Policija (30.03.23)

Donnerstag, 30. März 2023 geschrieben von:

Padušnu trójku lepili

Wojerecy. Třoch paduchow je policija předwčerawšim wječor we Wojerecach při kradnjenju lepiła. Telefoniski pokiw wjedźeše zastojnikow k prózdnemu twarjenju na Scharnhorstowej. W nim zwěsćichu wjacore skóncowane durje a před domom w karje přihotowanu rubiznu. Bórze na to wuhladachu policisća w bliskich kerkach schowanych třoch paduchow. Pola nich namakachu wjetšu ličbu pokradnjenych wěcow z twarjenja. Zastojnicy wšitko sćazachu. Mužej w starobje 41 a 50 lět kaž tež 35lětna žona změja so nětko wosebje ćežkeho pada padustwa dla zamołwić.

Policija (29.03.23)

Mittwoch, 29. März 2023 geschrieben von:

Pódla gratownje so paliło

Wojerecy. Kólnja je so předwčerawšim popołdnju na Rathenauwowej we Wo­jerecach paliła. Při tym jednaše so wo pódlanske twarjenje tamnišeje dobrowólneje wohnjoweje wobory. Wohnjowi wobornicy mějachu tuž jara krótki puć a płomjenja spěšnje podusychu. Při­wšěm nasta něhdźe 5 000 eurow škody. Dokelž njemóžachu wuzamknyć, zo jedna so wo zapalerstwo, dyrbješe sej fachowc po hašenju kólnju bliže wobhladać. Što mějachu wobornicy w pódlanskim twarjenju składowane, znate njeje.

Policija (28.03.23)

Dienstag, 28. März 2023 geschrieben von:

Přesmykowanje strašne było

Policija (27.03.23)

Montag, 27. März 2023 geschrieben von:

Palne drjewo pokradnyli

Wojerecy. Zo je palne drjewo mjeztym jara požadane, dyrbješe wobsedźer zahrodki na Rólnym puću we Wojerecach minjeny kónc tydźenja zwěsćić. W zymskich měsacach wón wjacore tydźenje w swojej zahrodce njebě. W tym času tam njeznaći po wšěm zdaću wjacore razy pobychu a dohromady něhdźe tři kubikne metry drjewa pokradnychu. Škodu trochuje policija na něhdźe 300 eurow.

Papjery wotedać dyrbjał

Hamor. 57lětneho wodźerja Škody su policisća sobotu wječor pola Hamora na puću do Krynhelec kontrolowali. Pola njeho přewjedźechu alkoholowy test a zwěsćichu, zo měješe muž 1,16 promilow alkohola w kreji. Swoje awto dyrbješe na to stejo wostajić a policistam jězbnu dowolnosć wotedać.

Policija (24.03.23)

Freitag, 24. März 2023 geschrieben von:

Na pohrjebnišću kradnył

Budyšin. Najprjedy njeznaty muž je předwčerawšim rano na pohrjebnišću Při měšćanskim nasypje w Budyšinje ­narownu platu a wobhrodźenje rowa ­pokradnył. Po pokiwje swědka lepi policija 41lětneho w jeho awće. W bagažniku namakachu zastojnicy něhdźe 60 króć 70 centimetrow wulku platu z bronzy a wobhrodźenje rowa z kopora. Při drogowym tesće so wukopa, zo steješe pólski staćan pod wliwom amfetaminow. Tuž dyrbješe wón krej wotedać, nimo ­toho jeho policajsce registrowachu. Kriminalny technikar při namakanych ­wěcach slědy zawěsći. Po dorěčenju ze statnym rěčnistwom skućićela z policajskeho rewěra pušćichu. Kelko škody je wón načinił, dotal znate njeje. Kriminalna słužba pad dale přepytuje.

Policija (23.03.23)

Donnerstag, 23. März 2023 geschrieben von:

Tysacy eurow za knihi płaćił

Wojerecy. Sobudźěłaćer Wojerowskeje banki je po wšěm zdaću předwčerawšim 63lětneho Wojerowčana před wulkej škodu zachował. Muž bě so hižo w minjenych měsacach z woporom wobšudnikow stał. Jako wón wutoru popołdnju do pjenježneho instituta na Einsteinowej přińdźe, zo by 17 000 eurow na wukrajne konto přepokazał, bě sobudźěłaćer banki hnydom alarmowany a informowaše policiju. Zastojnikam Wojerowčan powědaše, zo chce pjenjezy za drohotne knihi wudać a zo je za druhe knihi hižo wjacore kredity wzał. Předwčerawšim drje wón nětko žane pjenjezy přepokazał njeje, přiwšěm su jemu wobšudnicy w zašłych měsacach dohromady hižo wjacore dźesaćtysacy eurow wulišćili. Kriminalna policija přepytuje nětko přećiwo pozdatnym předawarjam knihow, kotřiž běchu Wojerowčana w jeho bydlenju wopytali a jeho pohnuwali, knihi za přewysoku płaćiznu kupić.

Policija (22.03.23)

Mittwoch, 22. März 2023 geschrieben von:

Paduši so posłužowali

Wojerecy. W času wot soboty popołdnja hač do póndźelnišeho ranja su so nje­znaći w pincy bydlenskeho domu na Wojerowskej Gagarinowej posłužowali. Tam so namócnje zadobychu a wzachu najwšelakoriši grat, elektriske nastroje, instalaciski material, črije, napoje a prózdne bleše sobu. Rubizna ma dohromady něhdźe 665 eurow hódnoty. Nimo toho načinichu skućićeljo 20 eurow wěcneje škody. Za paduchami policija nětko pyta.

Policija (21.03.23)

Dienstag, 21. März 2023 geschrieben von:

Dźiwja honjeńca w nocy

Mužakow. Dotal njeznata wosoba je w nocy na póndźelu mjez Mužakowom a Rózborkom před policiju ćěkała. Zastojnicy chcychu Audi w Mužakowje kontrolować, šofer pak stupi na płun a smaleše do směra na Krušwicu. Dale dźěše honjeńca z hač do 200 km/h po statnej ­dróze. Jako awto na polo wotboči, je po­licisća z wočow zhubi. Pozdźišo Audi w Rózborku wopušćeny namakachu. Kaž so wukopa, bu jězdźidło něšto hodźin do toho w Berlinje pokradnjene.

Policija (20.03.23)

Montag, 20. März 2023 geschrieben von:

Kolesowar ćeknyć chcył

Smječkecy. Z drogowym deliktom dyrbješe so policija minjeny pjatk w Smječkecach zaběrać. Tam chcychu zastojnicy něhdźe w 17 hodź. kolesowarja kontrolować. Młody muž pak so zastojnikam wuwiny a mócnje do pedalow stupaše. Při swojim ćěkanju wón pakćik marihuany preč ćisny. Bórze na to policisća 23lětneho dosahnychu. Na njeho čaka nětko chłostanske jednanje.

Twarski wóz zapalił

Chrjebja. Blisko lěsa wotstajeny twarski wóz su sobotu pola Chrjebje zapalili. Wóz so dospołnje wupali. Płomjenja přeskočichu tohorunja na lěs. Wobornicy pak wšitko zhašachu. Přiwšěm nasta 10 000 eurow škody. Policija 14lětneho jako skućićela wuslědźi.

Policija (17.03.23)

Freitag, 17. März 2023 geschrieben von:
Na dróze S100 pola Pančic-Kukowa je wčera popołdnju k wobchadnemu njezbožu dóšło. Jako chcyše šofer VWja wottam na Chróšćansku dróhu wotbočić, zajědźe wón w křiwicy přejara na napřećiwnu jězdnu a zrazy frontalnje do tam přijědu­ceho Forda. Wobaj sobujěducej buštaj při njezbožu zranjenaj. Kameradojo ­dobrowólneje wohnjoweje wobory z Pančic-Kukowa běchu hnydom na městnje, wjazachu wuběžane ćěriwo a zawěsćichu městno njezboža. Foto: Rocci Klein

Serbska debata

Neuheiten LND