Na 19. srjedźostawskim dnju žadanja na politiku wobjednawali
Biskopicy (SN/BŠe). Zwjazkowe zjednoćenstwo srjedźneho stawa (BVMW) stajnje wuzběhuje, zo je hłós zawodow regiona. W hospodarskim regionje Drježdźany, kotremuž tež předewzaća Łužicy přisłušeja, zhladuje BVMW na mjeztym wjac hač 700 čłonow. Nowych witachu wčera na 19. srjedźostawskim dnju na Biskopičanskej Butrowej horje. Hesło zarjadowanja bě, zo maja so zawody k swojemu stejnišću wuznawać a zhromadnje agěrować. „K tomu słuša wosebje politiska runina“, podšmórny nawoda wokrjesneho zwjazka Hornjeje Łužicy Wilfried Rosenberg. Hłownje wěnowaše so wón poziciskej papjerje k wólbam Sakskeho krajneho sejma, za kotruž běchu sobustawojo minjene tydźenje swoje namjety zapodali. Nastali su štyri strony žadanjow na politiku.
