Krótkopowěsće (31.05.23)

Mittwoch, 31. Mai 2023 geschrieben von:

Ekstremistka zasudźena

Drježdźany. Wyše krajne sudnistwo w Drježdźanach je dźensa pozdatnu lěwicarsku ekstremistku Linu E. wjacorych nadpadow na prawicarskich ekstremistow dla k jastwu pjeć lět a třoch měsacow zasudźiło. Třo dalši wobskorženi dyrbja dwě a tři lěta do jastwa. Přiwisnicy zasudźeneje­ w sudniskej žurli wótře přećiwo wusudej protestowachu. 28lětnej studentce wumjetuja kriminelnu namóc.

Lědma mjenje bjezdźěłnych

Budyšin. W meji běše we wuchodnej Sakskej 19 020 bjezdźěłnych, 329 resp. 1,7 procentow mjenje hač w aprylu. Kaž Budyska wotnožka Zwjazkoweje agentury za dźěło dźensa informuje, su słabeje konjunktury dla w róžowniku mało hibanja na tudyšich dźěłowych wikach zwěsćili. Zawody swój personal dźerža. Ličba přizjewjeneje bjezdźěłnosće je porno aprylej dale spadowała.

Ličba kurjakow woteběrała

Krótkopowěsće (30.05.23)

Dienstag, 30. Mai 2023 geschrieben von:

Župne literarne wubědźowanje

Choćebuz. Župa Delnja Łužica je literarne wubědźowanje „Přećeljo – pismiki – prominentni“ zahajiła. Wubědźowanje je wšitkim delnjoserbskim prócowarkam a prócowarjam wěnowane, kotřiž lětsa jubilejne posmjertne narodniny swjeća. Wo tym je Bramborske serbske radijo rozprawjało. Basnica a redaktorka Mina Witkojc kaž tež farar a sobuzałožer Domowiny Bohumił Šwjela staj dwajo z nich.

Nowa nawodnica

Worklecy. Worklečanske dźěćace dnjowe přebywanišćo „K wódnemu mužej“ změje wot 1. julija 2023 nowu wjednica. Gmejna Worklecy, jako nošerka žłobika, pěstowarnje a horta je so za 25lětnu Vanessu Kralowu z Kinsporka rozsudźiła. Z tym mnohe lěta w zarjadnišću jako kubłarka a komisariska nawodnica skutkowaca Monika Lejnertowa bórze swojej naslědnicy zamołwitosć přepoda.

Dołhe rynki jězdźidłow na A4

Krótkopowěsće (26.05.23)

Freitag, 26. Mai 2023 geschrieben von:

Tež dalše šule so přizjewili

Baršć. Prawicarske zjawy na Bórkowskej šuli „Mina Witkojc“ běchu tema na posedźenju sejmika wokrjesa Sprjewja-Nysa wčera w Baršću. Tam je nawoda statneho šulskeho zarjada rozprawjał, zo su so po wozjewjenju padow w Bórkowach tež dalše šule přizjewili. Wčera je mać ze Złeho Komorowa wo podobnych padach informowała. Přitomnaj šulerjej z Bórkowow staj prawicarske akcije wobkrućiłoj.

Bywši zarjad wottorhaja

Chrósćicy. Něhdyši gmejnski zarjad wosrjedź Chrósćic chce gmejna wottorhać dać. To su radźićeljo na wčerawšim posedźenju zdźělili, po tym zo běchu to do toho jednohłósnje wobzamknyli. Twarjenje je wot lěta 2019 prózdne. Za nje žanoho kupca namakali njejsu. Nětko planuja, zo ma tam nowa gratownja wohnjoweje wobory nastać. Wottorhanje płaći 111 000 eurow.

Koło abo e-bike leasować

Krótkopowěsće (25.05.23)

Donnerstag, 25. Mai 2023 geschrieben von:

Lěpšinu tež za studowacych

Drježdźany. Tiket za Němsku měli w přichodźe na wšěch wysokich šulach jako model połneje solidarity za 29,40 eurow poskićeć. Potuńšenu semestersku jězdźenku je dźěłowa skupina krajow za wuwiće tarifow na nastork Sakskeje namjetowała, kaž statne ministerstwo za hospodarstwo, dźěło a wobchad dźensa zdźěla. Zwjazk dyrbi tomu hišće přihłosować.

Słuchokniha znowa wušła

Budyšin. W Ludowym nakładnistwje Domowina je słuchokniha ze žortnymi powědančkami Jana Wornarja „Naš dźěd a ja“ w druhim nakładźe wušła. Směšne powědančka čita dźiwadźelnik Michał Lorenc. Zabawne powědki su zestajene ze zběrkow „Wajchtar trubi“ a „Po wsy horje, po wsy dele“. Słuchoknihu móžeće sebi za 12,90 eurow na přikład w Smolerjec kniharni kupić.

Psyče pissoiry dobywaja swět

Krótkopowěsće (24.05.23)

Mittwoch, 24. Mai 2023 geschrieben von:

Předstaji rěčne slědźenja

Nysa. Dr. Cordula Ratajczakowa, wědomostna sobudźěłaćerka projekta Domowiny ZARI (syć za regionalnu identitu a serbsku rěč), wobdźěli so tuchwilu na mjezynarodnej fachowej konferency w pólskim měsće Nysa. Pod hesłom „Wjacerěčnosć jako šansa“ předstaji wona zajutřišim, pjatk, wuslědki ze slědźenja wo połoženju, serbsku rěč nastupajo, na Budyskim Serbskim gymnaziju.

Kulturny pas za 18lětnych

Budyšin. Młodostni, kotřiž lětsa swoje 18. narodniny woswjeća, móža wot srjedź junija cyłoněmski kulturny pas wužiwać. Na to skedźbnja łužiska zapósłanča zwjazkoweho sejma Kathrin Michel (SPD). Młodostni maja za to wirtuelny budget we wysokosći 200 eurow k dispoziciji. Kulturnicy tuchwilu swoje poskitki, za kotrež maja hišće zastupne lisćiki, na registruja.

Ruska płaćić nochce

Krótkopowěsće (23.05.23)

Dienstag, 23. Mai 2023 geschrieben von:

Załožbowa rada konstituowana

Budyšin. Rada Załožby za serbski lud za dobu 2023–2027 je so dźensa we wobłuku nalětnjeho posedźenja gremija w Budyskim Serbskim domje skonstituowała. Za noweho předsydu su radźićelki a radźićeljo Marka Kowara wuzwolili, kiž naslěduje Susann Šenkec. Jeho prěni zastupjer je Budyski wyši měšćanosta Karsten Vogt, druhi zastupjer Helmut Wenzel, měšćanosta Lubnjowa w Błótach.

Taflu za Hronow powalili

Kamjenej pola Radworja. Wopomnjensku taflu za bywšu wjesku Hronow blisko Kamjeneje pola Radworja su nje­znaći na dnju muži powalili. Hakle w lěće 2021 bu na Hronow dopominacy swjaty křiž při drozy mjez Kamjenej a Wulkej Dubrawu spowaleny a wobškodźeny. Škoda wučinješe tehdy 6 000 eurow. Ludźo tukuja na to, zo jedna so při tym wo antiserbske abo antikatolske akcije.

Wotbóčka awtodróhi zawrjena

Krótkopowěsće (22.05.23)

Montag, 22. Mai 2023 geschrieben von:

Na kursu stawiznow byli

Budyšin. Seminar „Serbske stawizny“ w Budyskim Serbskim instituće je zašły pjatk a sobotu pjeć wobdźělnicow a wobdźělnikow přiwabił. Wšitcy su studenća sorabistiki na Instituće za sorabistiku Lipšćanskeje uniwersity. Na naprašowanje zarjadnišća podawa historikarka dr. Lubina Malinkowa, skutkowaca při Serbskim instituće w Budyšinje, w lětnim semestru 2023 wotpowědny kurs.

Lěkar wjelka zasparnił

Budyšin/Kubšicy. Choreho wjelka, kiž bě předewšěm w gmejnje Kubšicy zadomjeny, je skótny lěkar zasparnił. Něhdźe dwulětne muske zwěrjo měješe wjacore chorosće, zdźělichu minjeny pjatk zamołwite zarjady. Wjelk je mjez ludźimi stajnje zaso njewěstosć wubudźił, dokelž bě we wjeskach za cyrobu abo za schowom pytał.

Młody Kamjenčan derby dobył

Krótkopowěsće (19.05.23)

Freitag, 19. Mai 2023 geschrieben von:

Zahraja zakónčacy koncert

Budyšin. Dźensa w 19 hodź. zahraja studenća z Europy kaž tež Aziskeje zhromadnje z orchestrom Serbskeho ludoweho ansambla (SLA) na tamnišej žurli zakónčacy koncert festiwala „TŘIANGEL“. Hižo cyły tydźeń su woni swoje hraće na huslach, brači abo violoncellu pod nawodom wuznamnych docentow w mišterskej akademiji wukmanili. Tuta wotmě so lětsa prěni raz w Budyšinje.

Wubědźowanje idejow

Budyšin. „Rěč zwjazuje. Rěc zwězujo. Sorbisch verbindet – 2023“ rěka lětuše wubědźowanje idejow Załožby za serbski lud. Wot 1. junija do 25. julija móža so towarstwa, komuny, gmejny, institucije, priwatne wosoby a druzy nošerjo z tu- a wukraja wo mytowanske pjenjezy mjez 1 000 a 10 000 eurami požadać. Załožba pyta za wosebje kreatiwnymi a inowatiwnymi naprawami, kotrež temje wubědźowanja wotpowěduja.

Kyrkonoška „dožiwjenska karta“

Krótkopowěsće (17.05.23)

Mittwoch, 17. Mai 2023 geschrieben von:

Pytanje wulětow přestorčili

Budyšin. Marketingowa towaršnosć Hornja Łužica-Delnja Šleska dyrbi zahajenje onlinoweje pytanskeje funkcije FAMIL-O-MAT techniskich ćežow dla wot 1. junija na 7. julija přestorčić. Z funkciju móža zajimcy za wólnočasnymi poskitkami w Hornjej Łužicy pytać, zo móhli swoje wulěty ze swójbu optimalnje planować. W testowej fazy bě wjac hač 300 poskitkow cyłkownje 260 poskićerjow na platformje wopisane.

Spěwy popoweje opery online

Budyšin. Wšitke spěwy předlońšeje serbskeje popoweje opery „Carpe Noctem – njeskónčna nóc“ su wot nětka na wšelkich streamingowych platformach přistupne. Cyłkownje třinaće spěwow namakaće mjez druhim na „Spotify“. Projekt nasta w kooperaciji hudźbneho kolektiwa „Trio a Kumple“ z młodźinskim towarstwom „Pawk z.t.“.

Orlando Bloom a čěske piwo

Krótkopowěsće (16.05.23)

Dienstag, 16. Mai 2023 geschrieben von:

Serwisowy běrow zaručeny

Wojerecy. Sakski nutřkowny minister Armin Schuster (CDU) je wčera we Wojerecach zdźělenku wo dalšim spěchowanju serwisoweho běrowa za serbšćinu w komunalnych naležnosćach hač do kónca lěta 2024 nošerjej Domowinje přepo­dał. Město Kulow je 3 500 eurow za restawrowanje wobškodźenych swjatych křižow dóstał.

Serbska filmowa koordinatorka

Choćebuz. Filmowča Angela Šusterec je koordinatorka za Syć serbskich filmowcow. Wot 10. meje znajerka sceny hižo w tutym zastojnstwje skutkuje. Jeje hłowne nadawki su, so wo syć filmowcow a jich poradźowanje starać. Dale chce wona zetkanja dźěći organizować, ze Serbskim institutom přehlad hižo nawjerćanych filmow zestajić a webstronu syće znowa wuhotować kaž tež wobstajnje aktualizować.

Sudetscy Němcy a Čěska

Serbska debata

Neuheiten LND