To a tamne (03.08.17)
Pos bě wina, a zo dyrbješe wohnjowa wobora přijěć. Jako wobsedźerka runje doma njebě, skoči jeje lubušk w durinskim Altenburgu na kuchinske kachle a je při tym zaswěći. Na kachlach ležaca papjera so na to zapali. Jako alarmowani wohnjowi wobornicy dojědźechu, bě najhórše hižo nimo: Papjera drje so hišće dymješe, hewak pak so ničo njepaleše. Tež pos so na zbožo zranił njebě.
Z mjezwočom basista rockoweje skupiny Kiss je so ćelatko w zwjazkowym staće USA Texasu narodźiło. „Genie“ wupada kaž Gene Simmons z pomolowanym mjezwočom na koncertach skupiny. Předewšěm hdyž skoćatko jazyk pokazuje, je podobnosć na hudźbnika wočiwidna. Gitarist bě w 70tych lětach z tajkim čorno-běłym pomolowanym mjezwočom wustupował. Ćelo „Genie“ je so minjeny pjatk narodźiło.
To a tamne (02.08.17)
Z wětřikom wotnjeseny narodninski dar k 70ćinam je muž w Sakskej tola hišće dóstał. Policija je jemu wjacore z cyłkownje 550 eurami pjelnjene powětrowe balony wróćiła. Te bě muž ze Stollberga wot swojich dźowkow dóstał. Z heliumom pjelnjene balony pak přez wotewrjene terasowe durje twochnychu a po 150 kilometrach na kolesowanskej šćežce pola Polenza přizemichu. Tam je 14lětna namaka a policiji woteda.
Zastup do hosćenca wotpokazać chcychu sydom britiskim duchownym w Cardiffje, dokelž mějachu jich za wobdźělnikow fety k zakónčenju nježenjenosće. „Sorry, pola nas njejsu ani předrasćenja ani tajke fety dowolene“, rjekny jim stražnik při durjach. W poslednim wokomiku so manager hosćenca duchownych dohlada a prošeše jich nutř. Z darmotnym piwom bě problem ze swěta.
To a tamne (01.08.17)
Z awtom do swimmingpoola zajěła je 18lětna započatkarka w bayerskim Niederwinklingu we wokrjesu Straubing. Do toho bě so na křižowanišću druheho awta nastróžiła a wodźidło nabok storhnyła. Wona zajědźe na ležownosć, přerazy kerčinu a padny do poola. Ludźo z tamneho awta přichwatachu jej na pomoc, mjeztym zo so awto we wodźe podnuri. Šoferka a 17lětny sobujěducy so snadnje zraništaj. Škoda na awće: 40 000 eurow.
Prěnich 15 000 hosći lětušeho 28. heavy-metal-spektakla w schleswigsko-holsteinskim Wackenje je wčera dojěło. Najpozdźišo štwórtk wočakuja tam 75 000 wobdźělnikow. Hač do njedźele prezentuje so potom 150 rockowych hudźbnikow. Najwjetši festiwal tohole razu na swěće pak zahaja zajutřišim tradicionelnje z dujerskim koncertom Wackenskeje dobrowólneje wohnjoweje wobory.
To a tamne (31.07.17)
Kokošace a howjaze mjaso z bleše pić budźe wot septembra móžno. Peter Klassen, rězniski mišter z Triera, je napoj wuwił a chce jón po wšej Němskej rozšěrjeć. Móhło to napojowa jědź za ludźi być, kotřiž su wjele po puću, rjemjeslnikow, šoferow nakładnych awtow, ale tež pućowarjow abo sportowcow. Klassen je sej wědomy, zo změje napoj tež přećiwnikow. Přiwšěm hodźi so do časa smoothiejow a spěšnojědźow, wón rjekny.
Na ilegalnu technoparty je so wjace hač 5 000 přewažnje młodych ludźi sobotu njedaloko čěskeho Nymburka zhromadźiło. Policija jich bjez wuspěcha namołwješe teren wopušćić. Tójšto rejwarjow steješe pod wliwom alkohola a drogow. Tuž móžachu hakle wčera domoj jěć. Policija bě prezentna, njetrjebaše pak zapřimnyć. Wona zaraći dróhi, zo njebychu so dalši přidružili.
To a tamne (28.07.17)
Pasažěrow w nižozemskich železnicach přichodnje hižo z „damy a knježa“ njenarěča, ale jenož hišće z „pućowacy“. Železniska towaršnosć NS to připowědźa, dokelž chce, zo bychu so wšitcy „w ćahu jenak witani čuli“. Tež w stolicy Amsterdamje su wobzamknyli město dotalneho „česćene damy a knježa“ jenož hišće „lubi ludźo“, „lubi Amsterdamčenjo“ abo „lubi přitomni“ wužiwać.
Wulki prask a jaskrawy błysk stej wobydlerjow wjacorych štwórćow Berlina w nocy na štwórtk ze spara budźiłoj. Přičina bě krótkospjeće w milinarni, kotrež bě šup w 1 100 kilovoltowym transformatorje zawinił. Kak bě so zwěrjo do derje zawěsćeneho objekta energijoweho zastaraćela Vattenfall dóstało, njemóža sej rozjasnić. Šup přežiwi a ćekny.
To a tamne (27.07.17)
Tři dny přećiwo sebi tenis hrać budźetaj sportowcaj w delnjosakskim Twistringenje. Při tym chcetaj Christian Masurenko (49) a Dennis Heitmann (34) nowy swětowy rekord nastajić. Dźensa rano we wosmich staj hrać započałoj a chcetaj njedźelu wječor w šesćich, po 82 hodźinach, skónčić. Jenož někotre mjeńšiny chcetaj sej za jědź, spar a nuznik popřeć. Hra je tež přez livestream w interneće widźeć. Trenar, lěkarjo a fyzioterapeuća ekstremneju sportowcow přewodźeja. Energiju čerpać chcetaj wonaj z poprjancow, poliwki a nudlow. Přihladowarjo maja jeju přidatnje motiwować.
Z kijom za starych ludźi je 23lětny w Berlinje-Kreuzbergu 41lětneho muža přebił. Do toho bě sej pjenjezy wot njeho žadał. Jako so wón spjećowaše, so 23lětny z kijom do njeho da. Jako pěšcy na pomoc přińdźechu, so rubježnik bjez pjenjez zminy. Policisća jeho njedaloko městna njeskutka nańdźechu. A znowa je muž spytał kij zasadźić, zo by so zajeću wobarał – tónraz wšak bjez wuspěcha. Přećiwo njemu přepytuja nětko rubježnistwa dla.
To a tamne (26.07.17)
Dospołnje nimo kulił je so pospyt žony w Mnichowje, wosace hnězdo na balkonje bydlenja wotpalić. Po tym zo běchu so meble na balkonje zapalili, rozpřestrěchu so płomjenja w bydlenju a na balkon přichodneho poschoda, wohnjowa wobora zdźěli. Wobornicy woheń podusychu. Cyłkownu škodu trochuja na 50 000 eurow. Žona móžeše bydlenje hišće w prawym času wopušćić a so njezrani. Wosace hnězdo njejsu po wohenju hižo namakali, kaž rěkaše.
Štyrilětny je w badiskim Kehlu zasadźenje policije zawinował, po tym zo je chowanje hrał. Kaž policija zdźěli, bě so přiwuzny, kiž měješe na hólca kedźbować, přizjewił a zdźělił, zo je hólc tež po dokładnym pytanju zhubjeny. Na to policija za nim pytaše. Muž so w tym času hišće raz dokładnišo po domje rozhladowaše a namaka štyrilětneho – pod łožom.
To a tamne (25.07.17)
Swětowy kongres rumpodichow wotměwa so tuchwilu w danskej stolicy Kopenhagenje. Wčera ćehnješe 160 wobdźělnikow parady rumpodichow při přijomnych 20 stopnjach po měsće. Na kongresu wobjednawaja tež nowe wužadanja w zastojnstwje: Dźeń a mjenje dźěći mjenujcy do rumpodicha wěri. Santa-kongres zarjaduja wot lěta 1957. Wobdźělnicy su mjez druhim z Wulkeje Britaniskeje, Kanady, Němskeje a Hongkonga.
Zwada z něhdyšim pjasćowarjom je 52- lětneho wjacore zuby płaćiła. Muž bě so w čornolěsnym Unterkirnachu na tym postorčił, zo cuzy pos po jeho zahrodźe běha. Wopity wobsedźer zahrody psa wućěri a storči při tym na 40lětneho pjasćowarja. Tón jeho tak dyri, zo dyrbješe do chorownje. Tež něhdyši bojowy wojowar poćerpje zranjenja w mjezwoču. Policija přepytuje nětko přećiwo woběmaj.
To a tamne (24.07.17)
Wodowa trubka je w Bielefeldźe wulkozasadźenje policije zawiniła. Muž bě zastojnikam zdźělił, zo je runje dweju podhladneju z mašinskej třělbu typa Kalašnikow a kófrom do susodneho domu zastupić widźał. Policija na to z wulkej jednotku přijědźe a mužow w bydlenju překwapi: Jeju „mašinska třělba“ wukopa so jako wulka shisha. Rěčnik policije je zasadźenje hladajo na tuchwilne wěstotne połoženje přiwšěm zakitował.
Z ultralochkim lětadłom wokoło swěta: Šwicarski dyrdomdejnik Xavier Rosset poda so wčera na 400 dnjow trajacy lět. We wjacorych etapach chce wón 80 000 kilometrow zmištrować a 50 krajow wopytać. Hłownje chce kultury a ludźi zeznać a planet pod wšelakimi aspektami přeslědźić, kaž Rosset nowinarjam rjekny. Lětacy nastroj waži 240 kilogramow a je hač do 157 km/h spěšny.
To a tamne (21.07.17)
Šćipata wóń horceje mašiny za rězanje železa je třoch paduchow přeradźiła. Policistam w Kölnje bě při kontroli awto z třomi chětro nerwoznymi mužemi napadnyło. Jedyn z nich bě dospołnje přepoćeny. Mjez jeho nohomaj ležachu baliki pjenjez. W awće bě nimo toho wšelki grat k zadobywanju. Po prěnich zwěsćenjach běchu mužojo w starobje 24 do 31 lět trezor wobchodniskeje rumnosće rozrězali a z njeho pjećcyfrowu sumu pjenjez spakosćili.
Z pjeć wukazami zajeća pytaneho muža je policija w Choćebuzu zajała, po tym zo běchu jeho w ćahu bjez jězdźenki lepili. Při kontroli personalijow so wukopa, zo statne rěčnistwa w Berlinje, Hamburgu, Frankfurće nad Wódru a Braunschweigu muža wšelakich padustwow a njepłaćenych chłostankow dla pytaja. Nětko ma 617 dnjow w jastwje wotsedźeć.
