašny zastopnjowany a zawěry zaso zběhnjene. Po rozprawach medijow dyrbjachu něšto stow ludźi mjezowace twarjenja wopušćić. Tež wjacore dróhi běchu za awta a pěškow zašlahane.

To a tamne (18.10.22)

Dienstag, 18. Oktober 2022 geschrieben von:

Nimale dwě tonje kokaina je ekwadorska policija sćazała. Droga bě w kontejneru z mórskimi płodami schowana, kotryž bě za transport do Belgiskeje předwidźany, kaž policija póndźelu zdźěli. Zastojnicy wotkrychu mjez tworami 124 kistow ­kokaina. Podhladneho při wotkryću ­zajachu. Europa je so naposledk k wjertnišću za wikowanje z drogami wuwiła, dokelž so kontejnery wottam mjenje kontroluja.

Jědojteho hada je wohnjowa wobora w Bremerhavenje popadnyła. Policajska straža wotkry zwěrjo njedźelu mjez kontejnerami. Po informacijach wohnjoweje wobory jednaše so wo jědojteho sewjeroameriskeho hada. Zwěrjenc w Saterlandźe (wokrjes Cloppenburg) ma hada nětko přiwzać. Pochad a wobsedźer bě­štaj po podaćach póndźelu hišće nje­jasnaj. Policija pad přepytuje.

To a tamne (17.10.22)

Montag, 17. Oktober 2022 geschrieben von:

Wosebity poćah k britiskej kralownje ­Elizabeth II. měješe figura dźěćacych knihow „Paddington Bear“. K 70. róčnicy jeje krónowanja smědźeše bar za mjeztym jara woblubowany animěrowany film do palasta přińć. Po smjerći kralowny połožichu žarowacy nimo kwětkow tež wjace hač 1 000 barikow a Paddingtonow před Buckinghamskim palastom. Tute budu so dźěćacej pomocnej organizaciji darić.

Njeznaći skućićeljo su w Mnichowje muža přelesćili a jemu 40 000 eurow z awta kradnyli. Kaž policija zdźěli, bě 67lětny pjenjezy pjatk na bance wotzběhnył a tute w nachribjetniku transportował. Jako so do awta sydny, klepaštej njeznatej ­wosobje wo wokno a jeho na na zemi ­ležace pjećeurowske bankowki skedźbni­štej. Při tym jedna z wosobow nachri­bjetnik pokradny. Mužej to pak hakle po něšto mjeńšinach jězby napadny.

To a tamne (14.10.22)

Freitag, 14. Oktober 2022 geschrieben von:

Wotpohladnje do płota zrazył je 57lětny ze swojim awtom w vogtlandskim Reichenbachu. Muž přizjewi so pola policije a twjerdźeše, zo je njeznaty jeho awto wobškodźił. Jako zastojnicy dojědźechu, zhonichu wot swědkow, zo je 57lětny we wokomiku zražki sam za wodźidłom sedźał. Na to narěčany muž to skónčnje přizna. Test alkohola wunjese 1,72 promilow. Nětko dyrbi so wón nimo alkohola tež wudawanja chłostajomneho njeskutka dla zamołwić. Čehodla bě muž wotpohladnje do płota zajěł, njeje znate.

Wjace hač štyri promile alkohola je šofer wosoboweho awta njedaloko Stuttgarta w kreji měł. Po informacijach policije bě wój „jara razantnje a bjez swěcy“ po puću. Do toho bě so žona 51lětneho dohladała, jako tón pjany do awta zalěze. Policisća jeho zadźeržachu a sćazachu jězbnu dowolnosć. Muža wočakuje chłostanje.

To a tamne (13.10.22)

Donnerstag, 13. Oktober 2022 geschrieben von:

Za wopačnym awtom so schował je paduch pralinow w Kölnje. 27lětny bě do toho w žiwidłowym wobchodźe 25 tyzow worješkowych pralinow do wulkeje plastikoweho měška tyknył a so bjez zapłaćenja zminył. Po tym schowa so mjez parkowacymi awtami. Jedne z awtow pak bě ciwilne jězdźidło policije z dwěmaj zastojnikomaj. Tymaj bě zadźerženje muža podhladne. Nimo toho njeměješe wón kasowy bon za wulke mnóstwo pralinow.

Dokelž njeje ničo přećiwo wulkej ličbje myšow w swojim domje činiła, dyrbi žona w Jendźelskej pokutu płaćić. Najebać skóržby susodow je 73lětna z myšemi kaž z domjacymi zwěrjatami wobchadźała a je picowała. Sudnistwo města Colchester je žonu tohodla k pokuće 1 700 eurow zasudźiło. Nimo toho dyrbi wona kóšty za ponowjenje swojeho socialneho bydlenja w nošerstwje města zarunać.

To a tamne (12.10.22)

Mittwoch, 12. Oktober 2022 geschrieben von:

Indiska wobžaruje smjerć lětdźesatki stareho krokodila. Zwěrjo z mjenom Babiya bě w haće hinduistiskeho templa w juhoindiskim Kerala žiwe a žerješe jenož rajs a cokor, kiž běchu jemu wěriwi sobu přinjesli. Póndźelu su krokodila pochowali. Wobrazy pokazuja z kwětkami pyšene a z palmowymi łopjenami zawodźěte zwěrjo. Kak dołho je Babiya w templu žiwy był, njeje znate.

W zwadźe nahubnika dla je 39lětny w spěšniku ICE pola Bochuma mječ wućahnył. Muž sedźeše bjez nahubnika w ćahu. Jako druzy jeho na winowatosć wužiwanja nahubnika skedźbnichu, dóńdźe k zwadźe. Na to muž mječ wućahny a před sobu połoži. Policija muža zaja. Mječ bě drje jenož hrajka, najebać to dyrbi wón z chłostanjom wohroženja dla ličić.

To a tamne (11.10.22)

Dienstag, 11. Oktober 2022 geschrieben von:

Pře hłuboko do škleńcy pohladnył je muž w mecklenburgsko-předpomorskim Stralsundźe. Wón bě sej w měšćanskim busu tak kruće wusnył, zo njemóžeše šofer jeho wubudźić a dyrbješe policiju wołać. Do toho bě muž dwě hodźinje dołho spicy w busu sobu jěł. Zastojnicy móžachu jeho skónčnje wubudźić. Woni zwěsćichu 2,88 promilow alkohola. Nimo toho njeměješe wón žanu jězdźenku.

Pod wliwom drogow je nan w hornjobayerskim Raublingenje z awtom swojeho syna wozył, za kotrymž policija pytaše. Zastojnikam bě njewěsty jězbny stil muža napadnył. 43lětny muž přizna, zo je do jězby marihuanu brał. Na zadnjej ławce ležeše 22lětny syn, přećiwo kotremuž předležeše wukaz zajeća, dokelž bě 2020 tohorunja pod wliwom drogow z awtom jěł. Wobaj móžeštaj so z hnydomnym płaćenjom pokuty zajeću wuwinyć.

To a tamne (10.10.22)

Montag, 10. Oktober 2022 geschrieben von:

Najćeši kirbs Europy přińdźe znowa ­z Italskeje. Při wčerawšim napřemowaženju w Ludwigsburgu je so dobyćer lońšeho wubědźowanja a mějićel swětoweho rekorda Stefano Cutrupi z 1 100,5 kilogramow ćežkim kirbsom jasnje přesadźił. „Najćeši konkurent“ bě Iwan Horde z Nižozemskeje ze swojim 891,5 kilogramow ćežkim kirbsom. Na wubědźowanju wobdźělichu so plahowarjo z wjacorych krajow. Cutrupi bě hižo loni z 1 226 kilogramow ćežkim eksemplarom dobył.

Njeprošeny to suweněr: Wosrjedź nocy je 32lětneho Mnichowčana skorpion kałnył. Prawdźepodobnje bě sej muž eksotiske zwěrjo z USA sobu přiwjezł, hdźež bě ze swojej přećelku stanował. Po nawróće je zwěrjo twochnyło a so w bydlenju schowało. Muž móžeše skorpiona ze škleńcu popadnyć a nuzowe ćisło wołać. Jeho dowjezechu do chorownje.

Serbska debata

Neuheiten LND