Wočakuju wotmołwy
W Błótach na naslědnym wuwiću turizma dźěłaja
Dosć dobre wopytowarske ličby zwěsći Turistiski zwjazk Błóta za lěto 2022. Tež wukrajni hosćo tu rady přińdu. Lětsa chcedźa tam nastupajo naslědne wuwiće turizma dale postupować.
Wětošow (SN/at). Błóta su loni telko hosći přiwabili kaž naposledk do koronapandemije. Kaž Turistiski zwjazk Błóta informowaše, su hač do kónca lěta 2,1 milion přenocowanjow wočakowali, to je samo rekordne lěto 2019 wo 100 000 přenocowanjow přetrjechiło. Přerěznje su hosćo tam tři dny pobyli. Porno předchadźacym lětam woznamjenja to snadnuški postup. W měsacach meja do oktobra najwjace dowolnikow do Błótow přińdźe.
Z přibližnje 9,2 milionomaj dnjowych turistow loni mějachu so akterojo na městnje wulkemu wužadanju stajić. W cyłym pućowanskim regionje bydli něhdźe 200 000 ludźi, połojca z nich w Choćebuzu. Po słowach nowinskeje rěčnicy turistiskeho zwjazka Silvije Jonas „smy hižo intensiwnje při tym, so wo wodźenje wopytowarjow starać a na akceptancu mjez wobydlerjemi za to dźěłać“.
Zelenina jako kołbasa
Weganske „mjaso“ na předań
Transfer wědy je ćežišćo
Łužica chce rozrisanja za sćěhi hórnistwa mjezynarodnje dźělić
Z wudobywanjom surowiznow dźeń a wjace pohórnistwowych krajinow na swěće nastawa. Slědźenski centrum chce so z łužiskimi dopóznaćemi mjezynarodnje wuměnjeć. Mjez druhim dźe wo zestawu pódy a škit dnowneje wody.
Choćebuz (dpa/SN). Dopóznaća wo saněrowanju a wutworjenju naslědnych pohórnistwowych krajinow w nowym łužiskim slědźenskim centrumje maja přiběrajcy tež mjezynarodnu wuměnu zahibać. „Hórnistwowe přestrjenje zwonka Europy su w minjenych lětdźesatkach wobstajenje přiběrali“, rozprawja prezident Zwjazkoweho wustawa za geowědomosće a surowizny (BGR), Ralph Watzel, powěsćerni dpa. To zwisuje z rozrostom swětoweho wobydlerstwa a jeho přiběracym derjeměćom. Hladajo na globalne wuwiće hórnistwo a wjetše płoniny přiběraja. Z tuteje přičiny je tohodla ćim wažniše, hórnistwowe projekty hižo w fazy planowanja na přichod wusměrjeć, wuzběhny profesor a prezident BGR.
Fotowoltaiku nic po modelu złotokoparjow
Njerodny rozmach fotowoltaiki wohrožuje ratarstwo a škit družin – tohodla sej agrarni wědomostnicy změnu zakonskich regulow žadaja. Diskusija so rozestajenjow we Łužicy dótka.
Kiel (SN/mb). Z wida agrarneho wědomostnika Friedhelma Tauby z Kiela je to šicofrena situacija: Na jednym boku su so zwjazki burow za to wuprajili, płoniny z programa za škit družin zaso produkciji žiwidłow k dispoziciji stajić. To je jich wotmołwa na sćěhi ruskeje wójny přećiwo Ukrainje, kotraž je swětowe wiki žiwidłow negatiwnje wobwliwowała. Na druhim boku žerje fotowoltaika jako „mašina ćišća pjenjez“ tež w jeho zwjazkowym kraju Schleswigsko-Holsteinskej, tak Taube, dale a wjac drohotneje pódy. Tydźenik „Zeit“ pak móžeše tež dalšich prominentnych kritikarjow citować. Klaus Müller z centruma za agrarne slědźenje w Braniborskej rěči wo atmosferje kaž mjez „złotokoparjemi“ a wočakuje wopačne rozsudy z fatalnymi sćěhami, kaž na infrastrukturje we wuchodnej Němskej dźewjećdźesatych lět.
Zwada pokročuje
Choćebuz (dpa/SN). Mjez wobswětoškitarjemi a łužiskim energijowym předewzaćom LEAG je zwada dnownu wodu nastupajo znowa wudyriła. Zelena liga srjedu w Choćebuzu kritizowaše, zo wotklumpa LEAG dale bjez dowolnosće dnownu wodu w Janšojskej jamje. Tuta pak wobwinowanje wotpokazuje.
Po słowach energijoweho předewzaća je wone pola krajneho zarjada za hórnistwo, geologiju a surowizny próstwu wo přizwolenje noweje wodoprawniskeje dowolnosće za dobu 2023 do 2044 stajiło. Dokelž pak zarjad tuchwilu hišće znjesliwosć wobswěta pruwuje a k 1. januarej tutoho lěta nowu dowolnosć wuprajić njemóžeše, wón nachwilnje hórniskoprawniski wukaz wuda, kotryž zmóžnja dalše wotklumpanje wody w hórnistwje.
Zelena liga kritizowaše, tajki hórnistwowy wukaz njesłuži wobeńdźenju wobswětowych zakonjow. „Dnowna woda je najwažniši zemski pokład Braniborskeje. Štóž chce wjace hač 10 milionow kubiknych metrow wody wotwodźować, trjeba pruwowanje znjesliwosće wobswěta. Tele mnóstwo překroči LEAG w Janšojskej jamje hižo w běhu někotrych tydźenjow.“
Strowa struktura hospodarstwa po brunicy trěbna
Zwjazkowy hospodarski minister Robert Habeck (Zeleni) chce, zo tež we wuchodnej Němskej prjedy hač w lěće 2038 ze zmilinjenjom brunicy kónča. Jeho stronski kolega a sakski wobswětowy minister Wolfram Günther wočakuje ekonomiski ćišć na předewzaća tónle krok hić. Sakscy rjemjeslnicy žadaja sej w tymle procesu prioritu za strowu strukturu hospodarstwa.
Berlin/Drježdźany (SN/at). Móžnosć dočasneho kónca zmilinjenja brunicy hač do lěta 2030 su Zeleni w koaliciskim zrěčenju z SPD a FDP přesadźili. Po rozrisanju naležnosće w Sewjerorynsko-Westfalskej (NRW) chce zwjazkowy hospodarski minister Robert Habeck nětko Braniborsku, Saksku a Saksko-Anhaltsku k tomu pohnuwać. Wón na to skedźbni, zo měli wšitcy wobdźěleni tajki wustup w konsensu dojednać.
Snadny přirost bjezdźěłnosće
Budyšin (SN/at). Bjezdźěłnosć we wuchodnej Sakskej je loni w decembrje moderatnje přiběrała. Wo tym Budyska wotnožka Zwjazkoweje agentury za dźěło dźensa informuje. Aktualnje je w mjenowanym regionje 17 985 bjezdźěłnych, 414 wjace hač hišće w nowembrje. Porno decembrej před lětom rozrost 1 089 ludźi wučinja. Aktualna kwota bjezdźěłnosće je 6,6 procentow.
Předsydka jednaćelstwa Budyskeje agentury za dźěło Kathrin Groschwald rěči wo „njezměnjenych stabilnych dźěłowych wikach“ we wuchodnej Sakskej. Wuskutki zymy běchu w decembrje 2022 miłe. Mnohe zawody so prócuja, zo bychu swojich fachowcow zdźerželi. Tak je so mjenje ludźi direktnje z dźěłoweho žiwjenja bjezdźěłnych přizjewiło hač w decembrje 2021. „Přiwšěm su dźěłodawarjo dale kedźbliwiši nowy personal přistajić.“
We wobłuku bjezdźěłnostneho zawěsćenja bě pola Budyskeje agentury za dźěło loni w decembrje 6 019 jako bjezdźěłnych registrowanych. We wobłuku zakładneho zawěsćenja mějachu pola jobcenterow Budyskeho a Zhorjelskeho wokrjesa w cyłku 11 966 bjezdźěłnych.
