Na Njepilic statoku 25. raz dworowy swjedźeń woswjećili
Rowno (JoS/SN). Lětsa hižo 25. raz su w Rownom njedźelu dworowy swjedźeń na Njepilic statoku woswjećili. Zajim publikuma je tež po štwórćinje lětstotka nadal wulki – to wuzběhny předsyda spěchowanskeho towarstwa statoka Manfred Nikel w swojim powitanju. „25 lět dworowy swjedźeń – to je 25 lět hajenje serbskich nałožkow a tradicijow. Z našim wobstajnym dźěłom smy je mnoho ludźom sposrědkowali a to tež dale činimy“, wón praji. Wjele druhich swjedźenjow w regionje w tutych lětach wšak přežiwiło njeje. Na Njepilic statoku je wšitko tak wostało, kaž běše so před 25 lětami započinało. Tak je swjedźeń tež lětsa zaso wulku ličbu wopytowarjow přiwabił. Wo to postarali su so pilni čłonojo towarstwa kaž tež wulka ličba čestnohamtskich pomocnikow.
