To a tamne (13.08.20)
Mały njetopyr je so do policajskeho rewěra w badensko-württembergskim Ludwigsburgu zabłudźił a so tam na zapinak swěcy powěsnył, zo by sej swój spar popřał. Kolegina měješe to spočatnje za žort, bórze pak zwěsći, zo jedna so woprawdźe wo žiwe zwěrjatko. „Dokelž pak njeje na policajskim rewěrje měrny spar móžny, pušćichu kolegojo njetopyrja z woknom běrowa do swobody“, pisaja zastojnicy w interneće.
Bjez chwatka je so 32lětny zadobywar po wili w Berlinje-Wilmersdorfje rozhladował a w nocy k tomu hišće swěcu zapinył. Wón běhaše w kupanskich toflach wobsedźerja – kiž njebě doma – po chěži. Kedźbliwy susod pak informowaše policiju, wuhladawši swěcu w domje. Nětko chcedźa pruwować, hdy je so podhladny do wile zadobył a hač tam scyła něšto pobrachuje.
To a tamne (12.08.20)
Z ruku w cigaretowym awtomaće tčacy wostał je muž w sewjerorynsko-westfalskim Mönchengladbachu. Wohnjowi wobornicy jeho skónčnje z wulkimi klěšćemi wuswobodźichu, po tym zo běchu to sobudźěłaćerjo kupnicy podarmo spytali. Muž wosta njezranjeny a móžeše po lěkarskim přepytowanju dale nakupować.
Nawoči indiskeho wojowarja wo swobodu Mahatmy Gandhija chcedźa we Wulkej Britaniskej přesadźować. Stoprocentowsce wěsći sej w Bristolskim awkciskim domje East Auctions přiwšěm njejsu, zo su nawoči Gandhijej (1869–1948) woprawdźe słušeli. Awkcionator pak ma dosć pokazkow na to, kaž su to přirunajomne modele, kotrež bě Gandhi swój čas wužiwał. Internetnje chcedźa je 21. awgusta přesadźować. Hódnotu trochuja na 17 000 eurow. Mnozy zajimcy su so hižo přizjewili.
To a tamne (11.08.20)
Noweho štyrikolesateho kolegu maja wot najnowšeho sobudźěłaćerjo Rahlstedtskeho kěrchowa w Hamburgu. Roboter „Rainos“ jězdźi kóždu nóc z 200litrowskim tankom wody po kěrchowje, zo by rowy krjepił. Jězdźidło ma wjacore miliony měrjenskich dypkow składowane, zo móhło so na kěrchowje orientować. Poprawom maja sobudźěłaćerjo 2 500 rownišćow jědnaće króć wob lěto krjepić. To mjeztym dawno wjac njedosaha.
Z dołhim jědźnym štabikom fararka w Jendźelskej za čas koronapandemije wěriwym woblatka wudźěla. Mnozy wosadni běchu so natyknjenja z wirusom bojeli, rjekny duchowna Eileen Harrop we wuchodojendźelskim Winstonje. Tuž jej do mysli přińdźe, štabiki z chinskeje kuchnje wužiwać a ludźom prawy chlěb město woblatka do ruki dać. Zhromadne piće wina pak je dale zakazane.
To a tamne (10.08.20)
Kak dźiwne powšitkowne połoženje w USA tuchwilu je, pokazuje tež aktualna sudniska zwada mjez koncernom Apple Inc. a ameriskim IT-małopředewzaćom Prepear. Přičina rozkory je, zo móhli wužiwarjo – znajmjeńša po měnjenju kompjuteroweho giganta – firmowej loze zaměnić, kaž pisaja na fachowym portalu golem.de. Symbol Apple je jabłuko, Prepearowa značka je krušwa.
Dźewjećlětna fachowča za chemiju je ze swojoraznym wukonom w Pakistanje zapis do Guinnessoweje knihi rekordow docpěła. Mjeztym je wona w swojej domiznje chětro sławna. Natalja Najam z wuchodopakistanskeho Lahore bě w běhu dweju minutow a 24 sekundow wšitke chemiske elementy periodoweho systema přirjadowała, z čimž bě sydom sekundow spěšniša hač dotalna mějićelka rekorda – indiska profesorka.
To a tamne (07.08.20)
Přećelne wotpadkowe bowy maja wot najnowšeho w Trieru. Ćisnješ-li wotpadki do tajkeho, zaklinči krótke „haleluja“ abo přiklesk. Tak chcedźa so ludźom dźakować, zo sudobjo wužiwaja. Mjeztym su 120 litrow wulke bowy wosebita atrakcija. Něchtóžkuli jenož tohodla něšto do nich ćisnje, zo by gag wupruwował. Sudobjo móže wotpadki samo prasować, a to z pomocu solarnych celow.
87 kokosowych worjechow w běhu jeničkeje minuty rozbił je 51lětny Němc w schleswigsko-holsteinskim Bönningstedće. Tak je z wulkim wotstawkom nowy swětowy rekord nastajił, kaž Hamburgski Rekordny institut Němskeje zdźěla. Z bliskeho Quickborna pochadźacy Jens Gaude wužiwaše swój łochć, zo by na sportnišću w rynku nastajane worjechi rozpačił. Za nowy rekord wšak by hižo 50 worjechow dosahało.
To a tamne (06.08.20)
Kóčku při pašowanju drogow lepili su zastojnicy w jastwje stolicy Sri Lanki Colombo. Sobudźěłaćerjam bě podhladny pakćik napadnył, kotryž měješe kóčka wokoło šije. W nim namakachu heroin a SIM-kartki za mobilne telefony. Nětko chcedźa zwěsćić, hač je kóčka hižo časćišo jako kurěr w jastwje była. Mjeztym su tež wěstotne naprawy zesylnili.
15 eurow pokuty płaćić dyrbješe Gloria wjerchowka von Thurn und Taxis, dokelž bě bjez nahłownika na elektriskim roleru na pohrjeb Georga Ratzingera w Regensburgu přijěła. Kaž rěčnica policije zdźěli, su pjenjezy mjeztym dóšli. Policija bě 60lětnej chłostanku pósłała, po tym zo bě wona 8. julija bjez nahłownika k Regensburgskej katedrali přijěła a swój elektroroler demonstratiwnje před tam stejacymi policistami wotstajiła.
To a tamne (05.08.20)
Psyče howno na čriju je so w SakskoAnhaltskej wo bijeńcu młodeho porika w awće postarało. Krótko do wotjězda bě 23lětna mylnje do hromadki stupiła. Po tym zo bě so do awta sydnyła, dóńdźe k zwadźe z 32lětnym šoferom. Po werbalnym rozestajenju wza žona črij a biješe z nim muža. Na to so wobaj biještaj. Hakle policisća móžachu zwadu skónčić. Wobaj mataj nětko ze skóržbu ranjenja ćěła dla ličić.
Z kosćemi mandźelskeho we wačoku su Armenjanku na Mnichowskim lětanišću zadźerželi. Žona bě po puću z Grjekskeje do swojeje domizny, zo by lěta 2008 zemrěty mandźelski tam swój posledni wotpočink nadešoł. Zastojnicy cła, lěkarka a statny rěčnik pak njemóžachu žane přeńdźenja zwěsćić a su 74lětnej dowolili, z powostankami mandźelskeho do Kawkaza dale jěć.
To a tamne (04.08.20)
Z wjace hač 3,5 promilemi alkohola w kreji je sej wodźer wosoboweho awta při tankowni w bayerskim Regensburgu wusnył. W awće bě hišće dźewjećlětny syn šofera. Přistajeny bě policiju wołał, dokelž so boješe, zo chce muž po tankowanju bjez zapłaćenja wotjěć. Jako zastojnicy přijědźechu, tón za wodźidłom sedźo spaše. Jězbnu dowolnosć alkohola dla žanu njeměješe. Muža dowjezechu do chorownje, hólca domoj k maćeri.
Dźakowano hoberskemu SOS-znamjenju w pěsku su třoch zhubjenych płachtakowarjow na móličkej kupje w zapadnym Pacifiku našli. Wobsadka awstralskeho wojerskeho lětadła bě pismo wuhladała. Za mužemi běchu hižo tři dny pytali. Prawdźepodobnje su so ze swojim sydom metrow dołhim čołmom zabłudźili. Pozdźišo jim bencin wuńdźe. Z helikoptera su jich mjeztym zastarali.
To a tamne (03.08.20)
Z wohenjom w železnej škli wo ruku młodeje žony prosył je w porynsko-pfalcskim Neustadće muž a zawini tak zasadźenje wohnjoweje wobory. Swědcy na to wohnjowu woboru informowachu. Jako wobornicy přijědźechu, woni płomjenja hnydom zhašachu a powučichu porik, zo je woheń tuchwilneje suchoty dla wokomiknje wosebje strašny.
Wot błyskača dospołnje nastróžany je 26lětny wodźer wosoboweho awta do njeho zajěł. Nětko dóstanje nimo chłostanki tež hišće zličbowanku wjacorych dźesaćtysac eurow za skóncowany błyskač do domu. Prawdźepodobnje bě so šofer błyska dla tak nastróžił, zo je wodźidło wokoło storhnył a do błyskača zrazył. Alkohol abo drogi pola njeho zwěsćili njejsu.
To a tamne (31.07.20)
Do akwarija w coowje awstralskeho Sydneyja zalězł je 30lětny muž – a ma nětko mjerzanje ze sudnistwom. Přećeljo muža běchu zwažliwu akciju filmowali a w interneće wozjewili. Na wideju je widźeć, kak 30lětny w spódnich cholowach do basenka lěze a mjez mjeńšimi rybami wokoło płuwa. Policija wumjetuje jemu ranjace zadźerženje a mylenje wotběhow w zwěrjencu. Za 17. september su jeho tuž na sudnistwo skazali.
Z 250 km/h před policiju ćěkał je paduch awtow na A 2 pola Braunschweiga. Do toho bě so wón policajskej kontroli wuwinył. Na ćěkańcy jědźeše chětro riskantnje a přesćěhowaše awta zdźěla na nuzowej čarje. Po 50 kilometrach wotjědźe z awtodróhi, wotstaji awto a ćekny. Zastojnicy lepichu muža krótko na to w kerčinje a jeho zajachu.
