To a tamne (06.07.20)
Wjacore sta metrow do tunla tramwajkow jěł je muž ze swojim wosobowym awtom w Praze. Pkw wosta hakle stejo, jako běchu wolijowa wanja motora přeražena a airbagaj aktiwowanej. Wotwlečenske wozydło njemóžeše městno docpěć. Wohnjowi wobornicy přiwjazachu awto tuž k tramwajce, kotraž je z tunla wućahny. Test alkohola wunjese pola šofera šwarne tři promile. Dokładne wobstejnosće njezboža w měšćanskim dźělu Barrandov njejsu dotal znate.
75 hotdogow w běhu dźesać mjeńšin zjědł je 36lětny Joey Chestnut w New-Yorkskim parku Coney Island a je tak swój rekord z lěta 2018 wo jednu kołbasku polěpšił. Chestnut je wubědźowanje mjeztym 13. króć dobył. Pola žonow móžeše zakitowarka titula Miki Sudo z 48,5 hotdogami tohorunja nowy rekord nastajić. Koronapandemije dla wotmě so zarjadowanje bjez přihladowarjow.
To a tamne (03.07.20)
Z kófroweho ruma wisace wopuški su w Hornjej Bayerskej a Tirolu zasadźenje policije zawinowali. Njejednaše pak so wo wopor zawlečenja abo mordarstwa, ale wo žort. Šofer awta bě periku włosow cyle wědomje tak w awće připrawił. Po jeho słowach bě to „satira“, kotraž budźe za 52lětneho dosć droha. Policija je jemu nětko zličbowanku 1 300 eurow za zasadźenje pósłała. Wšako bě samsneje přičiny dla před tydźenjemi hižo raz za nim pytać dyrbjała.
Štyri shetlandske wowcy staraja so wotnětka wo łuki w Podstupimskim Ludowym parku. Z projektom chcedźa pruwować, hač je zmysłapołne zelenišća wotpasć dać, zamołwići parka zdźěleja. Dyrbjał-li pospyt wuspěšny być, chcedźa stadło powjetšić. Shetlandske wowcy su jara skromne a robustne.
To a tamne (02.07.20)
Kruwy nastróžić a to w interneće prezentować njeje žadyn žort, ale smjerć strašne a na njedobro derjeměća skotu. Na to skedźbnja Němski zwjazk ratarjow. Hłowna přičina kritiki je nowy trend na internetnej platformje TikTok. Tam ludźo z rukomaj machajo kruwam napřećo smala, doniž wone panisce njećěkaja. Wideja na to w interneće pokazuja. Ratarjo warnuja: Kruwa je hač do 700 kilogramow ćežka a móže njemdrje reagować.
Diamant je na internetnej awkciji wjace hač dwaj milionaj dolarow wunjesł. Je to najwyša płaćizna, kotruž su hdy na ryzy internetnym přesadźowanju docpěli, zdźěla awkciski dom Christie’s w New Yorku. 31 ludźi ze štyrjoch krajow bě so online wo diamant wubědźowało. Dobyćer zapłaći 2,1 milion dolarow, štož je něhdźe 1,9 milionow eurow.
To a tamne (01.07.20)
Kniha wo prezidenće USA Donaldźe Trumpje njesmě najprjedy raz wuńć, kaž je sudnistwo w New Yorku rozsudźiło. Nowostku „Přewjele a nihdy dosć – kak je moja swójba najstrašnišeho muža swěta stworiła“ spisała je sotrowča prezidenta Mary Trump. Tón wšak twjerdźi, zo jewja so w knize informacije, kotrež su w kruhu swójby jako potajnosće zastopnjowane. 240stronska kniha ma 29. julija wuńć.
Porik z kamelom je w předpomorskim Luckowje zasadźenje policije zawinował. Zwěrjo steješe wo połnocy wosrjedź města na trawniku. Zastojnikam 21lětna Pólka a jeje francoski přewodnik rozłožištaj, zo putnikujetaj z pólskeho Szeczina do Parisa. Kamel słuži jimaj jako nošer wačokow. Dokelž njeběchu swój dnjowy cil docpěli, chcychu w Luckowje přenocować. Ze Szczecina do Parisa je 1 200 kilometrow.
To a tamne (30.06.20)
Kaž nan, tak syn – to drje su sej policisća w Mettmannje pola Düsseldorfa myslili, jako přińdźe 80lětny po sćazane awto swojeho syna. Toho běchu wospjet bjez dowolnosće za wodźidłom lepili a jemu na to jězdźidło wzali. Jako so nětko nana za papjerami prašachu, wućahny tón njepłaćiwu dowolnosć z lěta 1975. Po tym zo bě hejaty starc připowědźił, zo budźe wón z awtom dale jězdźić, su po sudniskim wukazu tež jeho awto sćazali.
Kruwu z płuwanskeho basenka wuchowali su wohnjowi wobornicy w awstriskim Knittelfeldźe. Wona bě z pastwy ćeknyła a do basenka padnyła. Z pomocu krana 600 kilogramow ćežke skoćo skónčnje z wody zběhnychu. Skótny lěkar je wobsedźerjej přepoda. Na to pak dyrbjachu swimmingpool z 65 000 litrami wody najprjedy raz wurjedźić.
To a tamne (29.06.20)
Pjany šofer awta ze sobujěducymaj na třěše je w Bayerskej jězbnu dowolnosć přisadźił. Spodźiwna jězba bě zastojnikam při wobchadnej kontroli w hornjoallgäuskim Durachu w nocy na sobotu napadnyła. Pola šofera zwěsćichu 1,30 promilow alkohola a wzachu jeho sobu k wotewzaću kreje. Towaršej dyrbještaj z třěchi zalězć a domoj nóžkować.
Hrajkowa pistola w zaku cholowow je w Bayerskej zasadźenje policije zawiniła. Starosćiwy wobydler bě policiju zazwonił, rozprawjejo wo wobrónjenym mužu w hosćencu. Na to přijědźechu wjacore policajske awta. Při kontroli 30lětneho zastojnicy zwěsćichu, zo so přimadło pistole, kotrež bě widźomne, originalnej bróni chětro runa. Tamny dźěl pak bě hnydom jako hrajka spóznajomna. Muž njetrjeba so tuž chłostanja pozdatneho wobrónjenja dla bojeć.
To a tamne (26.06.20)
Zo piwo tež rostlinam tyje, pokaza přikład z Irskeje. Statysacy sudow napoja su zawrjene korčmy piwarni Guinness wróćili. Předewzaće pak njeje tónle nadbytk preč kidało, ale wulke mnóstwo jehlinowcam přiliwało, kotrež su na to jara derje narostli. Tež do biopłunowych připrawow su piwo dali. Wot 4. julija smědźa korčmy-puby w Jendźelskej zaso wotewrěć, štož piwarnju jara zwjesela. Hinak hač rostliny wšak ludźo, kotřiž sej Guinness jara chwala, piwo zapłaća.
Fenomenalny wustup we wulkej wysokosći mějachu hudźbnicy nětko w balonje nad Cloppenburgom. Dokelž njemóža publikum tuchwilu z koncertami zawjeselić a tuž tež žane fenki njezasłuža, chcychu z akciju na swoje ćežke połoženje skedźbnić. Cyłe město je wutoru wječor jónkrótne předstajenje dožiwiło.
To a tamne (25.06.20)
Móšnju ze 460 eurami namakała je wutoru popołdnju 13lětna holca w Drježdźanach blisko Hłowneho dwórnišća a je ju hnydom policiji přepodała. Sprawnosć chcedźa zastojnicy nětko honorować a jej darik přepodać. Hač tež wot wobsedźerja móšnje něšto dóstanje, to so hišće pokaza. Winowatosć za to dźě žana njewobsteji.
Dwaj razaj wob lěto narodniny swjećić smě nětko 15lětny młodostny z porynsko-pfalcskeho městačka Kirn. Na dompuću ze zetkanja z přećelemi bě wón tak mučny, zo so na kolije železnicy lehny a njepytny ani, kak regionalny ćah přijědźe. Lokomotiwnik bě jeho wuhladał a zawoła policiju. Zastojnicy dyrbjachu młodostneho samo budźić, tak kruće wón spaše. Zo je tajku strašnu situaciju přežiwił, jemu scyła wědome njebě.
To a tamne (24.06.20)
Jendźelske korčmy-puby wopytać je koronapandemije dla hižo dlěje hač tři měsacy zakazane. To drje nochcyše wjac hač sto ludźi akceptować a je so w jednej tajkej zetkało, zo bychu sej zaso raz zhromadnje připili. Po wulkej žlokańcy pak njesměrnje harowachu, zo wołachu wobydlerjo policiju, kotraž ilegalne zetkanje skónči. Młodźi ludźo pak so tomu chětro wobarachu a „so žałostnje zadźeržachu“, kaž w policajskej rozprawje steji.
Ze swojej kameru swójske wuchowanje filmował je 43lětny šofer awta na A 73 pola Forchheima. Wón bě kontrolu nad swojim jězdźidłom zhubił a tak zražku zawinił. Wón a 49lětna sobujěduca njemóžeštaj ćežko zranjenaj a zatłusnjenaj samaj z awta wulězć. Po wšěm zdaću pak měješe muž znajmjeńša hišće mocy dosć filmować, kak su jeju wohnjowi wobornicy wuswobodźili.
To a tamne (23.06.20)
Trójce klepać, wótře „abrakadabra“ wołać a so spěšnje zminyć: 13lětny hólčec w zwjazkowym kraju USA Delaware je sej přał, zo roznošowar póšty tak jedna. A póstownica je spodźiwne přeće woprawdźe chutnje brała, je runje tak postupowała a samo přez žiwy płót skočiła. Wobkedźbowanska kamera bě wšitko natočiła, a tak je widejo mjeztym hit na Facebooku. Mać hólčeca ma „wulki respekt před roznošowarku. Byrnjež zawěsće wjele stresa měła, je wona přeću mojeho syna z energiju a lóštom wotpowědowała. To mje wjeseli.“
Wosebje chrobłeho paducha je policija nětko w Nürnbergu lepiła. Jako jeho zastojnikaj sputaneho z drogerije wodźeštaj, je sej 28lětny přiwšěm hišće blešku parfima do zaka tyknył. Hakle na straži so jemu bleška z drohotnymi kapkami ze zaka suny. Kak bě sputany do regala sahnyć móhł, nochcyše pakostnik wězo přeradźić.
