Krótkopowěsće (24.04.20)

Freitag, 24. April 2020 geschrieben von:

Tři dalše wosoby zemrěli

Zhorjelc/Budyšin. Třo dalši wobydlerjo Nišćanskeje hladarnje su na koronawirus zemrěli. Tak rozrosće ličba smjertnych woporow pandemije dla w Zhorjelskim wo­krjesu na 17. Dohromady bě wčera tam 252 (+2) inficěrowanych, 73 wosobow je so wustrowiło. W Budyskim wo­krjesu bě wčera 341 (+1) natyknjenych a 206 wustrowjenych. Dotal je tu dźesać wosobow w zwisku z wirusom zemrěło.

Chěže online prezentuja

Zhorjelc. Wobmjezowanjow zjawneho žiwjenja koronapandemije dla je załožba domow ze stołom za 31. meju planowany 16. dźeń wotewrjenych chěžow wotprajiła. W minjenych lětach je pře­rěznje 8 000 ludźi składnosć wužiwało, so tón dźeń po chěžach ze stołom roz­hladować a so na přikład wo poradźenym ponowjenju wobhonić. Domy chcedźa nětko online prezentować.

Mało ludźi w Praskej metro

Krótkopowěsće (23.04.20)

Donnerstag, 23. April 2020 geschrieben von:

Hladarnja dale sylnje potrjechena

Budyšin/Zhorjelc. Ličba inficěrowanych z koronawirusom je wčera w Budyskim wokrjesu z jědnaće nowonatyknjenymi na 340 rozrostła. Dźewjeć z nich su w Radebergskej hladarni zwěsćili. W Zhorjelskim wokrjesu je ze sydom nowoinfekcijemi 250 padow koronawirusa. Šěsć tajkich registrowachu w zwisku z Nišćanskej pěstowarnju.

Casnik ma noweho šefredaktora

Choćebuz. Dr. Viktor Zakar budźe wot 1. meje šefredaktor Noweho Casnika, kaž LND zdźěla. Wón přewozmje zastojnstwo najprjedy hač do kónca lěta wot Gregora Wieczoreka, kiž redakciju kónc měsaca na swójske přeće wopušći. Dr. Zakar bě wot 2013 do 2015 šefredaktor kulturneho časopisa Rozhlad a skutkowaše po tym w RCW. Klětu LND šefredaktorstwo znowa wobsadźi.

„Lotka a Sophia“ myto dobyłoj

Krótkopowěsće (22.04.20)

Mittwoch, 22. April 2020 geschrieben von:

Štyri dalše smjertne pady

Budyšin/Zhorjelc. W Radebergskej hladarni su tři dalše wosoby na schorjenje Covid-19 zemrěli. Dohromady je w Budyskim wokrjesu dotal dźesać smjertnych padow koronawirusa dla. Ličba natyknjenych je wčera wo tři na 329 přiběrała. W Zhorjelskim wokrjesu je dalša wosoba zemrěła, dohromady je jich nětko štyrnaće. Ličba inficěrowanych je tam z 243 dale konstantna.

Podpěra partnerskemu regionej

Drježdźany. Z 50 000 škitnymi dychanskimi maskami podpěruje Sakska pólski partnerski region Dolny Śląsk, zo by koronakrizu zmištrował. Wudźěłki přewostaja zwjazkowe strowotniske ministerstwo na próstwu swobodneho stata. Ministerski prezident Michael Kretschmer (CDU) chcyše maski dźensa społnomócnjenemu wojewódstwa Dolny Śląsk Krzysztofej Bramorskemu přepo­dać.

Ratarjo alarmowani

Krótkopowěsće (21.04.20)

Dienstag, 21. April 2020 geschrieben von:

Žane nowe infekcije

Budyšin/Zhorjelc. Ličba wobkrućenych koronainfekcijow w Budyskim wo­krjesu njeje so wčera porno njedźeli powjetšiła, dokelž njejsu tón dźeń žane testy přewjedli. Dotal bu 326 korona-natyknjenjow zwěsćenych. Tuchwilu je 421 ludźi w karantenje. W Zhorjelskim wo­krjesu je ličba z 243 wobkrućenymi pa­dami dale konstantna.

Pjeć nowych sobustawow

Malešecy. Naprawy župy „Jan Arnošt Smoler“ k wožiwjenju serbskeho žiwjenja w Malešecach su so mjeztym tež ­na tamnišu Domowinsku skupinu wuskutkowali. Tam móžachu nětko pjeć młódšich nowych sobustawow třěšneho zwjazka witać, kotřiž bydla we wsy samej a w Barće. Mjez nimi je Ma­lešanski wjesnjanosta Matthias Seidel (CDU). Dwaj nowaj Domowinjanaj serbsce rěčitaj.

Hospodarstwo loni rozrostło

Krótkopowěsće (20.04.20)

Montag, 20. April 2020 geschrieben von:

Mjenje nowoinfekcijow korony

Budyšin/Zhorjelc. Ličba wobkrućenych koronainfekcijow w Budyskim wo­krjesu je njedźelu na 326 rozrostła. Sobotu bě jich štyri mjenje. Ličba aktualnje přikazanych karantenow wučinja 416. Dźesać pozitiwnje testowanych wosobow tuchwilu w chorowni lěkuja. W Zhorjelskim wokrjesu je 243 wobkrućenych padow korony. Porno soboće njeje so tuž ničo změniło.

Jury chce srjedu rozsudźić

Budyšin. 36 dźěći a młodostnych je so na wubědźowanju wo najrjeńše jutrowne jejko dźěći a młodźiny wobdźěliło. Wo tym informuje projektna managerka Domowiny Rejzka Krügerowa po zakónčenju wurisanja minjeny pjatk. Wšitkich sydom starobnych skupin je zastupjene. Srjedu chce jury w Budyskim Serbskim domje wo najrjeńšim jejku rozsudźić.

Strach lěsnych wohenjow přiběra

Krótkopowěsće (17.04.20)

Freitag, 17. April 2020 geschrieben von:

Dalšej wosobje zemrěłoj

Zhorjelc/Budyšin. W Nisčanskej hladarni je sej koronawirus póndźelu dalšej smjertnej woporaj žadał. Cyłkownje zemrě dotal w Zhorjelskim wokrjesu třinaće ludźi w zwisku z pandemiju. Wčera mějachu we wokrjesu 232 inficěrowanych (+6). W Budyskim bě jich 308 (+4). Ličba dotalnych pjeć zemrětych so tu njeje dale stopnjowała.

Busy zaso normalnje jězdźa

Budyšin. Wšitke zjawne busowe linije w Budyskim wokrjesu so wot póndźele, 20. apryla, zaso po normalnym, na šulskich dnjach płaćiwym jězbnym planje posłužuja, kaž krajnoradny zarjad informuje. Pasažěrojo w busach maja rjadowanja nastupajo wotstawk wobkedźbować a jězdźenki w předawarnjach kupić. Přez durje pódla šofera dale móžno njeje do busa zastupić abo wulězć.

Wirtuelne kino doma

Krótkopowěsće (16.04.20)

Donnerstag, 16. April 2020 geschrieben von:

Snadnuški rozrost

Budyšin/Zhorjelc. W Budyskim wo­krjesu je wčera ličba z koronawirusom natyknjenych na 304 (+7) rozrostła. Šěsć wosobow je so wustrowiło, dohromady je jich 150. Aktualnje lěkuja třinaće pacientow w chorowni. W Zhorjelskim wokrjesu je 226 inficěrowanych (+2). 34 ludźi je so tu wustrowiło, sydom je tuchwilu w chorowni.

Prěnje myto do Ralbic

Budyšin. Prěni ze sto eurami mytowany přinošk wubědźowanja „Serbski poskitk tydźenja w syći“ (SPTWS) je widejo Ralbičanskeje młodźiny wo přihotach na lětuše jutry. Kaž Załožba za serbski lud zdźěli, je so třičłonska jury za njón rozsudźiła, dokelž rysuja młodostni z humorom přihoty na lětuše „hinaše“ jutry. Přinošk je so přećiwo wjac hač dźesać namjetam přesadźił a je na Facebooku přistupny.

Strašne potrojenje

Krótkopowěsće (15.04.20)

Mittwoch, 15. April 2020 geschrieben von:

Kamjenska Boršć nominowana

Drježdźany. Sakska je Kamjensku Boršć za zwjazkowy zapis imaterielneho kulturneho namrěwstwa nominowała, kaž kulturna ministerka Barbara Klepsch (CDU) dźensa zdźěli. Swobodny stat sćěhuje poručenje Sakskeho kulturneho senata w tej naležnosći. Jemu běštej integratiwny charakter a mjezykulturna tendenca Kamjenskeje Boršće rozsudnej. Požadanje zapodaštej město Kamjenc a Spěchowanske towarstwo Boršć z.t. loni.

Wirus sej dalši wopor žadał

Budyšin/Zhorjelc. W Radebergskej hladarni je dalša wosoba w zwisku z koronapandemiju zemrěła. Cyłkownje je w Budyskim wokrjesu nětko pjeć smjertnych padow. Z třomi nowonatyknjenymi je ličba inficěrowanych w Budyskim wokrjesu wčera na 297 přiběrała. W Zhorjelskim wokrjesu je jedna infekcija wjace hač dźeń do toho, dohromady bě tu wčera 224 inficěrowanych.

Na čěske protesty njedźiwali

Krótkopowěsće (14.04.20)

Dienstag, 14. April 2020 geschrieben von:

Dalšej wosobje zemrěłoj

Budyšin/Zhorjelc. W Radebergskej hladarni je w zwisku z koronawirusom dalša wosoba zemrěła, runje tak kaž pacientka w jednej chorowni Zhorjelskeho wokrjesa. Tak su w Budyskim wokrjesu mjeztym dohromady štyri, w Zhorjelskim jědnaće smjertnych padow pan­demije dla. Přez jutry je ličba inficěro­wanych tu na 224 (+25), w Budyskim wo­krjesu na 294 (+65) přiběrała.

Dale jenož hač do Zhorjelca

Budyšin. Pólske knježerstwo je zastaće mjezynarodnych železniskich zwiskow najprjedy hač do 3. meje 2020 podlěšiło. Na to skedźbni dźensa wobchadny zwisk Hornja Łužica-Delnja Šleska (ZVON). Tak jězdźa ćahi Trilex z Drježdźan do Zgor­zeleca dale jenož hač do Zhorjelca. Tam žana móžnosć njeje přestupić do směra na Pólsku. Ćahi KD do Jelenjeje Góry w Zgorzelecu skónča.

Jandźelej do njebja swěćitaj

Krótkopowěsće (09.04.20)

Donnerstag, 09. April 2020 geschrieben von:

Dalšej woporaj wirusa

Zhorjelc/Budyšin. W Nišćanskej hladarni je sej koronawirus wčera dalšej smjertnej woporaj žadał. Cyłkownje zemrě dotal w Zhorjelskim wokrjesu sydom ludźi w zwisku z pandemiju. Třinaćoch lěkuja w chorowni. Wčera mějachu we wokrjesu 199 inficěrowanych (+17). W Budyskim bě jich 229 (+7). Dźewjeć pacientow hladaja w chorowni.

K jutram wuspěšnje paslili

Budyšin. Dobyćerki wubědźowanja „Najrjeńša jutrowna paslenka 2020“ su Hana Domšec z Pěskec, Hana Budarjec z Großdittmannsdorfa, Rosie Matješkec z Hórkow, Milena a Helena Wokec z Budyšina a Leandra Nowakec z Chrósćic. Kaž Domowina informuje, bě 25 fotow jutrownych paslenkow dóšło. Wužiwarjo Facebooka su na stronje župy „Michał Hórnik“ sobu wothłosowali.

Sakska pomha plahowarjam

Serbska debata

Neuheiten LND