To a tamne (12.12.17)
Wosrjedź Rennsteigoweho tunla na awtodróze A 71 staj so njedźelu wječor šoferaj do włosow dóstałoj. Kaž durinska awtodróhowa policija zdźěla, je jedyn tamneho pola Gräfenrody wuspinał. Na to staj wobaj wozydło wopušćiłoj, do so biłoj a dale jěłoj. To wšo je jenož někotre mjeńšiny trało a njebě žadyn „bój w dźewjeć kołach“. Wobchad w tunlu bě přiwšěm krótki čas přetorhnjeny. Swědcy su zastojnikow informowali.
Zo by ludźi k tomu pohnuł mobilny telefon wužitnje nałožować, farar Alessandro Palermo na italskej kupje Sicilskej tež handyje žohnuje. Wěriwi měli na jutřišim dnju swj. Lucije swój mobilny telefon do cyrkwje San Matteo w měsće Marsala sobu přinjesć, piše farar w socialnych syćach. „Towaršnosć wotwisuje wot handyja, runočasnje pak nochce rozumić, kak maš jón wužiwać.“
To a tamne (11.12.17)
Rukopisnej cedlce z lěta 1777 su eksperća při restawrowanskich dźěłach na Jězusowej postawje w španiskim Sotillu de la Ribera (prowinca Burgos) našli. Storčili běchu na njej w prózdnicy skulptury, jeje zadku. Kapłan katedrale w bliskim Borgu de Osma Joaquín Mínguez bě tehdy informacije ze swojeho časa wo hospodarstwje, nabožinje, politice a kulturje zawostajił, kaž medije rozprawjeja. Rukopisne dokumenty w prózdnicach skulpturow namakać je jara njewšědne.
Dokelž je młody muž na wuznamnym Panoramahighwayju 1 swoje awto wopušćił, byrnjež poprawom wohnjowemu infernu wućeknyć dyrbjał, je wón małeho nukla z palaceho kerka před smjerću wuchował, maja jeho w interneće za rjeka. Kaž rěkaše, bě wot fotografa lokalneho powěsćoweho sćelaka KABC filmowane widejo připadnje nastało.
To a tamne (08.12.17)
Rumpodichej list pisać je mnohim dźěćom wulke wjeselo – nic pak šěsćlětnemu skeptikarjej z USA, kiž měješe w šuli „Santa Clausej“ pisać. Jeho list je nětko w syći wulki zajim zbudźił. Hólčec wot rumpodicha wjele njedźerži, a cyłej hołk a tołk wokoło tohole muža jemu na čuwy dźetej. Wón wě, zo nima Santa we woprawdźitosći žadyn register hrěchow. Nimo toho pachoł zwěsća: „Wo mjerzanjach, kotrež sym ja w žiwjenju hižo měł, ty scyła ničo njewěš!“
Eventowe předewzaće smě zarjadowanja za firmy z titlom „olympiada na burskim statoku“ zwičnjeć. To je Mnichowske wyše krajne sudnistwo w powołanskim jednanju skóržby Němskeho olympiskeho sportoweho zwjazka dla rozsu- dźiło. Zwjazk je skoržił, dokelž bě předewzaće bjez dowolnosće mjeno olympiskich hrow za sebje wužiwało a tak pječa zakoń wo škiće olympije raniło.
To a tamne (07.12.17)
Njezwučeny wopytowar z čerwjenym płašćom, čećikatej měcu a brodu je žrawcy w Mnichowskim wulkoakwariju wobdarił: Na dnju swjateho Mikławša je předrasćeny nurjak do oceanoweho basenka z 20 družinami žrawca stupił. Wón je „pěknym rybam“ mału woblizanku přinjesł, rozprawja rěčnica akwarija Sealife. Njeběchu to žane mandariny abo worjechi, ale makrele a małe čornicy.
Njewinowaty wabjenski dar k hodźom je před pozadkom wudrěwanja DHL wulkozasadźenje policije w Ulmje wuskutkował. Zastojnicy buchu wčera do apoteki wołani, dokelž je tam paket bjez podateho wotpósłarja dóšoł. Po dobrej hodźinje su alarm zběhnyli. Paket bě normalna posyłka z wabjenskim darom, kaž policajska rěčnica wuswětla. Mějićel lěkarnje bě so po warnowanju před paketowymi bombami w Němskej měł.
To a tamne (06.12.17)
Z njewšědnej kritiku reaguja wobchody w Stuttgarće na wotewrjenje dalšeje filiale Primark. Kupcy irskeho tekstilneho discountera měli swoju runje kupjenu nowu drastu do kontejnera ćisnyć, kotryž bu jeno tohodla nastajeny, iniciatorojo namjetuja. Za wotpadki tam wčera zezběrane drasty pak nimaja, bědni měli je dóstać. Sumu z předanje wšitkich dźělow w tonje chcedźa dobroćelskej organizaciji darić. Kritikarjo wumjetuja Primarkej nade měru niske płaćizny.
Byrnjež astronawća jedne z napjećišich powołanjow měli, dyrbja so wšelakeho wjesela žiwjenja wzdać. Tak skoržeše Italčan Paolo Nespoli, kiž přebywa dlěje hač 100 dnjow na swětnišćowej staciji ISS, zo tam pizzu jara paruje. Jeho nakromne přispomnjenje přewodźerjo na zemi słyšachu. Swětnišćowy transporter Cygnus je nětko wšitke přičinki za mału pizzowu party w swětnišću dodawał.
To a tamne (05.12.17)
Runje do wabjenskeje tafle „dele z płuna“ je chwatny šofer blisko durinskeho města Gery prasnył. 20lětny bě njedźelu wječor na zasněženej awtodróze A 4 wobstejnosćam přespěšnje jěł a kontrolu nad wozydłom zhubił, kaž policija zdźěla. Na to zrazy do tafle, zwróći so a přizemi w přirowje. Lochce zranjeneho dowjezechu jeho do chorownje, awto pak je dospołnje skóncowane.
Najsławnišeho ptaka kraja pytaja w Nowoseelandskej. Lětanja njekmany papagaj – tak mjenowany kakapo – z mjenom Sirocco je hižo něšto měsacow zhubjeny. 20 lět stare zwěrjo je na samotnej kupje doma, kotraž leži na delnim kóncu južneje kupy Nowoseelandskeje. Wšě pospyty jeho namakać wostachu dotal njewuspěšne. Trochuja, zo je scyła hišće něhdźe 150 kakapowow. Družina ma swój žiwjenski rum jeničce w Nowoseelandskej.
To a tamne (04.12.17)
Dokelž je swědk naheho muža w kapałce widźał, je policija natutkany porik při jeho zetkanju myliła. Přichwatana patrulja zwěsći na chórje cyrkwički we Waldshuće-Tiengenje porik w starobje 29 a 27 lět, při čimž bě muž woprawdźe nahi. Kaž so pozdźišo wukopa, bu porik hižo krótko do toho při seksualnych jednanjach w kapałce tamnišeje chorownje lepjeny. Wězo dyrbještaj muž a žona cyrkej hnydom wopušćić a mataj nětko z pjenježnej pokutu ličić.
Američan Mike Hughes njespušći w žanym padźe swój plan, ze samotwarjenej raketu do swětnišća lećeć. Kaž tamniša telewizija Fox 5 rozprawja, móhł wón swój eksperiment snano dźensa wotměć. 61lětny wunamakar a stuntman je swoju samospaslenu raketu na priwatnej ležownosći w małym Amboyju w kaliforniskej pusćinje Mojave natwarił.
To a tamne (01.12.17)
Z nimale 55 000 swěčkami staj mandźelskaj Borchart w delnjosakskim Delmenhorsće swój dom a ležownosć pyšiłoj. Njeje ani štoma ani kerka bjez wobswětlenja. Morjo swěčkow chcetaj 1. adwentnu njedźelu zaswěćić, we wobłuku party z horcym winom, na čož wočakujetaj mandźelskaj hač do 700 hosći. Swjedźeń ma tradiciju, wšako pyša Borchartecy swoju chěžu 16. raz. Započało je so wšitko z třomi swěčkowymi rjećazami a třomi litrami horceho wina. Lětsa maja 55 000 swěčkow a 150 litrow horceho wina.
Křiwe a šmotawe šwablički, kotrež normje njewotpowědowachu, steja w srjedźišću skurilneje přehladki muzeja wěcow w Berlinje-Kreuzbergu. Widźeć je 814 šwabličkow ze zběrki Petera Herberta, kotraž wopřijima 2 800 eksemplarow. Zběrka bě w 1980tych lětach tema wusyłanja „Außenseiter–Spitzenreiter“.
To a tamne (30.11.17)
Na adwentničce wopity před šefom/šefinu so blamować, štó to hižo chce? W Norwegskej su nětko app wuwili, kotraž ma pomhać najhóršemu zadźěwać. Program so přizjewi, hdyž je radźomne alkoholowu přestawku zapołožić abo radšo tola domoj hić. Tak móža wužiwarjo aplikacije tróšku natutkani a dobreje nalady swjećić, bjez toho zo kontrolu zhubja, měnja jeje wuwiwarjo. Norwegčenjo mjenuja tule wobstejnosć „lykkepromille“, přełožene „promil zboža“.
Rekordne 56 lět je muž ze Sauerlanda bjez jězbneje dowolnosće po puću był. 74lětneho ze sewjerorynsko-westfalskeho Hüstena su tydźenja po mjeńšim njezbožu lepili. Najprjedy zastojnicy zwěsćichu, zo muž papjery při sebi nima. Krótko na to wšak so wukopa, zo scyła žane nima. Jako młodźenc drje bě něhdy z jězbnej dowolnosću započał, je pak do wójska dyrbjał a tak njeje ju ženje dokónčił.
To a tamne (29.11.17)
Pokutu 35 eurow płaćić měješe po zdaću na demencu schorjeny 86lětny w Düsseldorfje, dokelž bě po měnjenju porjadniskeho zarjada předołho na čakanskej ławce busoweho zastanišća sedźał. Sobudźěłaćerjej zarjada pak njebě wědome, zo je rentnar chory a njepřisłuša scenje bjezdomnych a pičkow. Zarjad so zamołwi a je jednanje zastajił. Rentnar njetrjeba tuž žanu pokutu płaćić.
Zadobywar je 200 kožuchow w hódnoće něhdźe 550 000 eurow w nocy na póndźelu z priwatneho bydlenja w ruskim Komsomolsku nad Amurom spakosćił. Přichadźaca mějićelka nazajtra zwěsći, zo běchu wšitke drohotne płašće z nerca fuk. Přepytowarjo nańdźechu je bórze na to w bliskej garaži. Ćopłe kožuchi su w Ruskej přewšo požadane a płaća samo jako statusowy symbol. Rubježnistwa dla hrozy skućićelej nětko hač do dźesać lět jastwa.
