To a tamne (27.10.17)
Njenadźicy sama w lětadle z cyłkownje 189 městnami po puću do Grjekskeje sedźała je 57lětna Karon Grieve ze Šotiskeje. Za wosebity serwis bě přeličene 50 eurow zapłaćiła, kaž wona měnješe. Wězo je sej městno sama wupytać móhła. Wšitcy z personala w Boeing 737 znajachu jeje mjeno. Tež za swój wačok njetrjebaše so po přizemjenju nihdźe nastupić. Tón jej stewardes hišće w lětadle do ruki stłóči.
Wirtuelnu wustajeńcu na 5 500 kwadratnych metrow wulkej wobrazowce wobhladać móža sej wopytowarjo New Yorka. Na znatym Times Square zwobraznjeny je wódny swět ze wšěmi móžnymi mórskimi žiwochami, při čimž wopytowar sam suchi wostanje. Digitalna technika z 3D-wobrazami a specialnymi efektami to zmóžnja. Ludźo sej tajku wosebitu wustajeńcu hižo dlěje přeja, wšako móžeš tam ryby w jich wobswěće wobkedźbować, bjez toho zo wone ćerpja.
To a tamne (26.10.17)
Z traktorom a synowobroćakom na A 1 po puću był je pod wliwom drogow stejacy młody ratar. Jězdźidło ze spěšnosću jeničce 50 kilometrow na hodźinu je wězo tež kedźbnosć policajskeje wobsadki zbudźiło, kotraž šofera skónčnje zadźerža. 18lětny twjerdźeše, zo bě jeho nawigaciski nastroj na awtodróhu wjedł. Drogowy test pak wunjese woprawdźitu přičinu jeho ozabłudźenja – marihuanu.
Z jězora wšitke ryby naraz wułójili su njeznaći pola Heilbronna. Po informaciji policije bě to třeći tajki pad po lětomaj 2012 a 2015, zo njeje w jězoru městačka Löwenstein hižo žaneje ryby. Wobsedźer tuka, zo su paduši jězor w času wot 13. do 25. septembra pod milinu sadźili a tak wšitke hač do sto pstruhow pohłušili a wułójili. Policija z toho wuchadźa, zo jednaše so stajnje wo samsnych skućićelow. Škoda wučinja něhdźe 400 eurow.
To a tamne (25.10.17)
Za chětro absurdnu probu zmužitosće žněja štyrjo mužojo w Awstralskej směch a kritiku. W přistawje Port Douglas płuwachu woni do paslow za krokodile. Tam so fotografowachu a stajichu fota do interneta, hdźež so spěšnje rozšěrjachu. Z paslemi chcychu městni zamołwići štyri metry dołheho krokodila popadnyć, kotryž bě njedawno 79lětnu žonu morił. Mužojo, za kotrymiž hišće pytaja, maja za swoju „hłupu a ilegalnu“ akciju z pokutu 15 000 dolarow ličić.
Wosrjedź wulkoměsta šotiske horiny dožiwić móža ludźo nětko w New Yorku. Na dwórnišću Grand Central Station je modowe předewzaće škleńčanu chěžu z wotpowědnymi wobstejnosćemi, kaž dešćom a mochom horin, wuhotowało. Wosebita modowa drasta ma zajimcow tam před włóžnym powětrom škitać.
To a tamne (24.10.17)
Dokelž stej muža naheho w lěsu wusadźiłoj, matej so žonje nětko před sudnistwom w Frankfurće nad Wódru zamołwić. Jedna z wobskorženeju je bywša mandźelska wopora, tamna jeho bywša přećelka. Wobě čuještej so wot muža wobćežowanej. Před lětomaj stej jeho tuž blisko Berlina nadpadnyłoj a hrozyłoj jeho zatřělić. Zeslěkany dyrbješe wón hač do 100 ličić. W tym času so žonje z awtom zhubištej. Nahi a bjez orientacije je muž skónčnje dróhu našoł a awto zadźeržał.
Najrjeńši dźeń žiwjenja skazył je sej muž w delnjosakskim Celle. Jenož někotre hodźiny po wěrowanju jeho policija zaja, a tak dyrbješe kwasnu nóc w jastwje wotsedźeć. Přičina jeho zajeća wšak njeje runjewon rjana. Na kwasnym swjedźenju bě wón dospołnje pjany swoju mandźelsku bił a jeje dźowku za włosy torhał. Tamni hosćo njewědźachu sej žaneje rady a wołachu policiju.
To a tamne (23.10.17)
Jónu za 1 600 eurow bencin tankował a so nablaku zminył je muž w Nettetalu. Do awta, kotrež wupadaše wotwonka normalne, bě wulki tank zatwarjeny. Do njeho hodźeše so cyłkownje něhdźe 1 000 litrow bencina. Połnje natankowane jězdźidło móžeše pak jenož hišće pomałku jěć. Dwaj centimetraj bě rozdźěl mjez dróhu a dnom awta. Tuž móžeše policija skućićela spěšnje lepić.
Psy móža swoju mimiku zaměrnje jako komunikaciski srědk zasadźeć. Tole wuchadźa z britiskeje studije fachoweho časopisa Scientific Reports. Biologowka uniwersity Portsmouth Juliane Kaminski je tole ze swojim mustwom zwěsćiła. Cyłkownje 24 psow su k tomu přepytowali. Mimiku zwěrjeća tuž zasadźeja, hdyž chcedźa kedźbnosć ludźi zbudźić a zwisk z nimi nawjazać, toho su sej wědomostnicy přezjedni.
To a tamne (20.10.17)
Žona šefa chudeho kraja w Africe smě tež raz stokaratny diamantny pjeršćeń w hódnoće 1,35 milionow dolarow měć. Ke kwasnemu dnjej je sej mandźelska prezidenta Simbabwe Grace Mugabe přeće spjelniła a wosebitu debjenku skazała. Zjawnosć njeby drje ženje wo tym zhoniła, tola pjeršćeń je nětko pad za sudnistwo. Po měnjenju Mugabe njebě debjenka kwalitatiwna dosć, tuž žada sej wot wikowarja 1,23 miliony dolarow wotškódnjenja.
Z rekordnymi 6,52 promilomaj w kreji su wopiteho muža w Mnichowje našli. Wutoru bě so na tamnišim dwórnišću zwjezł, zwjazkowa policija zdźěli. Kaž so wukopa jednaše so wo 61lětneho ze sakskeje Šwikawy. Policija dowjeze muža do chorownje. Kaž zastojnicy dale rozprawjachu móžeše wón samo hišće rěčeć a twjerdźeše, zo je tola jenož jednu měrku (Maß) piwa pił.
To a tamne (19.10.17)
Při pospyće swój kluč z gullyja wudźić, je muž w Hamburgu tčacy wostał a z tym wobšěrne zasadźenje wohnjoweje wobory zawinił. Hač k bjedram bě wón we wuskej dźěrje popadnjeny. Jenož noze běštej hišće widźeć. Hakle po 40 mjeńšinach móžeše wohnjowa wobora muža wuswobodźić. Za to běchu powjazy při rěblu woborneho awta připrawili a jeho z nimi wućahnyli. 23 wobornikow bě na akciji wobdźělenych. A kaž nowina Bild rozprawja, dźeržeše muž při wuchowanju swoje kluče kruće w rukomaj.
1,3 tony kokaina wušiknje jako PVC-roły tarnowane je peruska policija našła. Kaž so wukopa běchu skućićeljo drogi z materialom plastikowych rołow předźěłali. Cyłkownje je policija 17 ludźi zajała. Mjez nimi tež chemikarja, kiž měješe w Mexiku drogi z plastiki wurozpušćować, zdźěli peruske nutřkowne ministerstwo.
To a tamne (18.10.17)
Ličił je z něhdźe dźesać eurami, tola konto hrajerja lota z Mannheima rosće nětko wo samo jednu milionu eurow. Zmóžniło je jemu tole wosebite wulosowanje lotoweje centrale, hdźež njewotewzate pjenjezy mjez wobdźělnikami wulosuja, kotřiž su tři ličby prawje nakřižowali.
Małe zwěrjata móža nastupajo twarske projekty tójšto wuskutkować. W najnowšim padźe jedna so wo žurka we wokrjesu Schweinfurt. Tam chcychu poprawom wobjězdku a kružny wobchad twarić, tola z toho tak spěšnje ničo njebudźe. Twarske dźěła dyrbja najprjedy raz poł lěta přetorhnyć. Twarsku ležownosć je sej žurk mjenujcy lětsa za swój zymski kwartěr wupytał. Při spinkanju njesmě tuž myleny być. Hdyž je wuspinkany, štož drje budźe hakle kónc apryla, smědźa w Europje škitane zwěrjatko fachowje prawje přesydlić.
To a tamne (17.10.17)
Dobry policist ma stajnje słužbu. Tak bě to tež nětko na njedawnym zawodnym wulěće kedźbliwych zastojnikow. Jako so zhromadnje nad wuhladom města Waldshut-Tiengen wjeselichu, wuhladachu na terasy bydlenja spodźiwne rostliny. Tuž wopytachu policisća 24lětneho wobydlerja. Do toho běchu hišće přepytowanski wukaz wobstarali a młodemu mužej sobu přinjesli. Nimo konopowych rostlinow namakachu zastojnicy hišće 40 gramow marihuany a amphetaminy. Na to drje bě wunošny zawodny wulět.
Kompjuteroweho zmylka dla běchu 30 wopytowarjow hermanka w jendźelskim měsće Hull hodźinje dołho w gondli Power Towera 21 metrow nad zemju jeći. Z kranom wohnjowa wobora jednotliwych pasažěrow skónčnje wuswobodźi. Tole zdźěli nětko Hullski měšćanski zarjad.
To a tamne (16.10.17)
Dokelž je ratar při syčenju myš přejěł, ma wón 50 eurow chłostanskeho pjenjeza płaćić. Kedźbliwy zarjadnik je tole mjenujcy wobkedźbował. W nowym předpisu krajneho přirodoweho zakonja Sewjerorynsko-Westfalskeje je zrjadowane, kak maja ludźo swój trawnik syc. A to stajnje wot nutřka na wonkownu hranicu płoniny, tak zo móža zwěrjeća hišće twochnyć. Wo tym drje ratar hišće ničo słyšał njebě.
Šumjenje aparata a z tym wopak zrozumjeny telefonat je zasadźenje nuzoweje słužby wuskutkowało. Poprawom wšak chcyše 10lětny jenož swoju mać pola policije přeradźić. Wona běše synej mjenujcy tablet preč wzała. Tuž zawoła wón zastojnikow. Při telefonje płakajo wón zdźěli, zo je mać tablety wzała. Policija měła spěšnje přińć. Doma pak nańdźechu zastojnicy zadźiwanu mać, kotraž móžeše situaciju wujasnić.
