Krótkopowěsće (16.11.23)

Donnerstag, 16. November 2023 geschrieben von:

Dalše potencielne stejnišćo

Hodźij. Tež Hodźij móhł po rešeršach sćelaka MDR potencielne stejnišćo za nowu jednotku Zwjazkoweje wobory w Hornjej Łužicy być. Wjesnjanosta Gerald Meyer (njestronjan) wobkrući našemu wječornikej wotpowědne naprašowanje wójska a zo su so zastupjerjo před tydźenjemi móžny areal pola Třoch Hwězdow wobhladali. Wot toho časa w naležnosći ničo wjace słyšał njeje, Meyer rjekny.

Mjenje spokojnosć z dźěłom

Drježdźany. Němski dźěłarnistwowy zwjazk woprašuje so jónu za lěto dźěłopřijimarjow po cyłej Němskej za jich spokojnosću z dźěłom. Ličby za loni nětko předleža. Tam podachu 45 procentow wšěch dźěłacych, zo su ze swojim dźěłom spokojom.  Tole je wo 10 procentow mjenje hač w cyłoněmskim přerězku.

Z bałdrijanom kóčki wabja

Krótkopowěsće (15.11.23)

Mittwoch, 15. November 2023 geschrieben von:

Krabat Magica – mystiske kuzło

Čorny Chołmc. Nowy poskitk Krabat Magica maja wot 28. do 30. decembra w Čornochołmčanskim Krabatowym młynje. Z nim chcedźa ludźom ze spěwom, hudźbu a kuzłom strach před ćmu wzać. Budźe to potajne a mystiske dožiwjenje za cyłu swójbu. Wšědnje maja 700 městnow. 1 500 zastupnych lisćikow je hižo předatych. Tikety hodźa so online abo při wječornej kasy kupić.

Hrajnišća za Europeadu

Za klětuše koparske wubědźowanje narodnych mjeńšinow je 14 hrajnišćow zawěsćenych. Hry wotměja so potajkim wot 28. junija do 7. julija w Němskej a Danskej, hraničnej kónčinje wokoło Harrislee. Cyłkownje 36 mustwow je přizjewjenych, mjez nimi tež serbskej mustwje žonow a muži.

Nowe spěchowanje projektow

Drježdźany. Swobodny stat mjezu překročace projekty za ćežišći „skutkowny pomjezny rum – prewencija a přiměrjenje na změnu klimy“ a „powšitkowne a powołanske kubłanje kaž tež wuknjenje čas žiwjenja“ programa Interreg EU w Sakskej a Pólskej spěchuje. Komuny, towarstwa, załožby, lokalne hospodarske zwjazki a zarjadnistwa móža swoje próstwy hač do 31. januara 2024 zapodać.

Krótkopowěsće (14.11.23)

Dienstag, 14. November 2023 geschrieben von:

Dale w krótkodźěle

Kamjenjej. Sobudźěłaćerjo kaolinownje blisko Rakec maja hač do kónca lěta hišće w krótkodźěle zwostać. Wo tym informuje zawod. Přičina za to je dale snadne naprašowanje kaolina za papjerowu industriju. Nětko nadźijeja so na nowych partnerow, na přikład z cementoweje industrije.

Nowosći w syći

Budyšin/ Chrósćicy. Dwě nowosći předstajichu serbske cyłki poslednje dny w socialnych syćach: Medijowi skawća, dźěl studija LUCIJA, su swój prěni spěw wozjewili. Pod titulom „Nimamy (hišće) bok na šulu“ zaběraja so młodźi skawća na lóštne wašnje ze šulu. Widejo je na YouTube přistupny. Na Instagramje je kapała Holaski připowědźiła bórze prěnju kolekciju drastow wudać. Bliše informacije maja bórze slědować.

Najwyši eksorcist je Čech

Krótkopowěsće (13.11.23)

Montag, 13. November 2023 geschrieben von:

Dóńtaj čłowjekow přirunował

Praha. Z Němsko-čěskim žurnalistiskim mytom 2023 bu mjez druhim reportaža „Kak ćežko je, w cuzym kraju so zadomjeć“ žurnalista Martina Weisera, wozjewjena w časopisu „Reporter“, wu­znamjenjena. Přinošk přirunuje dóńt po Druhej swětowej wójnje wuhnateje sudetskeje Němki ze žiwjenjom ukrainskeho dźěsća ćěkancow w Němskej.

4. myto Miny Witkojc wuwołane

Podstupim. Serbska rěč a kultura stej centralnej wobstatkaj Łužiskeje identity a domizny. To chce Braniborska z Mytom Miny Witkojc wuwědomić, kotrež kóžde druhe lěto spožča. Hač do 29. februara 2024 móža komuny, towarstwa a zwjazki namjety za 4. myto Witkojc zapodać, kaž je knježerstwowy społnomócnjeny za naležnosće Serbow, statny sekretar Tobias Dünow (SPD), wčera wozjewił.

Komunalnu energetiku zmóžnić

Krótkopowěsće (10.11.23)

Freitag, 10. November 2023 geschrieben von:

Běła Woda dobyćerka myta

Drježdźany. Sakske spěchowanske myto za demokratiju spozčichu štwórtk wječor mjez druhim městu Běła Woda. Zhromadnje z Amadeu Antonio Załožbu přepoda ministerka za justicu, demokratiju a Europu, Katja Meier (Zeleni) myto za „komunu demokratije“ hornjołužiskemu městu. Při tym wuzběhuja Běłu Wodu jako pozitiwny přikład regiona.

Młodźi awtorojo pilni byli

Budyšin. Na lětušim literarnym wubědźowanju Załožby za serbski lud a Ludoweho nakładnistwa Domowina wobdźěli so dohromady 24 młodych pisacych z dohromady 53 přinoškami. Woni su teksty we wšelakich kategorijach zapodali. Najwjetši je podźěl krótkich powědančkow, mało basnjow abo dlěšich tekstow prozy kaž tež dźiwadłowych hrow je dóšło. Jury nětko wo dobyćerju rozsudźi.

Žnjowy swjedźeń w Hochozy

Krótkopowěsće (09.11.23)

Donnerstag, 09. November 2023 geschrieben von:

Nowa politiska domizna

Budyšin. Rjemjeslniski mištr Mike Hauschild ma nowu politiski domiznu. Po wustupje ze sakskeje FDP je so Hauschild nětko Swobodnym wolerjam přizamknył a přisłuša jako wokrjesny radźićel frakciji Swobodnych wolerjow w Budyskim sejmiku. Mandat Budyskeho měšćanskeho radźićela wón hromadźe z njestronjanom Stefanom Mücku w nowej „frakciji Swobodnych wolerjow – přichod za Budyšin“ dale wukonja.

Ermer z prezidentom pjekarstwa

Stuttgart. Roland Ermer z Njedźichowa je nowy prezident Centralneho zwjazka pjekarskeho rjemjesła Němskeje. Wjelelětny wyši mišter krajneho zjednoćenstwa pjekarjow Saxonia chce so přede­wšěm ćežišćam „wottwar běrokratije, pobrachowace fachowe mocy a energijowe płaćizny“ wěnować a swoje rjemjesło „na politiskej runinje intensiwnišo zastu­pować“.

Nakładne awta kontrolować 

Krótkopowěsće (08.11.23)

Mittwoch, 08. November 2023 geschrieben von:

Žurnalizm w Němskej spěchować

Magdeburg. Z wobzamknjenjom je zjězd Zwjazka žurnalistow Němskeje (DJV) wčera w Magdeburgu zwjazkowe a krajne knježerstwa namołwił, zo bychu spěchowanje žurnalizma wutworili, kotrež je wot stata zdalene organizowane. Spěchowanje měło so na dodźerženje wuměnjenjow złožować, do kotrychž liča personalnu zestawu redakcijow, wjazanje na tarif a dodźerženje přiměrjenych honorarow.

Změna strukturow wohrožena

Carny Gózd. Předewzaćelskej zwjazkaj Berlin-Braniborska (UVBB) a kraj Sakska maja hospodarske wuwiće a z tym tež wuspěch změny strukturow we Łužicy za wohroženej. „Spušćomnych politiskich rozsudow a jasnych konceptow dotal nimamy. Energijowa kriza, wójna, běrokratija a falowacy fachowcy su eksploziwna měšeńca“, praji prezident UVBB Burkhardt Greiff wutoru na Łužiskim forumje w Carnym Gózdźe.

Wustajeńca „pod kožu šła“

Krótkopowěsće (07.11.23)

Dienstag, 07. November 2023 geschrieben von:

Chcedźa kampanju dale wjesć

Budyšin. Přirada za imageowu kampanju „Sorbisch? Na klar.“ je so wčera w Budyšinje zešła, zo by so wo jeje skutkownosći kaž tež jeje přichodźe rozmołwjała. Přitomna běše mjez druhim sakska statna ministerka za kulturu a turizm Barbara Klepsch (CDU). Wona zdźěli, zo podpěruje sakske knježerstwo kampanju tež klětu financielnje dale. Nimo toho ma so přichodnje ewaluacija nastupajo skutkownosć kampanje přewjesć.

Wo wobsahu rozmyslowali

Choćebuz. W internaće Delnjoserbskeho gymnazija Choćebuz wobdźělichu so partnerojo UNESCO 5 wčera na třoch dźěłarničkach wo wutwarje kolesowarskeje šćežki „Serbske impresije“. Přewažnje koncentrowachu so wobdźělnicy na wobsah šćežki. Klětu chcedźa so akterojo wo strukturne srědki požadać, za čož je koncept – čerwjena nitka – trěbny.

Štwórty, rozšěrjeny nakład

Krótkopowěsće (06.11.23)

Montag, 06. November 2023 geschrieben von:

Zastupowaca superintendentka

Niska. Slepjansku fararku Jadwigu Malinkowu je synoda ewangelskeho cyrkwinskeho wobwoda šleska Hornja Łužica na namjet superintendenta Daniela Schmidta jako zastupowacu superintendentku wobkrućiła. Synodalki a synodalojo su na posedźenju sobotu w Niskej tež třeće farske městno za słužbu w zastupnistwje schwalili, zo bychu za swjećenje božich słužbow fleksibelniši byli.

Dźak města Jurjej Łušćanskemu

Budyšin. Budyski měšćanosta dr. Robert Böhmer (njestronjan) je Jurjej Łušćanskemu k počesćenju z lětušim Mytom Ćišinskeho minjeny pjatk w mjenje města gratulował. Z wuměłskej twórbu dźakowaše so Böhmer jemu za wjelelětne spomóžne zhromadne dźěło. Serbski přełožk hesła města „Knježe, spožč rozrost“ je Łušćanski při restawrowanju radneje žurle sobu nastorčił a wobstarał.

Haink direktny kandidat CDU

Krótkopowěsće (03.11.23)

Freitag, 03. November 2023 geschrieben von:

Kultura Łužicu zjednoća

Dobrjoług-Góstkow (Doberlug-Kirchhain). Prěni kulturny forum Łužica pod hesłom „Smy hižo tu“ je so dźensa w Braniborskej wotměł. Mjez 130 wobdźělnikami bě kulturny referent Domowiny Clemens Škoda. Nawjazujo na tak mjenowany kulturny plan za Łužicu chcedźa wotnětka z wuradźowanjemi w Delnjej a Hornjej Łužicy region jako „europsku kulturnu marku“ wuwić.

Nowe slědźenišćo we Łužicy

Hamor. W zwisku ze změnu strukturow ma w Krynhelecach slědźenišćo za karbonowe niće nastać. Wčera bu kampanja oficialnje w Hamorskej gmejnje předstajena. Kaž sakske ministerstwo za wuwiće zdźěli, swobodny stat a Zwjazk projekt z cyłkownje 62,3 milionami eurow podpěrujetej.

Roboter za klinikum

Serbska debata

Neuheiten LND